వాలంటీర్ల నియామకానికి విద్యార్హతలివే..!

రాష్ట్ర ప్రభుత్వ పధకాలు అర్హులకు అందేలా చూసేందుకు గ్రామాల్లో వాలంటీర్లను ఏర్పాటు చేయాలని ఆంధ్రప్రదేశ్ ప్రభుత్వం నిర్ణయం తీసుకుంది. ప్రభుత్వ పథకాలన్నీ గడప గడపకి చేరేలా ఈ గ్రామ వాలంటీర్లు పని చేస్తారు. నిరుద్యోగ సమస్యను అధిగమించడానికి గ్రామాల్లో ఉండే యువతను గ్రామ వాలంటీర్లుగా.. పట్టణాల్లో యువతను వార్డు వాలంటీర్లుగా నియమించేందుకు నూతన కేబినెట్‌లో నిర్ణయం తీసుకున్నారు. ఈ మేరకు మీడియాతో మంత్రి పేర్ని నాని వెల్లడించారు.

ఇక ఆగష్టు 15 నాటికీ భర్తీ అవ్వాల్సిన 4 లక్షల వాలంటీర్ల పోస్టులకు ప్రభుత్వం నోటిఫికేషన్ విడుదల చేసింది. ఈ పోస్టులకు ap.gov.in వెబ్‌సైట్‌లో జూలై నెలాఖరులోగా దరఖాస్తు చేసుకోవచ్చు. గిరిజన ప్రాంతాల్లో పని చేసేందుకు పదో తరగతి, గ్రామాల్లో వాలంటీర్లకు ఇంటర్, పట్టణాల్లో అయితే డిగ్రీ విద్యార్హతగా పేర్కొన్నారు. ప్రతి 50 ఇళ్లకు ఓ వాలంటీర్ చొప్పున ఉంటారని.. వారికి 5 వేల వేతనం అందుతుందని మంత్రి తెలిపారు.