మీకూ ఇలాంటి ఫ్రెండ్ ఉన్నాడా? అపాయింట్‌మెంట్లు, ప్లాన్స్ అవసరం లేని స్నేహమా

నేటి ఆధునిక కాలంలో స్నేహాల పద్ధతులు చాలా మారిపోయాయి. “త్వరలో కలుద్దాం” అనే మెసేజ్‌లు, వారాల ముందే ప్లాన్ చేసుకునే షెడ్యూల్స్ ఎక్కువైపోయాయి. వీకెండ్‌లో అందరికీ కుదిరే సమయాన్ని సెట్ చేసుకోవడమే ఒక పెద్ద టాస్క్‌గా మారింది. అందరూ తమ తమ పనుల్లో బిజీగా మారిపోయిన ఈ రోజుల్లో.. ఎటువంటి అపాయింట్‌మెంట్లు లేకుండా, ఎప్పుడు పడితే అప్పుడు కలవగలిగే ఒక స్నేహితుడు ఉండటం చాలా అవసరం. ప్రస్తుతం ఇంటర్నెట్ ప్రపంచంలో ఇలాంటి స్నేహానికి ఒక కొత్త పేరు పెట్టారు, అదే ‘డోర్‌బెల్ ఫ్రెండ్’ (Doorbell Friend).

ఎవరు ఈ ‘డోర్‌బెల్ ఫ్రెండ్’?

రచయిత మాట్ రిట్టర్ ఈ పదాన్ని ప్రాచుర్యంలోకి తెచ్చారు. ఆయన మాటల్లో చెప్పాలంటే.. “మన అనుమతి అవసరం లేకుండా, మన దైనందిన జీవితాన్ని ఎంతో ప్రేమగా డిస్టర్బ్ చేయగల వ్యక్తి” అని అర్థం. ఈ డిజిటల్ యుగంలో మనం ఫోన్ చేయాలన్నా మెసేజ్ చేసి అడుగుతాం, కలవాలన్నా అవతలి వారికి ఇబ్బంది కలుగుతుందేమోనని అతిగా ఆలోచిస్తుంటాం. కానీ, ఈ డోర్‌బెల్ ఫ్రెండ్స్ విషయంలో అలాంటి రూల్స్ ఏవీ ఉండవు.

వీరు ఎలాంటి వారంటే.. మనం ఏదైనా పని మీద బయటకు వెళ్తున్నప్పుడు దారిలో వారి ఇల్లు ఉంటే ఒక్క నిమిషం ఆగి పలకరించే వాళ్లు. గ్రాండ్ డిన్నర్ల కంటే నైట్ డ్రైవ్‌లో ఐస్‌క్రీమ్ తినడానికో, రోడ్డు పక్కన చాయ్ తాగడానికో ఇష్టపడే వాళ్లు. వారితో కలిసి కేవలం 20 నిమిషాలు కూరగాయల మార్కెట్‌కు వెళ్లినా కూడా అది ఒక క్వాలిటీ టైమ్‌లా అనిపిస్తుంది. వారి ముందు మనం ఎలా ఉన్నా పర్లేదు, ఎలాంటి నటన అవసరం లేదు. అందుకే ఈ స్నేహం ఎంతో సహజంగా, హాయిగా సాగిపోతుంది.

ఈ స్నేహం ఎందుకు అంత ప్రత్యేకం?

ఇలాంటి రిలేషన్స్‌లో ఎలాంటి ఒత్తిడి, అంచనాలు ఉండవు. బంధం చాలా లోతుగా ఉంటుంది. ఒక స్నేహితుడిని కలవడానికి ప్రత్యేకంగా ఒక సందర్భాన్ని సృష్టించడం కంటే, మన రోజువారీ జీవితంలో జరుగుతున్న పనుల్లోనే వారిని కూడా భాగం చేయడం చాలా సులభం. అందుకే ఇలాంటి స్నేహితులు తరచూ కలుస్తూ ఉంటారు.

మన కళ్ల ముందే ఒకరు వంట చేస్తుంటే కిచెన్ కౌంటర్ మీద కూర్చుని ముచ్చట్లు చెప్పుకోవడం, అర్ధరాత్రి ఆకలేస్తే మ్యాగీ వండుకుని తినడం వంటి చిన్న చిన్న పనులే జీవితాంతం గుర్తుండిపోయే ‘కోర్ మెమరీస్’గా మిగిలిపోతాయి. హడావుడితో కూడిన నేటి జీవనశైలిలో మనల్ని మనం కోల్పోకుండా ఉంచడానికి ఈ తక్కువ శ్రమతో కూడిన సాన్నిహిత్యం ఎంతో అవసరం.

దూరం పెరిగినా స్నేహం మారదు

అయితే, అందరు మంచి స్నేహితులూ డోర్‌బెల్ దూరంలోనే ఉండాలని రూల్ లేదు. ఇలాంటి స్నేహాలకు ఇళ్లు దగ్గరగా ఉండటం ఒక ప్లస్ పాయింట్ అవుతుంది. కొందరు స్నేహితులు మైళ్ల దూరంలో ఉన్నా, ఎప్పుడు అవసరమైనా అండగా నిలబడతారు. సంవత్సరాల తర్వాత కలిసినా నిన్ననే విడిపోయినంత ఆత్మీయంగా మాట్లాడుకుంటారు. కాబట్టి రోజువారీ పరిచయం మాత్రమే స్నేహానికి కొలమానం కాదు. అయినప్పటికీ, ఎలాంటి ఫార్మాలిటీస్ లేని ఒక డోర్‌బెల్ ఫ్రెండ్ మన పక్కన ఉండటం ఒక విలాసమనే చెప్పాలి.