జామపండు తినడం వల్ల కలిగే అద్భుతమైన ఆరోగ్య ప్రయోజనాలు మీకు తెలుసా..?
జామపండు ఆరోగ్యానికి ఎంతో మేలు చేసే అద్భుతమైన పండు. ఇందులో విటమిన్ సి, ఫైబర్, యాంటీఆక్సిడెంట్లు, పొటాషియం లాంటి అనేక పోషకాలు సమృద్ధిగా ఉన్నాయి. రోగనిరోధక శక్తిని పెంచడం, జీర్ణశక్తిని మెరుగుపరచడం, గుండె ఆరోగ్యాన్ని కాపాడడం వంటి అనేక ప్రయోజనాలను అందిస్తుంది. రోజూ ఒక జామపండు తినడం వల్ల శరీరానికి అనేక రకాల లాభాలు కలుగుతాయి.
జామపండు అనేది అందరికీ అందుబాటులో ఉండే ఆరోగ్యకరమైన పండు. దీని ప్రత్యేకత ఏమిటంటే ఇందులో అనేక పోషకాలు, ఖనిజాలు, విటమిన్లు, ఫైబర్, యాంటీఆక్సిడెంట్లు పుష్కలంగా ఉంటాయి. ఆరోగ్యానికి మేలు చేసేందుకు రోజూ ఒక జామపండు తినడం చాలా మంచిది. ఇప్పుడు మనం జామపండు తినడం వల్ల కలిగే ఆరోగ్య ప్రయోజనాల గురించి తెలుసుకుందాం.
రోగనిరోధక శక్తి
జామపండులో విటమిన్ సి అధికంగా ఉంటుంది. మన శరీర రోగనిరోధక శక్తిని బలపరచడంలో ఇది కీలక పాత్ర పోషిస్తుంది. రోగనిరోధక శక్తి పెరిగినప్పుడు, శరీరం వివిధ రకాల ఇన్ఫెక్షన్లకు వ్యతిరేకంగా సమర్థంగా పోరాడుతుంది. ఆరెంజ్ కంటే నాలుగు రెట్లు ఎక్కువ విటమిన్ సి జామలో ఉంటుంది. కాబట్టి ఇది మరింత శక్తివంతమైన పండు. ఫ్రీ రాడికల్స్ వల్ల శరీరంలో ఏర్పడే హానిని నివారించడంలో జామపండులోని యాంటీఆక్సిడెంట్లు ముఖ్యంగా సహాయపడతాయి.
జీర్ణశక్తి
జామపండులో ఫైబర్ అధికంగా ఉంటుంది. ఇది మన జీర్ణ వ్యవస్థను మెరుగుపరచడంలో సహాయపడుతుంది. కడుపు సమస్యలు, మలబద్ధకం వంటి సమస్యల నుంచి ఉపశమనం పొందడంలో జామపండు ప్రభావవంతంగా పనిచేస్తుంది. పండులో గ్లైసెమిక్ ఇండెక్స్ తక్కువగా ఉంటుంది. కాబట్టి ఇది రక్తంలో చక్కెర స్థాయిలను నియంత్రించడంలో కూడా సహాయపడుతుంది. ఈ కారణంగా మధుమేహం ఉన్న వారికి జామపండు మంచి ఎంపిక.
కంటి ఆరోగ్యం
జామపండులో విటమిన్ ఎ కూడా ఉంది. ఇది కంటి ఆరోగ్యానికి ఎంతో అవసరం. మన దృష్టిని మెరుగుపరచడంలో విటమిన్ ఎ కీలక పాత్ర పోషిస్తుంది. వయస్సుతో కంటి సమస్యలు ఏర్పడే అవకాశాన్ని తగ్గించడంలో ఈ పండు ఎంతో సహాయపడుతుంది. కంటి సమస్యలను నివారించుకోవడానికి జామ రసం తాగడం మంచిదని చెబుతారు.
గుండె ఆరోగ్యం
జామపండులో పొటాషియం ఎక్కువగా ఉంటుంది. ఇది రక్తపోటును నియంత్రించడంలో సహాయపడుతుంది. గుండెను ఆరోగ్యంగా ఉంచడంలో పొటాషియం ముఖ్యమైన పాత్ర పోషిస్తుంది. గుండె జబ్బుల ప్రమాదాన్ని తగ్గించడానికి ప్రతిరోజూ ఒక జామపండు తినడం మేలు చేస్తుంది. ఈ పండులోని పొటాషియం కొంత మేర అరటిపండులో ఉన్న దానితో సమానంగా ఉంటుంది. కాబట్టి జామపండు కూడా గుండె ఆరోగ్యానికి మంచిదని చెప్పవచ్చు.
మాంగనీస్
జామపండులోని మాంగనీస్ మనం తినే ఆహారంలోని పోషకాలు శరీరం సరిగ్గా గ్రహించడంలో సహాయపడుతుంది. ఇతర పోషకాలు శరీరంలో క్రమంగా చేరడానికి ఇది కీలకంగా పనిచేస్తుంది. అంతేకాకుండా జామపండులో ఫోలేట్ ఉంటుంది. ఈ ఫోలేట్ సంతానోత్పత్తి సామర్థ్యాన్ని మెరుగుపరచడంలో సహాయపడుతుంది.
జామపండు ప్రత్యేకత
జామపండులో తక్కువ కేలరీలు, తక్కువ చక్కెర మాత్రమే ఉంటాయి. 100 గ్రాముల జామపండులో కేవలం 68 కేలరీలు, 8.92 గ్రాముల చక్కెర మాత్రమే ఉంటాయి. ఈ కారణంగా రోజువారీ డైట్లో జామపండును చేర్చుకోవడం బరువు పెరగకుండా ఆరోగ్యకరంగా జీవించడానికి సహాయపడుతుంది.
ఇందులో ఉన్న విటమిన్లు, ఫైబర్, యాంటీఆక్సిడెంట్లు, పొటాషియం, మాంగనీస్ వంటి ముఖ్యమైన పోషకాలు మన ఆరోగ్యాన్ని మెరుగుపరచడానికి ముఖ్యమైనవి. కాబట్టి ఆరోగ్యకరమైన జీవనశైలిని మెరుగుపరచుకోవడానికి రోజూ ఒక జామపండు తినడం అలవాటు చేసుకోండి.