నవరాత్రి సమయంలో ఉపవాసాలు ఉండటం సురక్షితమేనా? షుగర్, బీపీ ఉన్నవారికి వైద్యుల హెచ్చరిక, సలహాలు!
భారతదేశంలో దేవీ నవరాత్రులు అత్యంత భక్తిశ్రద్ధలతో జరుపుకునే పండుగ. ఈ తొమ్మిది రోజుల పాటు అమ్మవారిని ఆరాధిస్తూ, చాలామంది భక్తులు కఠినమైన ఉపవాస దీక్షలు ఆచరిస్తారు. అయితే, ఈ ఉపవాసాలు భక్తికి ప్రతీక అయినప్పటికీ, ఆరోగ్యం పట్ల తగిన శ్రద్ధ తీసుకోకపోతే శరీరం తీవ్రంగా బలహీనపడే ప్రమాదం ఉంది. తొమ్మిది రోజుల పాటు నిరంతరం ఉపవాసం ఉండటం అందరికీ సురక్షితమేనా? ఈ అంశంపై వైద్య నిపుణులు ఏం చెబుతున్నారో ఇప్పుడు తెలుసుకుందాం.
Updated on: Oct 14, 2026 | 9:40 PM
దేశవ్యాప్తంగా దేవీ నవరాత్రుల వేడుకల్లో భాగంగా చాలా మంది తొమ్మిది రోజుల పాటు కఠినమైన ఉపవాసాలు ఉంటారు. అయితే, నిరంతరం ఉపవాసం ఉండటం ఆరోగ్యానికి సురక్షితమేనా అనే దానిపై వైద్య నిపుణులు పలు కీలక సూచనలు చేస్తున్నారు. ముఖ్యంగా షుగర్, బీపీ వంటి దీర్ఘకాలిక సమస్యలు ఉన్నవారు వైద్యుల సలహా లేకుండా ఉపవాసాలు ఉండకూడదని, మందుల వేళల్లో మార్పులు చేయకూడదని హెచ్చరిస్తున్నారు. స్పర్శ్ హాస్పిటల్ (హెన్నూర్ రోడ్) ఇంటర్నల్ మెడిసిన్ అండ్ డయాబెటాలజీ లీడ్ కన్సల్టెంట్ డాక్టర్ మనోహర్ కె. మాట్లాడుతూ.. ఉపవాసం పేరుతో ఆరోగ్యాన్ని ఎప్పుడూ నిర్లక్ష్యం చేయకూడదని స్పష్టం చేశారు.
డాక్టర్ మనోహర్ కె. సూచనలు: మీ శరీరం సహకరించకపోయినా లేదా విపరీతమైన నీరసంగా అనిపించినా కఠిన ఉపవాసాలను కొనసాగించడం మంచిది కాదని ఆయన హెచ్చరించారు. మీరు ఒకవేళ డయాబెటిస్, లేదా రక్తపోటు (బీపీ) వంటి దీర్ఘకాలిక సమస్యల కోసం క్రమం తప్పకుండా మందులు వాడుతున్నట్లయితే, ఉపవాసం ఉండే ముందే తప్పనిసరిగా మీ వైద్యుడిని సంప్రదించాలి. ఎట్టి పరిస్థితుల్లోనూ డాక్టర్ సలహా లేకుండా మందులను ఆపడం, మోతాదు మార్చడం లేదా వేళలు మార్చడం వంటివి చేయకూడదు. అలాగే గ్లూకోజ్ స్థాయిలను క్రమం తప్పకుండా చెక్ చేసుకోవాలి.
ఏ లక్షణాలను నిర్లక్ష్యం చేయకూడదు?
ఉపవాస సమయంలో తలతిరగడం, విపరీతంగా చెమటలు పట్టడం, వణుకు రావడం, గందరగోళంగా అనిపించడం, స్పృహ కోల్పోవడం లేదా మూత్రం తక్కువగా రావడం వంటి లక్షణాలు కనిపిస్తే వెంటనే ఉపవాసాన్ని విరమించి వైద్యుడిని సంప్రదించాలని డాక్టర్ మనోహర్ సూచించారు.
ఉపవాస సమయంలో ఎలాంటి ఆహారం తీసుకోవాలి?:
ఉపవాస సమయంలో శరీరం డీహైడ్రేట్ కాకుండా కొబ్బరి నీళ్లు, నిమ్మరసం, మజ్జిగ వంటి ద్రవ పదార్థాలు తీసుకోవాలి.
ఆహారంలో చిలగడదుంపలు (స్వీట్ పొటాటో), పండ్లు, డ్రై ఫ్రూట్స్, పెరుగు, పాలు, పన్నీర్ వంటి పోషకాహారాన్ని చేర్చుకోవాలి.
ఉపవాసం విరమించేటప్పుడు ఒకేసారి భారీగా తినకుండా, తేలికపాటి సమతుల్య ఆహారాన్ని తీసుకోవడం ఉత్తమం. వేపుళ్లు, కారాలు, మితిమీరిన తీపి పదార్థాలకు దూరంగా ఉండాలి.
ఉపవాసాలు ఆధ్యాత్మిక చింతనకు మంచివే అయినప్పటికీ, ఆరోగ్యాన్ని పణంగా పెట్టకుండా తగు జాగ్రత్తలు పాటించడం ఎంతో ముఖ్యం.
