ఇంటికి బంధువులు వచ్చినప్పుడు తక్కువ ఖర్చుతో ఫటాఫట్ రెడీ చేసుకునే స్వీట్

ఇంటికి అతిథులు వచ్చినప్పుడు లేదా పండుగలు వచ్చినప్పుడు తక్కువ ఖర్చుతో, రుచికరమైన స్వీట్లను తయారు చేయాలనిపిస్తుంది. అలాంటి సమయాల్లో కంటికి అందంగా కనిపించే, కరకరలాడుతూ, జ్యూసీగా ఉండే స్వీట్లను సులభంగా ఇంట్లోనే తయారు చేసుకోవచ్చు. దీనికి అవసరమైన పదార్థాలు, తయారీ విధానం ఇక్కడ వివరించబడింది. ముందుగా ఒక ప్లేట్‌లో జల్లెడ పెట్టుకుని ఒకటిన్నర కప్పుల మైదాపిండిని వేయండి. దీనికి పావు స్పూను ఉప్పును కలిపి బాగా జల్లించాలి. జల్లించిన తర్వాత పిండంతా ఒకసారి బాగా కలిపి, కొంచెం కొంచెంగా నీళ్లు పోసుకుంటూ పిండిని పూరీ పిండిలా గట్టిగా కలుపుకోవాలి. పిండి మరీ జారుగా లేదా మరీ గట్టిగా ఉండకూడదు. స్వీట్ గుల్లగా రావాలంటే పిండిని బాగా ఒత్తుతూ కలపాలి. పిండిని కలిపిన తర్వాత మూత పెట్టి పావుగంట పాటు బాగా నాననివ్వాలి.

ఈలోగా, స్టవ్ మీద ఒక గిన్నె పెట్టి ఒకటిన్నర కప్పుల పంచదార, ఒక కప్పు నీళ్లు పోసి మంటను మీడియం ఫ్లేమ్‌లో ఉంచాలి. పంచదార పూర్తిగా కరిగే వరకు కలుపుతూ ఉండాలి. పాకం మరుగుతున్నప్పుడు, ఒక స్పూను పాలు పోసి బాగా కలిపితే పాకంలోని మలినాలు తొలగిపోతాయి. నానిన పిండిని పలుచటి రోటీల్లా ఒత్తుకుని, వాటిపై నెయ్యి లేదా నూనె రాసి మళ్లీ మడతలు పెట్టి కావలసిన ఆకారంలో కత్తిరించుకోవాలి. ఈ ముక్కలను బంగారు రంగు వచ్చేవరకు నూనెలో వేయించి, వేడి పాకంలో వేసి కాసేపు నాననివ్వాలి. ఇలా చేసుకుంటే నోరూరించే, కరకరలాడే స్వీట్స్ సిద్ధమవుతాయి.

మాజీ ఉపరాష్ట్రపతి నచ్చి, మెచ్చిన ఆరోగ్యకరమైన ‘వాసెన పోలి’ ఎలా చేయాలంటే..