యాక్టివ్‌గా కొండా దంపతులు.. మరి కూతురు సీటేది?

‘‘అమె అక్కడ… నేనిక్కడ.. కార్యకర్తలకు కొండంత అండగా ఉంటాం‘‘ అంటూ కొండా దంపతులు పార్టీశ్రేణులకు భరోసా ఇస్తున్నారు. అజ్ఞాతం వీడి జనం మధ్యలో హడావుడి చేస్తున్న కొండా కపుల్… ఎన్నికల వేళలో ఇప్పుడు మళ్ళీ చర్చగా మారారు.. వీరిద్దరు సరే.. మరి కూతురి సీటెక్కడ అని అడుగుతున్నారు కొండా అనుచరులు.

వరంగల్ ఫైర్ బ్రాండ్‌గా పేరున్న కొండా సురేఖ.. మొన్నటి ఎన్నికల తరువాత నుంచి జిల్లాలో మౌనంగా ఉన్నారు. స్థానిక సంస్థల ఎన్నికల్లోనూ కొండా దంపతుల ప్రభావం ఎక్కడా కనిపించలేదు. దీంతో కార్యకర్తల మధ్య తీవ్రస్థాయిలో చర్చలు జరిగాయి. వారిని నమ్ముకున్న అనుచరులు తీవ్ర నిరుత్సాహంలో మునిగి పోయారు.

రాజకీయాల్లో కొండా దంపతులకు నిలకడ లేదన్న విమర్శలు కూడా వినిపించాయి. పార్టీలు మారడం… నియోజకవర్గాలు మార్చడంతో అసలు వీరు సొంత నియోజక వర్గం ఎక్కడ? వచ్చే ఎన్నికల్లో ఏ నియోజకవర్గం నుండి పోటీచేస్తారు? ఏపార్టీ నుండి పోటీ చేస్తారు? అనే ప్రశ్నలు అనుచరుల్లో మొదలయ్యాయి. ఈ క్రమంలో మున్సిపల్ ఎన్నికలను ఓన్ చేసుకోవడానికి మళ్లీ రంగంలోకి దిగారు కొండా దంపతులు. గతవారం రోజుల నుండి ఫుల్ రీ-చార్జ్ అయి ప్రజల దర్శనమిస్తున్నారు. కొత్త-పాత కార్యకర్తల ఇళ్ల వద్దకు వెళ్లి వారిని పలకరిస్తున్నారు.

పలకరింపులు సరే వీరిలో ఎవరు ఏ నియోజకవర్గం నుండి పోటీ చేస్తారు… వీరిని నమ్ముకున్న వారికి ఎలా అండగా నిలుస్తారనే ప్రశ్నలు తాజాగా మొదలయ్యాయి. ఈ నేపద్యంలో కొండా మురళీధర్ రావు స్పష్టత ఇచ్చారు. వరంగల్ తూర్పు – భూపాలపల్లి ఈ రెండు నియోజకవర్గాలు తమవే అని ప్రకటించారు. వచ్చే ఎన్నికల్లో కొండా సురేఖ వరంగల్ తూర్పు నియోజక వర్గం నుండి పోటీచేస్తారని, తాను భూపాలపల్లి నియోజకవర్గం నుండి పోటీ చేస్తానని ప్రకటించారు.

రొటీన్ కు భిన్నంగా కార్యకర్తలతో మమేకమవుతున్న కొండా సురేఖ తూర్పు నియోజకవర్గంలో సెల్ఫీలతో సందడిచేశారు. 24 గంటలు తమ ఇంటి తలుపులు తెరిచే ఉంటాయని ప్రకటించారు. ప్రస్తుతం జరుగుతున్న మున్సిపల్ ఎన్నికల్లో తమ సత్తా చాటుతామన్న కొండా దంపతులు. త్వరలో రాబోతున్న వరంగల్ మున్సిపల్ కార్పొరేషన్ ఎన్నికల్లో తమ దమ్ము చూపిస్తామన్నారు. వరంగల్ తూర్పు నియోజకవర్గంలో 23 డివిజన్లలో గెలుస్తామని ధీమా వ్యక్తం చేశారు. మొత్తం మీద ఇంతకాలం మౌనంగా ఉన్న కొండా దంపతులు… ఇప్పుడు మున్సిపల్ ఎన్నికల వేళలో మరోసారి చర్చగా మారారు. వీరిద్దరి సీట్లు రిజర్వేషన్ చేసుకున్నారు సరే… మరి వీరి రాజకీయ వారసురాలిని ఎక్కడ నుంచి పోటీ చేస్తారనే అంశం ఇప్పుడు ఆసక్తికర చర్చగా మారింది.