వంటింట్లో చప్పుడు వస్తుందని చూస్తే.. మిక్సీలో..

పాము పేరు చెబితేనే కొందరు భయపడతారు. ఈ మధ్య కాలంలో ఎక్కడ చూసినా పాముల బెడద ఎక్కువైంది. చెట్ల పొదలు, మురుగునీరు, పొలాలు వంటి ప్రాంతాల్లో ఉండే పాములు ఇప్పుడు ఏకంగా ఇండ్లలో ప్రత్యక్ష మవుతున్నాయి. ఓ ఇంట్లో మిక్సీ జార్‌లో పాము పిల్ల బుసలు కొడుతూ కనిపించింది. అది చూసిన ఇంట్లోని వారు ఉలిక్కిపడ్డారు. తమిళనాడులోని అన్నానగర్ తునికి చెందిన మురుగన్ అనే పూల వ్యాపారి ఇంట్లో ఈ ఘటన చోటుచేసుకుంది. వ్యాపారి భార్య సెల్వి ఇంట్లో వంట చేస్తోంది. అదే సమయంలో వంట గది నుంచి ఒక్కసారిగా ఏదో పెద్ద శబ్ధం వినిపించింది. వంట గదిలో చూసే సరికి ఎక్కడో మూలన పాము శబ్దం వస్తున్నట్లు అనిపించింది. దీంతో మురుగన్ పాములు పట్టే కన్నన్ అనే వ్యక్తికి సమాచారం అందించాడు. అక్కడికి వచ్చిన అతను వంట గదిలో ఉన్న పాత్రలను చూస్తుండగా మిక్సి జార్‌లో పాము పిల్ల కనిపించింది. పాముని పట్టుకున్న కన్నన్ దాన్ని దూరంగా తీసుకెళ్లి అటవీ ప్రాంతంలో వదిలేశాడు.