కొత్తిమీరే కదా అని తీసిపారేస్తున్నారా.. అది చేసే అద్భుతం తెలిస్తే మళ్లీ ఆ తప్పు చెయ్యరు..
వంటల్లో వాసన కోసం వేసే కొత్తిమీరను మనం తరచుగా పక్కన పారేస్తుంటాం. కానీ ఆ చిన్న ఆకుల్లో దాగి ఉన్న రహస్యాలు తెలిస్తే మీరు ఆశ్చర్యపోతారు.. షుగర్ కంట్రోల్ చేయడం దగ్గరి నుండి మీ చర్మాన్ని మెరిసేలా చేయడం వరకు.. కొత్తిమీర చేసే మ్యాజిక్ అంతా ఇంతా కాదు. అసలు కొత్తిమీరను ఏ సమయంలో తీసుకుంటే ఆరోగ్యానికి మంచిది? అనేది తెలుసుకుందాం..
మనం ప్రతిరోజూ వంటల్లో రుచి కోసం, గార్నిషింగ్ కోసం కొత్తిమీరను ఉపయోగిస్తుంటాం. అయితే ఈ చిన్న ఆకుకూర కేవలం ఆహారానికి సువాసనను జోడించడమే కాకుండా శరీరానికి ఎంతో మేలు చేసే ఔషధ గుణాలను కలిగి ఉందని ఆరోగ్య నిపుణులు చెబుతున్నారు. కొత్తిమీరలో విటమిన్ ఏ, సి, కె తో పాటు శరీరానికి అవసరమైన ఖనిజాలు, ఫైబర్ పుష్కలంగా ఉంటాయి. ముఖ్యంగా దీని గ్లైసెమిక్ సూచిక తక్కువగా ఉండటం వల్ల మైగ్రేన్లు, థైరాయిడ్, కొలెస్ట్రాల్ మరియు హార్మోన్ల అసమతుల్యత వంటి అనేక ఆరోగ్య సమస్యలకు ఇది దివ్యౌషధంగా పనిచేస్తుంది.
డయాబెటిస్ లేదా రక్తంలో చక్కెర సమస్య ఉన్నవారికి కొత్తిమీర ఒక గొప్ప వరమనే చెప్పాలి. ఇందులో ఉండే సహజ ఎంజైమ్లు రక్తంలోని చక్కెర స్థాయిలను తగ్గించడంలో చురుకైన పాత్ర పోషిస్తాయి. ఇందులోని ఫైబర్ ఆహారం నెమ్మదిగా జీర్ణం అయ్యేలా చేసి, చక్కెర స్థాయిలు ఒక్కసారిగా పెరగకుండా నియంత్రిస్తుంది. దీని కోసం కొత్తిమీర ఆకులను రాత్రిపూట నీటిలో నానబెట్టి, ఉదయం ఆ నీటిని తాగడం వల్ల శరీరానికి అద్భుతమైన ప్రయోజనాలు లభిస్తాయి. అంతేకాకుండా ఇందులో ఉండే యాంటీఆక్సిడెంట్లు శరీర రోగనిరోధక శక్తిని పెంచి, ఇన్ఫెక్షన్లు, ఇతర వ్యాధుల నుండి మనల్ని రక్షిస్తాయి.
జీర్ణవ్యవస్థ పనితీరును మెరుగుపరచడంలో కూడా కొత్తిమీర కీలక పాత్ర పోషిస్తుంది. ఇది కడుపులో గ్యాస్, అజీర్ణం, ఉబ్బరం వంటి సమస్యలను తగ్గిస్తుంది. శరీరం లోపల పిత్తం లేదా అసిడిటీ పెరిగినప్పుడు అది ముఖంపై మొటిమలు, మచ్చల రూపంలో కనిపిస్తుంది. కొత్తిమీర సహజంగా చలువ చేసే గుణం కలిగి ఉండటం వల్ల శరీరాన్ని లోపలి నుండి శుభ్రపరుస్తుంది. దీనివల్ల చర్మం కాంతివంతంగా మారడమే కాకుండా మొటిమలు కూడా తగ్గుతాయి. అలాగే ఇందులోని విటమిన్ సి, యాంటీఆక్సిడెంట్లు జుట్టు కుదుళ్లను బలోపేతం చేసి జుట్టు రాలడాన్ని అరికడతాయి.
గుండె ఆరోగ్యానికి కూడా కొత్తిమీర ఎంతో మేలు చేస్తుంది. ఇది శరీరంలోని అదనపు సోడియంను బయటకు పంపడం ద్వారా రక్తపోటు, కొలెస్ట్రాల్ను అదుపులో ఉంచుతుంది. క్రమం తప్పకుండా కొత్తిమీరను మితంగా తీసుకోవడం వల్ల గుండెపోటు ప్రమాదాన్ని కూడా తగ్గించవచ్చని కొన్ని అధ్యయనాలు వెల్లడిస్తున్నాయి. రోజువారీ ఆహారంలో కొంత మొత్తంలో కొత్తిమీరను చేర్చుకోవడం ద్వారా కేవలం రుచిని మాత్రమే కాకుండా సంపూర్ణ ఆరోగ్యాన్ని కూడా పొందవచ్చని నిపుణులు సూచిస్తున్నారు.