Pressure Cooker: ప్రెషర్ కుక్కర్‌లో అన్నం వండుతున్నారా? ఒక గ్లాసు బియ్యానికి ఎన్ని గ్లాసుల నీళ్లు పోయాలో తెలియట్లేదా?

మన ఇళ్లలో ఉదయం, సాయంత్రం అనే తేడా లేకుండా దాదాపు ప్రతిరోజూ అన్నం వండటం నిరంతర ప్రక్రియ. అది సాధారణ పప్పు అన్నం, రాజ్మా అన్నం అయినా లేదా ఘుమఘుమలాడే వెజ్ పులావ్ అయినా, ప్రతి ఒక్కరి భోజనంలోనూ అన్నానికి ఒక ప్రత్యేకమైన స్థానం ఉంటుంది. అయితే చాలా మంది ఇళ్లల్లో ప్రెషర్ కుక్కర్‌లో అన్నం వండినప్పుడు, అది మరీ ఎక్కువగా ఉడికిపోయి మెత్తగా ముద్దలా అయిపోతుందని లేదా ఒకదానికొకటి అంటుకుపోయి పొడిపొడిగా రావడం లేదని చాలా మంది ఇల్లాళ్లు తరచూ ఇబ్బంది పడుతుంటారు. దీనికి ప్రధాన కారణం బియ్యానికి తగిన మోతాదులో నీటిని చేర్చకపోవడం, వంట చేసేటప్పుడు తప్పుడు పద్ధతులను పాటించడం , అవసరానికి మించి విజిల్స్ రానివ్వడమే. వంట నిపుణులు చెబుతున్న కొన్ని చిన్నపాటి చిట్కాలను, పక్కా నీటి కొలతలను పాటిస్తే రెస్టారెంట్ తరహాలో పొడిపొడిగా, మల్లెపువ్వులాంటి మెత్తటి అన్నాన్ని ఇంట్లోనే సులభంగా ఎలా వండుకోవచ్చో ఇప్పుడు వివరంగా చూద్దాం.

బియ్యం కడగడం ముఖ్యమైన దశ మంచి అన్నం వండటం అనేది కుక్కర్ పొయ్యి మీద పెట్టడంతో కాదు, బియ్యాన్ని కడగడంతోనే మొదలవుతుంది. బియ్యం పైన సహజంగానే పిండిపదార్థపు (స్టార్చ్) పొర ఉంటుంది. దీనిని గనుక సరిగ్గా శుభ్రం చేయకపోతే వండిన తర్వాత అన్నం ముద్దగా మారి, ఒకదానికొకటి అంటుకుపోతుంది. అందువల్ల, బియ్యాన్ని ఒక పెద్ద పాత్రలో పోసి శుభ్రమైన నీటితో రెండు మూడు సార్లు మెల్లగా చేత్తో క్షుణ్ణంగా కడగాలి. ఇలా చేయడం వల్ల అదనపు స్టార్చ్ తొలగిపోయి, అన్నం విడివిడిగా, మెత్తగా వస్తుంది.

ఒక గ్లాసు బియ్యానికి ఎంత నీరు కలపాలి? వంట నిపుణురాలు కవితా సింగ్ ప్రకారం, ప్రెషర్ కుక్కర్‌లో సాధారణ బాస్మతి బియ్యం వండుతున్నట్లయితే, ఒక గ్లాసు బియ్యానికి ఒకటిన్నర (1.5) గ్లాసుల నీరు అత్యంత సరైన నిష్పత్తిగా పరిగణించబడుతుంది. ఇక్కడ ముఖ్యమైన విషయం ఏమిటంటే, ఏ గ్లాసుతోనైతే బియ్యాన్ని కొలుస్తామో, అదే గ్లాసుతో నీటిని కూడా కొలవాలి. ఈ పక్కా కొలత వల్ల అన్నం మరీ ఎక్కువగా ఉడకకుండా, విడివిడిగా పర్ఫెక్ట్‌గా తయారవుతుంది.

