దివ్యాస్త్రం.. ఈ మొక్క ఉంటే డాక్టర్ అవసరమే ఉండదు.. మీ ఇంట్లో ఇలా ఈజీగా పెంచుకోండి..

Ajwain plant: వామాకు మొక్కను సర్వరోగ నివారిణి అని పిలుస్తారు.. ఇది ప్రతి ఇంటిలో తప్పనిసరిగా ఉండాల్సిన మొక్క. ఈ మొక్క వల్ల ఎన్నో ఆరోగ్య ప్రయోజనాలు ఉన్నాయి. వామాకుల్లో అద్భుతమైన ఔషధ గుణాలు, పోషకాలు దాగున్నాయి.. ఇందులో యాంటీ ఆక్సిడెంట్లు, ఫైబర్, కాల్షియం, ఐరన్, ఒమేగా-3 ఫ్యాటీ యాసిడ్లు పుష్కలంగా ఉన్నాయి. ఇవి ఎన్నో సమస్యలను నివారించడంలో సహాయపడతాయని ఆయుర్వేద నిపుణులు చెబుతున్నారు. దీనిని వివిధ ప్రాంతాలలో రకరకాల పేర్లతో పిలుస్తారు. చిన్న పిల్లలు, పెద్దలు ఉన్న ప్రతి ఇంట్లోనూ ఈ మొక్కను పెంచుకోవడం మంచిది.

వాము మొక్క పెంపకం సులభం:

వాము మొక్కను పెంచడం చాలా సులువు. ఇది అంత పెద్ద కష్టమైన పని కాదు. కొంచెం ముదిరిన కొమ్మను తెచ్చి మట్టిలో నాటితే, అది చాలా ఈజీగా నాటుకుంటుంది. సుమారు 15 నుండి 20 రోజులలో మొక్క వేళ్ళు పట్టి, ఒకటిన్నర నెలలో చక్కగా పెరుగుతుంది. పెద్దగా నిర్వహణ అవసరం లేని మొక్క ఇది.

సంరక్షణ – నేల మిశ్రమం:

మొక్క బలంగా పెరగడానికి సరైన నేల మిశ్రమం చాలా కీలకం. వేసవి కాలంలో మొక్కల మొదట్లో నీరు పోయడంతో పాటు, ఆకులపై నీటిని స్ప్రే చేయడం వల్ల మొక్కలు చాలా తాజాగా, ఆరోగ్యంగా ఉంటాయి. మొక్క ఎదుగుదలకు ఈ నీటి స్ప్రే ఎంతో ఉపయోగపడుతుంది. ఈ మొక్కకు ఇప్పటివరకు ఎటువంటి ఫంగిసైడ్ సమస్యలు లేదా ఆకులపై మచ్చలు గమనించబడలేదు. చిన్న కుండీలో కూడా ఈ మొక్క బలంగా పెరగగలదు.. దీనికి మంచి నేల మిశ్రమం కారణం..

ఆరోగ్య ప్రయోజనాలు:

వామాకు మొక్క అనేక ఆరోగ్య ప్రయోజనాలను కలిగి ఉంది. ఇది జీర్ణశక్తిని పెంపొందించడంలో, ఆహారం సులువుగా జీర్ణం కావడంలో సహాయపడుతుంది. చిన్నపిల్లలకు జలుబు, దగ్గు ఉన్నప్పుడు వాము ఆకులు, తులసి ఆకులను కలిపి మరిగించిన నీటిని ఒక స్పూన్ లేదా రెండు స్పూన్ల మోతాదులో ఇస్తే ఉపశమనం లభిస్తుంది. ఆయుర్వేద నిపుణుల ప్రకారం.. ఈ ఆకుకు ఎన్నో ఉపయోగాలు ఉన్నట్లు తెలుస్తుంది. అందుకే దీనిని సర్వరోగ నివారిణి అని పిలుస్తారు.

వాము ఆకులతో వంటలు..

వాము ఆకులతో రకరకాల వంటకాలు చేసుకోవచ్చు. వాము ఆకు బజ్జీ, వాము ఆకు రోటి పచ్చడి, చారు, రసం వంటివి ఉన్నాయి. ఇవన్నీ చేయడం కుదరకపోతే, ప్రతిరోజు వండే కూరల్లో ఒక చిన్న వాము ఆకును వేయవచ్చు. ఇది కూర రుచిని పెద్దగా మార్చదు.. కానీ ఆకులోని ప్రయోజనాలు లభిస్తాయి. లేత ఆకులను వంటకాలకు ఉపయోగించడం మంచిది.

ఈ విధంగా వామాకు మొక్కను పెంచుకోవడం వల్ల మన ఇంట్లోనే అన్ని జబ్బులకు నయమయ్యే ఔషధ మొక్క ఉన్నట్లు అవుతుంది. అనవసరమైన మొక్కల కంటే ఇలాంటి ఔషధ గుణాలున్న మొక్కలను పెంచుకోవడం వల్ల మనకు ఎంతో ప్రయోజనం ఉంటుంది. తక్కువ స్థలం ఉన్నవారు కూడా తులసి వంటి మొక్కలతో పాటు వాము మొక్కలను పెంచుకోవచ్చు.