AQI
TV9 Network
User
Sign In

By signing in or creating an account, you agree with Associated Broadcasting Company's Terms & Conditions and Privacy Policy.

మురుగు కాలువలే వీరికి బంగారు గనులు.. చెత్తలోనే సంపద వెతుక్కుంటున్న అభాగ్యులు..!

సాధారణంగా మురుగు కాలువల దగ్గరకు వెళ్లాలంటేనే చాలామంది ఇష్టపడరు. దుర్వాసన, అపరిశుభ్రత కారణంగా వాటికి దూరంగా ఉంటారు. కానీ బీహార్‌లోని ఓ ప్రాంతంలో మాత్రం పరిస్థితి పూర్తిగా భిన్నం. అక్కడి మురుగు కాలువల్లో బంగారం దొరుకుతుందనే ఆశతో వందలాది మంది ప్రతిరోజూ గంటల తరబడి వెతుకుతుంటారు.

మురుగు కాలువలే వీరికి బంగారు గనులు.. చెత్తలోనే సంపద వెతుక్కుంటున్న అభాగ్యులు..!
Gold Hunt In Sewage Drains
Balaraju Goud
|

Updated on: Oct 31, 2026 | 7:43 PM

Share

సాధారణంగా మురుగు కాలువల దగ్గరకు వెళ్లాలంటేనే చాలామంది ఇష్టపడరు. దుర్వాసన, అపరిశుభ్రత కారణంగా వాటికి దూరంగా ఉంటారు. కానీ బీహార్‌లోని ఓ ప్రాంతంలో మాత్రం పరిస్థితి పూర్తిగా భిన్నం. అక్కడి మురుగు కాలువల్లో బంగారం దొరుకుతుందనే ఆశతో వందలాది మంది ప్రతిరోజూ గంటల తరబడి వెతుకుతుంటారు. కాలువల్లోని బురద, చెత్తను జల్లెడ పట్టి మరీ బంగారు రేణువులను సేకరిస్తుంటారు. వినడానికి ఆశ్చర్యంగా ఉన్నా.. ఇదే అక్కడ కొందరికి జీవనాధారంగా మారింది.

బంగారు ఆభరణాల తయారీతోనే అసలు కథ!

బీహార్‌లోని ఆరా నగర ప్రాంతంలోని గుజ్రీ బజార్, జగ్జీవన్ మార్కెట్‌లు బంగారం, వెండి ఆభరణాల వ్యాపారానికి ప్రసిద్ధి. ఇక్కడ అనేక దుకాణాల్లో వందలాది మంది కళాకారులు బంగారు ఆభరణాల తయారీ, కటింగ్, సానపట్టడం, పాలిషింగ్ వంటి పనులు చేస్తుంటారు. ఈ ప్రక్రియలో బంగారానికి సంబంధించిన అతి సూక్ష్మమైన రేణువులు కింద పడిపోతుంటాయి. ఆభరణాల తయారీ తర్వాత దుకాణాలను శుభ్రం చేసినప్పుడు ఈ రేణువులు దుమ్ము, ధూళితో కలిసి బయటకు వస్తాయి. దుకాణాలను నీటితో కడిగినప్పుడు ఆ బంగారు కణాలు మురుగు కాలువల్లోకి చేరుతాయి. అక్కడి బురదలో కలిసిపోయి పేరుకుపోతాయి. దీంతో కాలువల వ్యర్థాల్లోనూ బంగారం దొరికే అవకాశం ఏర్పడుతోంది.

బురదలో బంగారం కోసం గంటల తరబడి వేట!

ఈ బంగారు రేణువుల కోసం స్థానికులతో పాటు రాజస్థాన్, మధ్యప్రదేశ్ వంటి రాష్ట్రాల నుంచి కూడా కొందరు వస్తుంటారు. కాలువల్లో పేరుకుపోయిన బురద, వ్యర్థాలను సేకరించి జల్లెడ పడతారు. అందులోని మట్టి, చెత్తను వేరు చేసి సంప్రదాయ పద్ధతుల్లో బంగారు కణాలను గుర్తించేందుకు ప్రయత్నిస్తారు. అయితే ఈ పని అంత సులభం కాదు. గంటల తరబడి శ్రమించినా కొన్నిసార్లు ఒక్క బంగారు రేణువు కూడా దొరకదు. మరికొన్ని సందర్భాల్లో కొద్దిపాటి బంగారం లభిస్తుంది. ఎంత బంగారం దొరుకుతుందో ముందుగా అంచనా వేయడం కూడా సాధ్యం కాదు. అయినప్పటికీ అదృష్టాన్ని పరీక్షించుకుంటూ చాలామంది ఈ పనిని కొనసాగిస్తున్నారు.

చీపురు దుమ్ముకూ భారీ డిమాండ్!

ఈ మార్కెట్‌లో మరో ఆసక్తికరమైన విషయం ఏమిటంటే.. దుకాణాల్లో ఊడ్చిన దుమ్ము, చీపుర్లకు అంటుకున్న వ్యర్థాలకూ విలువ ఉంటుంది. వాటిలో బంగారు రేణువులు ఉండవచ్చనే ఆశతో కొందరు వాటిని సేకరిస్తారు. దుకాణాలు, ఇళ్లలో శుభ్రం చేసినప్పుడు వచ్చే చెత్తను కూడా కొన్నిసార్లు వేలం వేస్తారు. డబ్బులు చెల్లించి మరీ ఆ చెత్తను కొనుగోలు చేసేందుకు ఆసక్తి చూపుతారు.

చెత్తలోనూ సంపద.. కానీ కష్టానికి హామీ లేదు!

మురుగు కాలువల్లోని బురదను జల్లెడ పట్టి బంగారం వెతకడం వినడానికి వింతగా అనిపించినా, కొందరి జీవన పోరాటానికి ఇది ఒక మార్గంగా మారింది. అయితే ఈ పనిలో ఆరోగ్యపరమైన ప్రమాదాలు కూడా ఉన్నాయి. మురుగునీటిలోని హానికర పదార్థాలు, క్రిముల నుంచి రక్షణ తీసుకోవడం ఎంతో అవసరం. బంగారం అంటే మెరిసే ఆభరణాలే కాదు.. కొందరి జీవితాల్లో అది మురుగు కాలువల బురదలోనూ కనిపించే ఆశ. అందుకే ఈ వింత బంగారం వేట ఇప్పుడు అందరి దృష్టిని ఆకర్షిస్తోంది!

మరిన్ని హ్యుమన్ ఇంట్రెస్ట్ వార్తల కోసం ఇక్కడ క్లిక్ చేయండి..

Follow Us