45 ఏళ్ల గరిష్ఠానికి నిరుద్యోగ శాతం

దేశంలో నిరుద్యోగ శాతం భారీగా పెరిగిపోతోంది. కోట్ల మంది విద్యావంతులు కనీసం పని లేక ఖాళీగా ఉంటున్నారు. నేష‌న‌ల్ శాంపిల్ స‌ర్వే తాజాగా విడుదల చేసిన నివేదిక ప్రకారం దేశంలో నిరుద్యోగ‌శాతం 6.1గా న‌మోదు అయ్యింది. గ‌త 45 ఏళ్లలో ఇదే అత్యధికం కావడం గమనార్హం. 1972-73 కన్నా నిరుద్యోగ శాతం ఇప్పుడే ఎక్కువ‌గా ఉంద‌ని స్టాటిస్టికల్ రిపోర్ట్ పేర్కొంది.

2011-12లో నిరుద్యోగ శాతం 2.2గా ఉండ‌గా, 2017-18 నాటికి 6.1 శాతానికి పెరిగింది. జాతీయ గణాంక కమిషన్ జూలై 2017 నుంచి 2018 జూలై మ‌ధ్య ఈ వివరాలు సేక‌రించి దేశంలోని నిరుద్యోగ శాతాన్ని లెక్కించింది. గ‌త డిసెంబ‌ర్‌లో నివేదిక‌ను రూపొందించింది. ప్ర‌ధాని మోదీ నోట్ల ర‌ద్దు చేప‌ట్టిన త‌ర్వాత ఉద్యోగ నియామ‌కాల‌పై మొద‌టిసారి స‌ర్వే చేప‌ట్టారు. ఈ నివేదిక ప్రకారం గ్రామీణ ప్రాంతాల్లో నిరుద్యోగ శాతం 17.4 శాతం పెరిగిన‌ట్లు తేలింది… ప‌ట్ట‌ణాల్లో 18.7 శాతంగా న‌మోదు అయ్యింది. కేంద్ర ప్రభుత్వం తాత్కాలిక బ‌డ్జెట్‌కు ముందు ఈ నివేదిక‌ను రిలీజ్ చేసింది.