Chicken: వండే ముందు చికెన్ కడుగుతున్నారా..? ఈ నిజాలు తప్పక తెలుసుకోండి

చికెన్ అనేది ప్రపంచవ్యాప్తంగా.. ముఖ్యంగా భారతదేశంలో ఎంతో మంది నాన్ వెజ్ ప్రియులకి ఇష్టమైన ఆహారం. వారాంతాల్లో, పండుగలు, లేదా ప్రత్యేక సందర్భాలలో చికెన్ వంటకాలు లేకుండా భోజనం అసంపూర్ణంగా భావిస్తారు. అయితే, చాలామంది వంటకు ముందు పచ్చి చికెన్‌ను శుభ్రంగా, ఒకటి రెండు సార్లు కడగడం అలవాటుగా పెట్టుకుంటారు. ఈ సాధారణ అలవాటు వెనుక తీవ్రమైన ఆరోగ్య ప్రమాదాలు పొంచి ఉన్నాయని నిపుణులు హెచ్చరిస్తున్నారు. చికెన్ కడగడం వల్ల ఎలాంటి అనారోగ్యాలు వస్తాయి.. వాటిని ఎలా నివారించవచ్చో తెలుసుకుందాం.

ప్రమాదకరమైన బ్యాక్టీరియా వ్యాప్తి:

పచ్చి చికెన్‌లో క్యాంపిలోబాక్టర్ (Campylobacter), సాల్మోనెల్లా (Salmonella) వంటి అనేక ప్రమాదకరమైన బ్యాక్టీరియాలు సహజంగా ఉంటాయి. చికెన్‌ను పంపు నీటి కింద ఉంచి కడిగినప్పుడు, నీటి ప్రెజర్ వల్ల ఈ బ్యాక్టీరియా క్రిములతో కూడిన చిన్న చిన్న నీటి తుంపర్లు గాలిలోకి ఎగిరి, సింక్ పరిసర ప్రాంతాల్లో, కౌంటర్‌టాప్‌లపై, ఇతర వంట సామాగ్రిపై, చివరికి వ్యక్తి దుస్తులపై కూడా వ్యాపిస్తాయి. వంటగదిలో ఈ బ్యాక్టీరియాలు వ్యాపించిన తర్వాత, ఆహారాన్ని తయారుచేసేటప్పుడు, వాటిని తాకిన చేతులతో ఇతర ఆహార పదార్థాలను ముట్టుకోవడం వల్ల క్రాస్ కంటామినేషన్ జరుగుతుంది. ఇది ఆహార సంబంధిత వ్యాధుల బారిన పడేలా చేస్తుంది.

ఆస్ట్రేలియన్ ఫుడ్ సేఫ్టీ సంస్థ పరిశోధనలు:

ఆస్ట్రేలియన్ ఫుడ్ సేఫ్టీ సంస్థ (Australian Food Safety organisation) విడుదల చేసిన నివేదికల ప్రకారం.. ప్రతి ఏటా ప్రపంచవ్యాప్తంగా 2,20,000 కు పైగా క్యాంపిలోబాక్టర్, సాల్మోనెల్లా కేసులు నమోదవుతున్నాయి. వీటిలో దాదాపు 50,000 కేసులు మాంసం, మాంస ఉత్పత్తుల ద్వారానే వస్తున్నట్లు అంచనా. వంటకు ముందు చికెన్‌ను కడగడం వల్ల ఈ బ్యాక్టీరియాలు ఎక్కువగా వ్యాప్తి చెందుతున్నాయని, వంట ఉష్ణోగ్రత కంటే కూడా ఇది అధిక ప్రమాదకరమని నిపుణులు స్పష్టం చేస్తున్నారు. బ్యాక్టీరియా వ్యాప్తికి ఈ క్రాస్ కంటామినేషనే ప్రధాన కారణమని వారు వివరిస్తున్నారు.

సురక్షితమైన వంట పద్ధతులు, జాగ్రత్తలు:

పచ్చి చికెన్‌ను కడగడం వల్ల ఇన్ని ప్రమాదాలు ఉన్నప్పుడు, పూర్తిగా కడగకుండా ఎలా వండాలి అనే ప్రశ్న తలెత్తవచ్చు. నిపుణులు కొన్ని సూచనలు చేస్తున్నారు:

కడగాల్సిన అవసరం లేదు: చాలా సందర్భాలలో, ప్యాక్ చేసిన చికెన్‌ను కడగాల్సిన అవసరం ఉండదు. వంట చేసేటప్పుడు అధిక ఉష్ణోగ్రత ఈ బ్యాక్టీరియాలను నాశనం చేస్తుంది.

ఒకవేళ అపరిశుభ్రంగా ఉంటే: చికెన్ చూడటానికి అపరిశుభ్రంగా అనిపిస్తే, దాన్ని కడగడానికి కొన్ని జాగ్రత్తలు తీసుకోవాలి. సింక్ అడుగున, తక్కువ నీటి ప్రెజర్‌తో (నీటి తుంపర్లు ఎగరనంత తక్కువగా) ఒకసారి మాత్రమే కడగాలి.

చేతుల శుభ్రత ముఖ్యం: చికెన్‌ను తాకిన తర్వాత, దానిని కడిగిన తర్వాత వెంటనే మీ చేతులను సబ్బు, గోరువెచ్చని నీటితో కనీసం 20 సెకన్ల పాటు శుభ్రంగా కడుక్కోవాలి.

పరిసరాల శుభ్రత: చికెన్ సిద్ధం చేసిన ప్రదేశాన్ని, కత్తిపీటలను, పాత్రలను వేడి నీరు, సబ్బుతో శుభ్రంగా కడగాలి. క్రాస్ కంటామినేషన్ నివారించడానికి పచ్చి చికెన్‌ను ఇతర ఆహార పదార్థాల నుండి వేరుగా ఉంచాలి.

సరిగ్గా వండటం: చికెన్‌ను పూర్తిగా ఉడకబెట్టడం చాలా ముఖ్యం. లోపల ఎర్రగా లేకుండా, తెల్లగా అయ్యేంత వరకు ఉడికించాలి. దీనివల్ల బ్యాక్టీరియాలు నశిస్తాయి.

ఈ జాగ్రత్తలు పాటిస్తేనే చికెన్ వినియోగం సురక్షితం. నిర్లక్ష్యం చేస్తే తీవ్రమైన ఆహార సంబంధిత వ్యాధులు, ఇతర అనారోగ్య పరిస్థితులు తలెత్తే అవకాశం ఉంది. మీ ఆరోగ్యం, మీ కుటుంబ ఆరోగ్యం మీ చేతుల్లోనే ఉంది కాబట్టి, చికెన్‌ను వండేటప్పుడు తగిన జాగ్రత్తలు పాటించాలని ఆహార నిపుణులు సూచిస్తున్నారు.

మరిన్ని లైఫ్‌స్టైల్ వార్తల కోసం ఇక్కడ క్లిక్ చేయండి..