ప్రధాని కంటే నటుడిగా మోదీ ‘ది బెస్ట్’.. ప్రియాంకా గాంధీ సెటైర్!

సార్వత్రిక ఎన్నికల ప్రచారం తుది దశకు చేరుకున్న వేళ కాంగ్రెస్, బీజేపీల మధ్య మాటల యుద్ధం తారాస్థాయికి చేరుకుంది. తాజా ఎన్నికల ప్రచారంలో కాంగ్రెస్ ఇన్‌ఛార్జ్ ప్రియాంక గాంధీ నరేంద్ర మోదీపై తీవ్ర విమర్శలు చేశారు. ప్రపంచంలోనే అత్యుత్తమ నటుడు ప్రధాని నరేంద్ర మోదీ అని ఆమె విమర్శించారు. దేశ ప్రజలు ఆయనకు బదులు అమితాబ్ బచ్చన్ ను ప్రధానిగా ఎన్నుకుని ఉండాల్సిందని సెటైర్ వేశారు. శుక్రవారం ఉత్తరప్రదేశ్‌లోని మీర్జాపూర్‌లో నిర్వహించిన ఎన్నికల ర్యాలీలో ప్రియాంక ఈ వ్యాఖ్యలు చేశారు.

మరోవైపు సలెంపూర్ లో నిర్వహించిన ఎన్నికల ర్యాలీలోనూ మోదీపై ప్రియాంక తీవ్ర విమర్శలు గుప్పించారు. అభివృద్ధి కంటే.. పబ్లిసిటీ, అబద్దాలతోనే మోదీ లబ్ది పొందాలని చూస్తున్నారని ఆమె ఆరోపించారు. వారణాసి ప్రజలకు మోదీ ఏమి చేసారో చెప్పాలని ప్రియాంక మండిపడ్డారు. నాయకుడు అనేవాడు ప్రజలకు నిజాలు చెప్పాలని.. కానీ మోదీ మాత్రం అవాస్తవాలతో రాజకీయాలు చేస్తున్నారని విమర్శించారు. మోదీ ప్రచారంపై ఎక్కువ దృష్టి సారించడం తప్ప ప్రజలకు ఏమి చేయలేదని ఆమె స్పష్టం చేశారు.