గురకతో గుండెపోటు ప్రమాదం..? నిర్లక్షం చేయకూడని ముఖ్య లక్షణాలు ఇవే!
రాత్రిపూట వచ్చే గురకను ఎప్పుడూ తేలికగా తీసుకోకూడదు. సాధారణ గురకకు, స్లీప్ అప్నియా అంటే నిద్రలో ఊపిరి ఆగిపోవడం వల్ల వచ్చే గురకకు మధ్య స్పష్టమైన తేడా ఉంటుంది. చాలా బిగ్గరగా గురక రావడం, గురక మధ్యలో కొద్దిసేపు శ్వాస ఆగి మళ్లీ పెద్ద శబ్దంతో మొదలవడం, అర్ధరాత్రి ఉలిక్కిపడి లేవడం, ఉదయం లేవగానే తలనొప్పి లేదా గొంతు ఎండిపోవడం, పగటిపూట అధిక నిద్ర మగత వంటివి స్లీప్ అప్నియా సంకేతాలు కావచ్చు. దీన్ని నిర్లక్ష్యం చేస్తే రక్తపోటు, మధుమేహం, గుండె సంబంధిత సమస్యలు, స్ట్రోక్ ప్రమాదం పెరిగే అవకాశం ఉంటుంది. పూర్తి వివరాల్లోకి వెళితే..

రాత్రి నిద్రపోయేటప్పుడు గురక రావడం చాలామందిలో కనిపిస్తుంది. సాధారణంగా దీనిని కొందరు పెద్దగా పట్టించుకోరు. అయితే ప్రతి గురక సాధారణమైనది కాదు. కొన్ని సందర్భాల్లో ఇది స్లీప్ అప్నియా అనే నిద్ర సంబంధిత సమస్యకు సూచన కావచ్చు. నిద్రలో శ్వాస మార్గానికి అంతరాయం కలిగి శ్వాస ఆగిపోవడం లేదా తగ్గడం దీని ప్రధాన లక్షణం.
గమనించాల్సిన ముఖ్య సంకేతాలు
అధిక శబ్దం, శ్వాస ఆగడం: సాధారణ గురక కంటే భిన్నంగా చాలా బిగ్గరగా గురక రావడం, గురక మధ్యలో కొన్ని సెకన్ల పాటు శ్వాస ఆగినట్లు అనిపించి మళ్లీ శబ్దంతో మొదలవడం స్లీప్ అప్నియాలో కనిపించవచ్చు.
నిద్రలో ఉలికిపాటు: రాత్రిపూట ఊపిరి ఆడనట్లుగా అనిపించి ఉలిక్కిపడి లేవడం, గుండె వేగంగా కొట్టుకోవడం, నోరు ఎండిపోవడం వంటివి గమనించవచ్చు.
ఉదయం తలనొప్పి, పగటి నిద్ర మగత: రాత్రి సరిపడా నిద్రపోయినట్లు అనిపించినా ఉదయం తలనొప్పి, అలసట, పగటిపూట పనిచేసేటప్పుడు లేదా ప్రయాణాల్లో నిద్ర ముంచుకురావడం, ఏకాగ్రత తగ్గడం వంటి లక్షణాలు ఉండవచ్చు.
ఇతర అంశాలు: అధిక బరువు, మెడ చుట్టూ కొవ్వు, నియంత్రణలో లేని బీపీ లేదా షుగర్, రాత్రిపూట పదేపదే మూత్రవిసర్జనకు లేవడం వంటివి కూడా దీనితో ముడిపడి ఉండవచ్చు.
నిర్లక్ష్యం చేస్తే జరిగే నష్టాలు
స్లీప్ అప్నియాను దీర్ఘకాలం పట్టించుకోకుండా వదిలేస్తే శరీరంలో ఆక్సిజన్ స్థాయిల్లో హెచ్చుతగ్గులు ఏర్పడి రక్తపోటు, మధుమేహం, గుండె సంబంధిత సమస్యలు, బ్రెయిన్ స్ట్రోక్ వంటి ప్రమాదాలు పెరిగే అవకాశం ఉంటుందని వైద్య నిపుణులు హెచ్చరిస్తున్నారు.
తీసుకోవాల్సిన జాగ్రత్తలు
వెల్లకిలా కాకుండా పక్కకు తిరిగి పడుకోవడం, తల కొద్దిగా ఎత్తులో ఉండేలా చూసుకోవడం, బరువు తగ్గడానికి ప్రయత్నించడం, రాత్రి వేళల్లో మద్యం లేదా నిద్ర మాత్రలు (వైద్య సలహా లేకుండా) తీసుకోకపోవడం, ధూమపానం మానేయడం వంటివి ఉపశమనానికి తోడ్పడతాయి. గురకతో పాటు పై లక్షణాలు కనిపిస్తే తప్పనిసరిగా వైద్యుడిని సంప్రదించి సరైన నిర్ధారణ, చికిత్స పొందాలి.




