మీ ఎయిర్ కూలర్ను ఏసీలా మార్చేయండి.. జస్ట్ 5 రూపాయలతో కూలింగ్ పెంచుకునే సింపుల్ ట్రిక్స్!
మండుతున్న ఎండలకు ఏసీ కొనే బడ్జెట్ అందరికీ ఉండకపోవచ్చు. అయితే, మీ ఇంట్లో ఉన్న ఎయిర్ కూలర్నే కొద్దిపాటి మార్పులతో ఏసీలా పనిచేసేలా చేయవచ్చు. అవును మీరు విన్నది నిజమే.. ఇందుకోసం మీరు పెద్దగా ఖర్చు చేయాల్సిన అవసరం కూడా లేదు. కేవలం 5 రూపాయల ఖర్చుతో మీ సాధారణ ఎయిర్ కూలర్ను ఏసీ (AC) లాగా మార్చి, గదిని తక్షణమే చల్లబరచడానికి కొన్ని స్మార్ట్ చిట్కాలు ఇక్కడ ఉన్నాయి.
Updated on: Apr 20, 2026 | 5:19 PM
బయట ఎండలు దంచికొడుతున్నాయి. ఉదయం 7 గంటల నుండి భానుడు తన ప్రతాపం చూపిస్తున్నాడు. ఇక మధ్యాహ్నం 12 దాటిందంటే ఉగ్రరూపమే. దీంతో ప్రజలు ఇళ్ల నుండి బయటకు రావాలంటేనే భయపడిపోతున్నారు. కూలర్లు, ఫ్యాన్లను పరుగులు పెట్టిస్తున్నారు. మండే ఎండలతో అందరికీ ఏసీలు కొనే స్థోమత ఉండదు. అందుకే చాలా మంది కూలర్లు ఉపయోగిస్తుంటారు. ఎయిర్ కూలర్ నుండి వచ్చే గాలి ఒక్కోసారి వేడిగా అనిపిస్తుంది. అలాంటి సందర్భాల్లో కూలర్ గాలినే ఏసీ స్థాయి కూలింగ్ పొందడానికి కొన్ని చిట్కాలు పాటిస్తే సరిపోతుంది. దీంతో మీరు ఇంట్లోనే ఊటీ, సిమ్లాలాంటి చల్లదనాన్ని ఆస్వాదిస్తారు. అదేలాగంటే…
ఐస్ వాటర్ మ్యాజిక్: కూలర్ ట్యాంక్లో సాధారణ నీటికి బదులుగా ఐస్ ముక్కలను (Ice Cubes) వేయండి. బయట 5 రూపాయలకు దొరికే ఐస్ ముక్కలు లేదా ఫ్రిజ్లోని ఐస్ వాడటం వల్ల కూలర్ నుండి వచ్చే గాలి ఏసీ లాగా చాలా చల్లగా ఉంటుంది.
ప్యాడ్ల శుభ్రత: కూలర్ చుట్టూ ఉండే గడ్డి (Wood wool) లేదా హనీకోంబ్ ప్యాడ్లలో దుమ్ము చేరితే నీటి ప్రవాహం తగ్గి, గాలి వేడిగా వస్తుంది. అందుకే వీటిని క్రమం తప్పకుండా శుభ్రం చేయాలి. ఒకవేళ ప్యాడ్లు పాతబడిపోతే, వాటిని మార్చడం వల్ల కూలింగ్ సామర్థ్యం పెరుగుతుంది.
క్రాస్ వెంటిలేషన్ (Cross Ventilation): చాలామంది ఏసీ లాగా గదిని పూర్తిగా మూసివేసి కూలర్ వేస్తారు. ఇది తప్పు. కూలర్ సమర్థవంతంగా పనిచేయాలంటే గదిలో గాలి ప్రసరణ ఉండాలి. కూలర్కు ఎదురుగా ఉండే కిటికీ లేదా తలుపును కొద్దిగా తెరిచి ఉంచితే, గదిలోని హ్యూమిడిటీ (తేమ) బయటకు వెళ్లిపోయి గది పొడిగా, చల్లగా ఉంటుంది.
ఎండ తగలకుండా జాగ్రత్త: కూలర్ను ఎప్పుడూ నీడలో లేదా ఎండ నేరుగా తగలని కిటికీ వద్ద ఉంచాలి. ఎండ నేరుగా పడితే కూలర్లోని నీరు త్వరగా వేడెక్కి, వేడి గాలిని ఇస్తుంది. కిటికీలకు మందపాటి తెరలు వాడటం ద్వారా కూడా గది ఉష్ణోగ్రతను తగ్గించవచ్చు.
వాటర్ పంప్ నిర్వహణ: వాటర్ పంప్ పైపులకు రంధ్రాలు పడినా లేదా బ్లాక్ అయినా నీరు ప్యాడ్లకు సమానంగా అందదు. పంప్ సరిగ్గా పనిచేసేలా చూసుకోవడం వల్ల కూలింగ్ స్థిరంగా ఉంటుంది. ఇలాంటి చిన్న చిట్కాలు పాటించడం ద్వారా వేల రూపాయల ఖర్చు లేకుండానే మీ సాధారణ కూలర్తో ఏసీ లాంటి అనుభూతిని పొందవచ్చు.
మరిన్ని హ్యుమన్ ఇంట్రెస్ట్ వార్తల కోసం క్లిక్ చేయండి..