పులావ్ , బిర్యానీకి నీటి నిష్పత్తి మారుతుంది మీరు సాధారణ అన్నానికి బదులుగా వెజ్ పులావ్, మటర్ పులావ్ లేదా బిర్యానీ లాంటివి చేస్తుంటే నీటి పరిమాణాన్ని కొద్దిగా తగ్గించాల్సి ఉంటుంది. ఎందుకంటే పులావ్‌లో వాడే రకరకాల కూరగాయలు, మసాలాలు , నెయ్యి లేదా నూనె వల్ల వాటిలో అదనపు తేమ చేరుతుంది. అందువల్ల, పులావ్ చేసేటప్పుడు ఒక గ్లాసు బియ్యానికి సుమారు ఒకటిన్నర గ్లాసుల కంటే కొద్దిగా తక్కువ, అంటే ఒకటింపావు (1.25) గ్లాసుల నీరు పోస్తే సరిపోతుంది. దీనివల్ల పులావ్‌లోని బియ్యం పొడవుగా, పొడిపొడిగా వస్తాయి.

మంట ఏ సైజులో ఉండాలి.. ఎన్ని విజిల్స్ రావాలి? కుక్కర్‌లో బియ్యం, నీళ్లు పోసిన తర్వాత మూతను గట్టిగా మూసి, గ్యాస్‌ను ఎల్లప్పుడూ ఎక్కువ మంట (High Flame) మీద పెట్టాలి. ఎక్కువ వేడి వల్ల కుక్కర్ లోపల ప్రెషర్ త్వరగా పెరిగి బియ్యం సమానంగా ఉడుకుతుంది. చాలా మంది చేసే పెద్ద తప్పు ఏమిటంటే అన్నం ఎక్కువ విజిల్స్ వచ్చే వరకు ఆపుతారు, దీనివల్ల అన్నం పగిలి ముద్ద అవుతుంది. నిపుణుల ప్రకారం, ఎక్కువ మంట మీద కేవలం ఒక్క విజిల్ వస్తే చాలు, వెంటనే స్టవ్ ఆపేయాలి.

గ్యాస్ ఆపిన తర్వాత ఓపిక పట్టండి చాలా మంది స్టవ్ ఆపిన వెంటనే కుక్కర్ విజిల్ ఎత్తి ఆవిరి తీసేసి మూత తెరుస్తుంటారు, ఇది తప్పుడు పద్ధతి. గ్యాస్ ఆపేసిన తర్వాత కుక్కర్‌ను కనీసం 10 నుండి 15 నిమిషాల పాటు అలానే వదిలేయాలి. కుక్కర్ లోపల ఉన్న ఆవిరిలోనే అన్నం మరింత చక్కగా మగ్గి గట్టిపడుతుంది. ప్రెషర్ అంతా సహజంగా తగ్గిన తర్వాతే మూత తీయాలి. అన్నం మరింత సువాసనగా, పొడవుగా రావాలంటే వండటానికి ముందే బియ్యాన్ని 20 నుండి 30 నిమిషాలు నానబెట్టడం , వండేటప్పుడు కొన్ని చుక్కల నెయ్యి వేయడం మంచిది.

గమనిక (Disclaimer): ఈ కథనంలో అందించబడిన వంట చిట్కాలు , నీటి కొలతల సమాచారం కేవలం సాధారణ గృహ వంటల నిపుణుల అనుభవాలు , ఇంటర్నెట్ నివేదికల ఆధారంగా సేకరించబడినది మాత్రమే. బియ్యం రకం (కొత్త బియ్యం లేదా పాత బియ్యం) బట్టి నీటి అవసరం కొద్దిగా మారే అవకాశం ఉంది కాబట్టి, మీ ఇంట్లో వాడే బియ్యం నాణ్యతను బట్టి తగిన మార్పులు చేసుకోగలరని మనవి.