చికెన్, మటన్, చేపలు.. ఎందులో కొవ్వు తక్కువ ఉంటుంది..? ప్రోటీన్ ఎక్కువ ఉంటుందో తెలుసుకోండి..

మానవ శరీరానికి అత్యంత అవసరమైన ముఖ్యమైన పోషకాలలో ప్రోటీన్ ఒకటి. ఇది కేవలం కండరాలకు బలాన్ని అందించడమే కాకుండా శారీరక ఎదుగుదలకు, కణాల మరమ్మతుకు ఎంతగానో సహాయపడుతుంది. సాధారణంగా ఒక వ్యక్తి రోజుకు సగటున 50 గ్రాముల ప్రోటీన్ అవసరమవుతుంది. అయితే ఈ పరిమాణం అనేది వారి లింగం, శారీరక శ్రమ, ఆరోగ్య స్థితిని బట్టి మారుతుంటుంది. శరీరానికి అవసరమైన ప్రోటీన్‌ను అందించడానికి మనం రోజువారీగా తీసుకునే ఆహారమే అత్యంత ఉత్తమమైన, సహజమైన మార్గం. శాకాహారులకు పనీర్, సోయాబీన్ వంటి పదార్థాలు ప్రోటీన్‌ను అందిస్తున్నప్పటికీ, మాంసాహారం విషయానికి వస్తే మాత్రం చాలా మంది చికెన్, మటన్, చేపలను ఉత్తమ వనరులుగా భావిస్తారు. అయితే ఈ మూడింటిలో ప్రోటీన్ పరంగా ఏది అత్యంత సురక్షితమైనది, ఏది బెస్ట్ ఆప్షన్ అనే గందరగోళం చాలా మందిలో ఉంటుంది.

మటన్: ప్రోటీన్ ఎక్కువ.. కొవ్వు ఇంకా ఎక్కువ..

మటన్‌ను చాలా కాలంగా ఒక బలమైన ప్రోటీన్ వనరుగా పరిగణిస్తున్నారు. ఇందులో ప్రోటీన్‌తో పాటు కొవ్వు కూడా చాలా అధిక మొత్తంలో ఉంటుంది. మటన్‌ను అధికంగా తీసుకోవడం వల్ల శరీర బరువు, కేలరీల వినియోగం విపరీతంగా పెరిగిపోతుంది. ఇది రక్తంలో చక్కెర స్థాయిలను, ట్రైగ్లిజరైడ్స్, కొలెస్ట్రాల్, ఎల్‌డీఎల్ స్థాయిలను పెంచుతుంది. అదనంగా మటన్‌లోని అధిక కొవ్వు శాతం కాలేయం ఆరోగ్యంపై తీవ్ర ప్రతికూల ప్రభావాన్ని చూపుతుందని నిపుణులు హెచ్చరిస్తున్నారు. కాబట్టి దీనిని చాలా పరిమిత పరిమాణంలోనే తీసుకోవడం మంచిది.

కోడి మాంసం: ఫిట్‌నెస్ ప్రియుల మొదటి ఛాయిస్..

మటన్‌తో పోలిస్తే చికెన్‌ను తక్కువ కొవ్వు గల మాంసం అని చెప్తారు. అంటే ఇందులో ప్రోటీన్ కంటెంట్ ఎక్కువగా ఉండి, కొవ్వు పదార్థాలు చాలా తక్కువగా ఉంటాయి. అందుకే జిమ్‌కు వెళ్లేవారు, ఫిట్‌నెస్ ప్రియులు చికెన్‌ను ఎక్కువగా ఇష్టపడతారు. ఇందులో కేలరీలు, సంతృప్త కొవ్వు తక్కువగా ఉంటాయి. చికెన్‌లో కార్బోహైడ్రేట్లు, ఫైబర్ అస్సలు ఉండవు. అందువల్ల కేవలం ప్యూర్ ప్రోటీన్ ఆశించేవారికి ఇది ఒక అద్భుతమైన ఎంపికగా మారుతోంది.

ఈ మూడింటిలో ఏది బెస్ట్?

ప్రోటీన్ లభ్యత, ఆరోగ్య రక్షణ విషయానికి వస్తే.. చికెన్, చేపలు రెండూ కూడా అద్భుతమైన, సురక్షితమైన ఎంపికగా నిలుస్తాయి.

బరువు అదుపులో ఉంటూ శక్తి కావాలంటే: మీరు మీ శరీర బరువును పూర్తిగా అదుపులో ఉంచుకుంటూనే, బాడీని మరింత శక్తివంతంగా మార్చుకోవాలనుకుంటే చికెన్ ఒక బెస్ట్ ఆప్షన్. ఇది శరీరానికి అవసరమైన ప్రోటీన్‌ను అందించడమే కాకుండా గుండె, మెదడు ఆరోగ్యానికి అవసరమైన అదనపు పోషణను కూడా చేకూరుస్తుంది.

మటన్ ప్రియులు గుర్తుంచుకోవాల్సింది: మటన్ ద్వారా కూడా ప్రోటీన్ లభించినప్పటికీ, దానిలోని అధిక కొవ్వుల కారణంగా గుండె జబ్బులు, కొలెస్ట్రాల్ ముప్పు పొంచి ఉంటుంది. అందుకే మటన్‌ను ఎప్పుడైనా పరిమిత పరిమాణంలో మాత్రమే తీసుకోవాలని శాస్త్రీయ వర్గాలు గట్టిగా సూచిస్తున్నాయి.

కాగా శరీరానికి ప్రోటీన్ కావాలనే నెపంతో కొవ్వులు ఎక్కువగా ఉండే మాంసాహారాన్ని అతిగా తిని రోగాల బారిన పడకూడదు. కాబట్టి హెల్తీగా ఉంటూ కండరాలకు బలాన్ని ఇవ్వాలనుకుంటే చికెన్, చేపల తినడం ఉత్తమమని వైద్య నిపుణులు స్పష్టం చేస్తున్నారు.