పెళ్లి చేసుకోవాలనుకుంటే చేతిలో చిల్లిగవ్వలేదు ః ఆదిత్య నారాయణ్
ఏ దుర్ముహూర్తాన పుట్టిందో కానీ కరోనావైరస్ ప్రపంచాన్ని కకావికలం చేసేస్తోంది.. మనుషుల ప్రాణాలను హరించడమే కాదు.. ఆర్ధిక వ్యవస్థను అస్తవ్యస్తం చేస్తోంది.. వైరస్ వ్యాప్తిని నిరోధించడానికి ప్రభుత్వాలు లాక్డౌన్ విధించడం...
Updated on: Oct 15, 2020 | 11:46 AM
ఏ దుర్ముహూర్తాన పుట్టిందో కానీ కరోనావైరస్ ప్రపంచాన్ని కకావికలం చేసేస్తోంది.. మనుషుల ప్రాణాలను హరించడమే కాదు.. ఆర్ధిక వ్యవస్థను అస్తవ్యస్తం చేస్తోంది.. వైరస్ వ్యాప్తిని నిరోధించడానికి ప్రభుత్వాలు లాక్డౌన్ విధించడం ఓ విధంగా మేలు చేసినప్పటికీ దాని వల్ల కీడు కూడా జరిగింది.. ఎన్నో కుటుంబాలు వీధిన పడ్డాయి.. చేద్దామంటే పనులు లేవు.. చేతిలో చిల్లిగవ్వలేదు.. సామాన్యులే కాదు.. అంతో ఇంతో పేరు తెచ్చుకున్న సెలబ్రిటీలకు కూడా కష్టాలు తప్పడం లేదు.. ప్రముఖ బాలీవుడ్ సింగర్, టెలివిజన్ హోస్ట్ ఆదిత్య నారాయణ్ కూడా డబ్బులు లేక అవస్తలు పడుతున్నారు.. త్వరలో తన ప్రేయసి శ్వేతా అగర్వాల్ను పెళ్లి చేసుకోబోతున్నాడు కానీ పెళ్లి ఖర్చులకు అతడి దగ్గర డబ్బుల్లేవు.. నిజమే ..! లాక్డౌన్లో చేయడానికి పనుల్లేక ఖాళీగా ఉన్నాడు.. దాంతో పొదుపు చేసుకున్న సొమ్మంతా ఖర్చయ్యింది.. చివరాఖరికి సేవింగ్స్ కోసం మ్యూచువల్ ఫండ్స్లో పెట్టిన డబ్బును కూడా వెనక్కి తీసుకున్నాడు.. ప్రస్తుతం అతడి అకౌంట్లో 18 వేల రూపాయలే ఉన్నాయట! ఈ విషయాన్ని ఆదిత్య నారాయణే చెప్పుకొచ్చాడు.. ఈ నెల నుంచి పని చేయకపోతే మనుగడ కష్టమేనని ఆవేదన వ్యక్తం చేస్తున్నాడు.. బతకడానికి బైక్ను అమ్ముకోవాలేమోనని బాధగా చెప్పాడు.. మొత్తంగా మనం కఠినమైన పరిస్థితిని ఎదుర్కొంటున్నామని చెప్పిన ఆదిత్యనారాయణ్ త్వరలో మంచి రోజులు రావాలని కోరుకున్నాడు.
