International Yoga Day సందర్భంగా దేశవ్యాప్తంగా 1,000 ఉచిత యోగా సెషన్లు: ఈషా ఫౌండేషన్

అంతర్జాతీయ యోగా దినోత్సవం సందర్భంగా ఈషా ఫౌండేషన్ దేశవ్యాప్తంగా సుమారు 1,000 ఉచిత యోగా, ధ్యాన సెషన్లు నిర్వహించనుంది. ఈ కార్యక్రమాల్లో కార్పొరేట్ సంస్థలు, విద్యాసంస్థలు, వైద్య సంస్థలు, ప్రభుత్వ, రక్షణ విభాగాలు, కమ్యూనిటీ కేంద్రాల నుంచి దాదాపు 50 వేల మంది పాల్గొనే అవకాశం ఉందని సంస్థ తెలిపింది.

ఈ సందర్భంగా సద్గురు మాట్లాడుతూ, “యోగా అనేది కేవలం శారీరక వ్యాయామం మాత్రమే కాదు. ప్రతి వ్యక్తి తన అత్యున్నత సామర్థ్యాన్ని చేరుకునేలా చేసే సంపూర్ణ ప్రక్రియ” అని పేర్కొన్నారు.

ఈ ఉచిత సెషన్ల ద్వారా పాల్గొనేవారికి సులభమైన, ప్రభావవంతమైన యోగాభ్యాసాలు, ధ్యాన పద్ధతులను నేర్పించనున్నారు. వీటిని రోజువారీ జీవితంలో భాగం చేసుకోవడం ద్వారా శారీరక ఆరోగ్యం, మానసిక ప్రశాంతత, జీవన నాణ్యత మెరుగుపడుతుందని ఈషా ఫౌండేషన్ తెలిపింది. ఈ కార్యక్రమాలను ఈషా శిక్షణ పొందిన స్వచ్ఛంద సేవకులు, ఉపాధ్యాయులు నిర్వహిస్తారు.

‘మిరాకిల్ ఆఫ్ మైండ్’కు మరో ఆరు భాషలు

అంతర్జాతీయ యోగా దినోత్సవాన్ని పురస్కరించుకుని సద్గురు రూపొందించిన ‘మిరాకిల్ ఆఫ్ మైండ్’ ఉచిత ధ్యాన యాప్‌లో ఇప్పటికే అందుబాటులో ఉన్న ఆరు భాషలకు అదనంగా గుజరాతీ, కన్నడ, మలయాళం, బెంగాలీ, ఇటాలియన్, నేపాలీ భాషలను చేర్చనున్నారు.

ఏడు నిమిషాల నిడివి గల ఈ మార్గదర్శక ధ్యానం ప్రపంచవ్యాప్తంగా ఇప్పటికే 35 లక్షలకు పైగా క్రియాశీల వినియోగదారులను చేరుకుంది. యోగాపై ముందస్తు అనుభవం లేకపోయినా ఎవరైనా ఈ ధ్యానాన్ని సులభంగా ఆచరించవచ్చని సంస్థ పేర్కొంది.

బెంగళూరు, కోయంబత్తూరులో ప్రత్యేక కార్యక్రమాలు

దేశవ్యాప్తంగా నిర్వహించే కార్యక్రమాలతో పాటు ఈషా కేంద్రాల్లో కూడా ప్రత్యేక యోగా దినోత్సవ వేడుకలు నిర్వహించనున్నారు.

బెంగళూరులోని సద్గురు సన్నిధిలో ఆదియోగి సన్నిధిలో జరిగే కార్యక్రమంలో ఎన్‌సీసీ క్యాడెట్లు, బీఎస్‌ఎఫ్ జవాన్లు, విద్యార్థులు, గ్రామీణులు, స్వచ్ఛంద సేవకులు, ప్రజలు కలిపి 2,300 మందికి పైగా పాల్గొననున్నారు.

అదే విధంగా కోయంబత్తూరులోని ఈషా యోగా సెంటర్లో 700 మందికి పైగా యోగా, ధ్యాన సెషన్లలో పాల్గొంటారు. వీరిలో యంగ్ ఇండియన్స్ కోయంబత్తూరు చాప్టర్‌కు చెందిన 500 మంది విద్యార్థులు, సీఆర్‌పీఎఫ్‌కు చెందిన 200 మంది జవాన్లు ఉంటారు.

ఏడాదిలో 7 లక్షల మందికి ఉచిత యోగా

గత ఏడాది కాలంలో కోయంబత్తూరులోని ఈషా యోగా సెంటర్‌లో నిర్వహించిన ఉచిత యోగా, ధ్యాన కార్యక్రమాల ద్వారా 7 లక్షలకు పైగా సందర్శకులు ప్రయోజనం పొందినట్లు ఈషా ఫౌండేషన్ వెల్లడించింది.

ఈషా ఫౌండేషన్ గురించి

సద్గురు మార్గదర్శకత్వంలో మూడు దశాబ్దాలకుపైగా ఈషా ఫౌండేషన్ యోగా శాస్త్రాన్ని ప్రపంచవ్యాప్తంగా విస్తరిస్తోంది. ప్రపంచంలోని 400కు పైగా కేంద్రాలు, 1.7 కోట్లకు పైగా స్వచ్ఛంద సేవకుల సహకారంతో శారీరక, మానసిక, భావోద్వేగ, ఆధ్యాత్మిక శ్రేయస్సు కోసం వివిధ కార్యక్రమాలను నిర్వహిస్తోంది. యోగా, ధ్యాన కార్యక్రమాల ద్వారా లక్షలాది మంది ఆరోగ్యకరమైన, ఆనందమయమైన జీవనాన్ని పొందేందుకు ఈషా కృషి చేస్తోంది.