పెరుగు ఎక్కువ రోజులు ఉండాలంటే ఈసారి ఇలా చేసి చూడండి.. మంచి రిజల్ట్ ఉంటుంది..!

Curd

పెరుగు నిల్వ చేయాలంటే ముందుగా దానిని గాలి తగలకుండా ఉంచడం చాలా ముఖ్యం. గాలి ప్రవేశించని డబ్బాలో పెరుగు పెట్టి.. గట్టిగా మూసివేయడం వల్ల బయటి వాతావరణం నుండి వచ్చే సూక్ష్మజీవుల పెరుగుదల తగ్గుతుంది. ఈ విధంగా మూసి ఉంచిన పెరుగు 3 నుంచి 5 రోజుల వరకు తాజాగా ఉంటుంది.

నిజానికి పెరుగును పూర్తిగా ఫ్రీజ్ చేయడం అవసరం లేదు. కానీ మీకు ఎక్కువ కాలం నిల్వ చేసుకోవాల్సిన అవసరం ఉంటే ఫ్రీజర్‌ లో పెట్టడం వల్ల పెరుగు త్వరగా పాడవకుండా ఉంటుంది. గడ్డకట్టిన పెరుగును వంటల్లో కలిపి వాడవచ్చు. తినే ముందు అది సాధారణ ఉష్ణోగ్రతకు వచ్చే వరకు కొంత సమయం ఇవ్వాలి.

పెరుగు నిల్వ పెట్టే డబ్బా పూర్తిగా శుభ్రంగా ఉండాలి. ముందు వాడిన డబ్బాలో చిన్న చెత్త మిగిలినా అది పెరుగును పాడుచేసే సూక్ష్మజీవులకు ఆహారంగా మారుతుంది. అలాగే ఒకసారి పెరుగు తీసుకున్న తర్వాత మళ్లీ మిగిలినది తిరిగి వేయకండి.

చాలా మంది చేసే తప్పు.. వాడిన చెంచా లేదా చేత్తో పెరుగు తీయడం. ఇది చేతుల్లో లేదా వాతావరణంలో ఉన్న బ్యాక్టీరియాను పెరుగు డబ్బాలోకి చేరుస్తుంది. దీని ఫలితంగా పెరుగు త్వరగా పాడవుతుంది. కాబట్టి ప్రతిసారీ శుభ్రంగా కడిగిన చెంచాను ఉపయోగించడమే మంచిది.

పెరుగును ఫ్రిడ్జ్‌ లో ఉంచేటప్పుడు దానిని డోర్ భాగంలో ఉంచడం వల్ల త్వరగా పాడవుతుంది. ఎందుకంటే ఫ్రిడ్జ్ డోర్‌ భాగం తరచుగా తెరవడం వల్ల అక్కడ ఉష్ణోగ్రత స్థిరంగా ఉండదు. అందువల్ల పెరుగు వేడికి గురై చల్లదనం తగ్గిపోతుంది. కాబట్టి పెరుగును ఫ్రిడ్జ్‌ లో లోపల భాగంలో ఎక్కువ చల్లగా ఉండే ప్రదేశంలో ఉంచడం ఉత్తమం.

పెరుగు ఆరోగ్యానికి మంచి చేసే ఆహార పదార్థం. దీన్ని కాపాడుకోవడం కొంచెం జాగ్రత్తతోనే సాధ్యమవుతుంది. పైన చెప్పిన చిట్కాలు పాటించడం ద్వారా మీ పెరుగు పాడవకుండా, ఆరోగ్యంగా, తాజా రుచితో ఎక్కువ కాలం నిల్వ ఉంచుకోవచ్చు. ఇవి సాధారణంగా కనిపించే విషయాలే అయినా.. వాటిని సరిగా పాటించకపోతే పెరుగు త్వరగా పాడవుతుంది.