రాత్రిళ్లు ఎంత ప్రయత్నించినా నిద్ర రావడం లేదా? ఐతే ఈ పరీక్షలు చేయించుకోవాల్సిందే

ప్రస్తుతం చాలా మంది ఎదుర్కొంటున్న ప్రధాన ఆరోగ్య సమస్యల్లో నిద్రలేమి ఒకటి. రాత్రిళ్లు ఆలస్యంగా నిద్రపోవడం, మధ్య మధ్యలో మెలకువ రావడం, ఉదయం లేచిన తర్వాత కూడా అలసటగా అనిపించడం వంటి సమస్యలు సర్వసాధారణంగా మారాయి. చాలా మంది దీనికి ఒత్తిడి, పని భారం లేదా జీవనశైలినే కారణమని భావిస్తారు. అయితే, శరీరంలో కొన్ని కీలకమైన విటమిన్లు, ఖనిజాల లోపం కూడా నిద్ర నాణ్యతను తీవ్రంగా ప్రభావితం చేస్తుందని ఆరోగ్య నిపుణులు చెబుతున్నారు.

Also Read: పులి, మేక, గడ్డి, రైతు.. నది ఎలా దాటాలి? మీ తెలివితేటలకు సవాల్‌ విసిరే చిక్కు ప్రశ్న

విటమిన్ డి లోపం.. నిద్రపై ప్రభావం

శరీరంలో విటమిన్ డి సరిపడా లేకపోతే నిద్ర వ్యవధి, నాణ్యత రెండూ దెబ్బతినే అవకాశం ఉంటుంది. విటమిన్ డి లోపం వల్ల అలసట, బలహీనత, నిద్రలేమి వంటి సమస్యలు ఎక్కువగా కనిపిస్తాయి. ముఖ్యంగా సూర్యరశ్మి తక్కువగా అందుకునే వారిలో ఈ సమస్య ఎక్కువగా ఉండొచ్చు.

విటమిన్ బి12 కూడా కీలకమే

నాడీ వ్యవస్థ సక్రమంగా పనిచేయడానికి విటమిన్ బి12 చాలా అవసరం. ఈ విటమిన్ లోపిస్తే నిద్ర చక్రం దెబ్బతినే అవకాశం ఉంది. రాత్రిపూట తరచూ మెలకువ రావడం, సరిగా నిద్రపట్టకపోవడం, ఏకాగ్రత లోపించడం వంటి సమస్యలు కనిపించవచ్చు.

మెగ్నీషియం లోపంతో ఆందోళన, నిద్రలేమి

మెగ్నీషియం శరీరాన్ని, మనస్సును ప్రశాంతంగా ఉంచడంలో కీలక పాత్ర పోషిస్తుంది. దీని లోపం వల్ల ఒత్తిడి, ఆందోళన, కండరాల నొప్పులు పెరిగి నిద్రకు ఆటంకం కలిగించవచ్చు. మంచి నిద్ర కోసం మెగ్నీషియం స్థాయిలు సరిపడా ఉండటం అవసరం.

ఐరన్ లోపం కూడా ఒక కారణమే

శరీరానికి అవసరమైన ఆక్సిజన్‌ను రక్తం ద్వారా సరఫరా చేయడంలో ఐరన్ కీలక పాత్ర పోషిస్తుంది. ఐరన్ లోపం ఉంటే అలసట, బలహీనత, చంచలత్వం పెరిగి రాత్రిపూట ప్రశాంతంగా నిద్రపట్టకపోవచ్చు. ముఖ్యంగా మహిళల్లో ఐరన్ లోపం ఎక్కువగా కనిపిస్తుందని నిపుణులు చెబుతున్నారు.

ఈ లక్షణాలు కనిపిస్తున్నాయా?

• నిరంతర అలసట, బలహీనత
• ఏకాగ్రత లోపించడం
• తరచూ తలనొప్పులు
• కండరాల నొప్పులు
• మానసిక స్థితిలో మార్పులు
• చిన్న పనులు చేసినా అలసటగా అనిపించడం
• రాత్రిపూట సరిగా నిద్రపట్టకపోవడం

ఈ లక్షణాలు ఎక్కువకాలం కొనసాగితే వైద్యులను సంప్రదించి అవసరమైన రక్తపరీక్షలు చేయించుకోవడం మంచిది.

మంచి నిద్ర కోసం ఏమి చేయాలి?

ప్రతిరోజూ ఒకే సమయానికి నిద్రపోవడం, ఒకే సమయానికి మేల్కొనడం అలవాటు చేసుకోవాలి. నిద్రకు ముందు మొబైల్ ఫోన్, ల్యాప్‌టాప్ వంటి డిజిటల్ పరికరాల వినియోగాన్ని తగ్గించాలి. సమతుల్య ఆహారం తీసుకోవడం, తగినంత నీరు తాగడం, క్రమం తప్పకుండా వ్యాయామం చేయడం కూడా నిద్ర నాణ్యతను మెరుగుపరుస్తాయి. యోగా, ధ్యానం, ఒత్తిడి నియంత్రణ పద్ధతులు పాటించడం ద్వారా ప్రశాంతమైన నిద్రను పొందవచ్చు.