ఇది ఒక్కటి చాలు సమ్మర్‌లో బాడీని కూల్ చేస్తుంది.. స్పెషల్ సగ్గుబియ్యం రబ్డీ.. ఇలా చేస్తే అద్దిరిపోవాల్సిందే

ఎండాకాలంలో శరీరాన్ని చల్లగా ఉంచేందుకు చాలా మంది పలు రకాల వంటకాలను తయారు చేసుకుని తింటారు.. అయితే.. శరీరాన్ని చల్లబరిచే పదార్థాల్లో సగ్గుబియ్యం ఒకటి.. ముఖ్యంగా సగ్గుబియ్యంతో ఒక వినూత్నమైన, ఆరోగ్యకరమైన స్వీట్ రెసిపీని తయారు చేసుకోవచ్చు.. ఎప్పటిలాగే పాయసం కాకుండా, ఈ సగ్గుబియ్యం బాల్స్ కీర్ లేదా రబ్డీ పిల్లల నుండి పెద్దల వరకు అందరినీ ఆకట్టుకుంటుంది. ఇది రుచితోపాటు వేడి వాతావరణంలో కడుపుకి ఎంతో చల్లదనాన్ని ఇస్తుంది. ఈ స్వీట్ తయారీకి ముందుగా ఒక గిన్నెలో ముప్పావు కప్పు సగ్గుబియ్యం తీసుకోవాలి. అది లావువి అయినా, సన్నటివి అయినా, లేదా నైలాన్ సగ్గుబియ్యం అయినా పర్వాలేదు. ఇందులోకి ముప్పావు కప్పు వేడినీళ్లు పోసి, బాగా కలిపి మూత పెట్టి అరగంట నుండి గంట పాటు నానబెట్టాలి. సమయం ఉంటే రెండు గంటలైనా నానబెట్టవచ్చు. ఈ ప్రక్రియ వల్ల సగ్గుబియ్యం చక్కగా మెత్తబడి బాల్స్ చేయడానికి సిద్ధంగా ఉంటుంది.

తరువాత, స్టవ్ మీద ఒక పాన్ లేదా కడాయి పెట్టి, అడుగు మాడకుండా ఉండేందుకు కొద్దిగా నీళ్లు పోయాలి. అందులో అర లీటరు పాలు, ముప్పావు కప్పు పంచదార లేదా బెల్లం వేసి బాగా కలిపి మరిగించాలి. పాలు పొంగు రావడం ప్రారంభించిన తర్వాత, ఒక టీస్పూన్ యాలకుల పొడి, కొద్దిగా కుంకుమపువ్వు వేసి కలుపుకోవాలి. కుంకుమపువ్వు పాలల్లో మరుగుతున్న కొద్దీ అందమైన రంగును విడుదల చేస్తుంది. పాలను అప్పుడప్పుడు కలుపుతూ ఉండాలి.

ఇంతలో, నానబెట్టిన సగ్గుబియ్యాన్ని తీసుకుని, చేత్తో రెండు నిమిషాలు ఒత్తితే అది జిగురుగా మారి ముద్దలా వస్తుంది. దీనికి రెండు టీస్పూన్ల పంచదార, రెండు టీస్పూన్ల పాలపొడి కలపాలి. పాలపొడి లేనివారు కార్న్‌ఫ్లోర్ కూడా ఉపయోగించవచ్చు, ఇది బాల్స్ బైండింగ్‌కు సహాయపడుతుంది. ఈ మిశ్రమాన్ని చేత్తో బాగా కలిపి జిగురుగా చేసుకోవాలి. ఇప్పుడు చేతులకు కొద్దిగా నెయ్యి రాసుకుని, ఈ మిశ్రమాన్ని చిన్న చిన్న రౌండ్ బాల్స్‌గా తయారుచేయాలి. ఆకారం కచ్చితంగా ఉండనవసరం లేదు.

పాలు చక్కగా మరిగిన తర్వాత, ఫ్లేమ్‌ను తక్కువ చేసి, ఈ సగ్గుబియ్యం బాల్స్‌ను పాలలోకి నెమ్మదిగా వేయాలి. పాలు పొంగిపోకుండా మూతను పూర్తిగా పెట్టకుండా కొద్దిగా ఖాళీ ఉండేలా చూసుకోవాలి. బాల్స్‌ను వేసినప్పుడు ఎక్కువగా గరిటతో కలపకుండా, పాన్‌ను కొద్దిగా తిప్పుతూ లేదా గరిటతో పాలను నెమ్మదిగా కదుపుతూ ఉడికించాలి. మొదట్లో బాల్స్ అడుగున ఉంటాయి, ఉడికే కొద్దీ అవి పైకి తేలడం ప్రారంభిస్తాయి. తక్కువ మంటపై 10-15 నిమిషాల పాటు ఉడికించడం వల్ల సగ్గుబియ్యం బాల్స్ చక్కగా ఉడుకుతాయి. పాలు కూడా చిక్కబడవు. ఒక బాల్ తీసుకుని చూస్తే అది చక్కగా ఉడికినట్లు తెలుస్తుంది, పంటి కింద పడకుండా సాఫ్ట్‌గా ఉంటుంది.

చివరగా, స్టవ్ ఆపి పక్కన పెట్టుకోవాలి. నచ్చితే నేరుగా డ్రై ఫ్రూట్స్ వేసుకోవచ్చు లేదా ఒక టేబుల్ స్పూన్ నెయ్యిలో కొద్దిగా జీడిపప్పు, కిస్‌మిస్‌లను బంగారు రంగు వచ్చేవరకు వేయించి స్వీట్‌లో కలిపితే రుచి మరింత పెరుగుతుంది. ఈ యమ్మీ, టేస్టీ సగ్గుబియ్యం బాల్స్ కీర్ (లేదా రబ్డీ)ని సర్వ్ చేసుకోవడానికి సిద్ధంగా ఉంటుంది. ఎప్పుడూ ఒకే రకంగా కాకుండా ఇలా విభిన్నంగా ప్రయత్నించి ఈ వేసవిలో చలువను పొందండి.

మరిన్ని లైఫ్‌స్టైల్ వార్తల కోసం ఇక్కడ క్లిక్ చేయండి..