Leap Day: ఆశ్చర్యం.. వారి పిల్లలిద్దరూ ఫిబ్రవరి 29నే పుట్టారు!
లీప్ డేలో బిడ్డకు జన్మనివ్వడం చాలా అరుదైన సంఘటన. అయితే ఓ జంట మొదటి బిడ్డనే కాకుండా రెండో బిడ్డను కూడా లీపు సంవత్సరంలో అదే తేదీన జన్మనిచ్చి అందరినీ ఆశ్చర్యంలో ముంచెత్తారు. మరో చిత్రం ఏంటంటే
Updated on: Mar 03, 2020 | 10:58 PM
Leap Day: లీప్ డేలో బిడ్డకు జన్మనివ్వడం చాలా అరుదైన సంఘటన. అయితే ఓ జంట మొదటి బిడ్డనే కాకుండా రెండో బిడ్డను కూడా లీపు సంవత్సరంలో అదే తేదీన జన్మనిచ్చి అందరినీ ఆశ్చర్యంలో ముంచెత్తారు. మరో చిత్రం ఏంటంటే ఇద్దరు బిడ్డలు కూడా సిజేరియన్తో కాకుండా సహజ పద్ధతిలోనే జన్మించారు.
అమెరికాలోని న్యూయార్క్కు చెందిన లిండ్సే డెమ్చాక్ 2016లో తన కుమారుడు ఒమ్రీకి ఫిబ్రవరి 29న జన్మనిచ్చింది. తాజాగా తన రెండో బిడ్డ స్కౌట్కు కూడా 2020 లీపు సంవత్సరంలో ఫిబ్రవరి 29నే జన్మనిచ్చింది. అయితే, ఈ రెండు ప్రసవాలు యాదృచ్ఛికంగా చోటుచేసుకున్నవే కావడం గమనార్హం.
అయితే.. చిత్రంగా ఫిబ్రవరి 29 న బ్రూక్లిన్లోని కోనీ ఐలాండ్ ఆసుపత్రిలో లిండ్సేఆడ శిశువుకు జన్మనిచ్చింది. వైద్యులు చెప్పినట్లుగానే ఒమ్రీ లీపు సంవత్సరంలో ఫిబ్రవరి 29న జన్మించాడు. అయితే, స్కౌట్ మార్చి 4వ తేదీన పుట్టే అవకాశాలు ఉన్నాయని అంచనా వేశారు. ఈ సందర్భంగా లిండ్సే, ఆమె భర్త.. స్కౌట్ కూడా ఒమ్రీలా ఫిబ్రవరి 29న పుట్టదు కదా అని సరదాగా జోక్ చేసుకున్నారు. అయితే, వారి జోక్ నిజమైంది.
మరోవైపు, 2.1 మిలియన్ మందిలో కేవలం ఒకరికి మాత్రమే ఇలాంటి అద్భుతం సొంతం అని పేర్కొన్నారు. అయితే, ఏటా వీరి పుట్టిన రోజు కలిపే చేస్తారని మీరు అనుకుంటున్నారా? కానే కాదు. పెద్దవాడైన ఒమ్రీ ఫిబ్రవరి 28న, స్కౌట్కు మార్చి 1న పుట్టిన రోజు జరుపుతారు. నాలుగేళ్లకు ఒకసారి వచ్చే ఫిబ్రవరి 29న ఇద్దరికి కలిపి ధూమ్ ధామ్గా పుట్టిన రోజు వేడుకలు జరుపుతారు.
