గొంతు నొప్పి చిన్న సమస్య కాదు..! మహిళల్లో ఇది ప్రమాదకర వ్యాధికి సంకేతం కావచ్చు..!

మనలో చాలా మంది చిన్న అనారోగ్యం వచ్చినా.. వెంటనే స్వయంగా మందులు తీసుకోవడానికి ప్రయత్నిస్తారు. కానీ దాని వల్ల కలిగే పరిణామాల గురించి ఎక్కువగా ఆలోచించరు. ఉదాహరణకు జలుబు లేదా దగ్గు వచ్చినప్పుడు చాలా మంది స్వయంగా మందులు వేసుకుని సమస్యను మరింత పెంచుకునే పరిస్థితి ఉంటుంది. కొన్ని సందర్భాల్లో మనం సాధారణంగా భావించే లక్షణాలు, వాస్తవానికి ఇతర తీవ్రమైన వ్యాధుల ప్రారంభ సంకేతాలు కావచ్చు. అందుకే లక్షణాలను ముందుగానే గుర్తించడం చాలా ముఖ్యం. ముఖ్యంగా మహిళలు ఒక ముఖ్యమైన లక్షణంపై ప్రత్యేక శ్రద్ధ వహించాలి.. అది గొంతు నొప్పి. చాలా మంది గొంతు నొప్పిని జలుబు, ఫ్లూ లేదా వాతావరణ మార్పుల వల్ల వచ్చిన చిన్న సమస్యగా తీసుకుంటారు. కానీ వారాల తరబడి తగ్గకుండా ఉండే గొంతు నొప్పి కొన్ని తీవ్రమైన వ్యాధులకు సంకేతం కావచ్చు. ముఖ్యంగా ఇది గొంతు క్యాన్సర్‌కు కూడా ప్రారంభ లక్షణంగా ఉండే అవకాశం ఉంది.

గొంతు క్యాన్సర్‌లో ముఖ్యంగా కనిపించే..

పొగాకు, ఆల్కహాల్ వాడకం ప్రధాన కారణాలు అయినప్పటికీ, ఆధునిక జీవనశైలి కారణంగా మహిళలు, పురుషులలో ఈ ప్రమాదం పెరుగుతోంది. గొంతు క్యాన్సర్‌లో ముఖ్యంగా కనిపించే లక్షణం గొంతు బొంగురుపోవడం లేదా స్వరం మారిపోవడం. చాలా మంది దీనిని సాధారణ సమస్యగా తీసుకుని నిర్లక్ష్యం చేస్తారు. కానీ గొంతు క్యాన్సర్ సాధారణంగా స్వరపేటికలో ప్రారంభమవుతుంది. ఆహారం మింగేటప్పుడు నొప్పి కలగడం, గొంతులో ఏదో ఇరుక్కుపోయినట్లు అనిపించడం వంటి లక్షణాలు కూడా కనిపించవచ్చు.

ప్రారంభంలో గుర్తిస్తే..

కాబట్టి మీకు తీవ్రమైన గొంతు నొప్పి, దగ్గు వంటి సమస్యలు ఉండి, మందులు తీసుకున్నప్పటికీ తగ్గకపోతే తప్పకుండా నిపుణుడైన వైద్యుడిని సంప్రదించాలి. అలాగే మెడ వైపులా చిన్నగా, నొప్పి లేకుండా ఉండే గడ్డలు కనిపించినా జాగ్రత్తగా ఉండాలి. ఇతర క్యాన్సర్లతో పోలిస్తే గొంతు క్యాన్సర్‌ను ప్రారంభ దశలో గుర్తిస్తే పూర్తిగా నయం చేసే అవకాశాలు చాలా ఎక్కువగా ఉంటాయి.

వ్యాధి ప్రమాదాన్ని తగ్గించడానికి చేయాల్సినవి

• పొగాకు మానుకోండి: సిగరెట్లు, బీడీలు లేదా నమలే పొగాకు వంటి అన్ని పొగాకు ఉత్పత్తులను పూర్తిగా వదిలేయాలి.
• ఆల్కహాల్‌ను నియంత్రించండి: అధికంగా మద్యం సేవించడం గొంతులోని కణాలను దెబ్బతీసి క్యాన్సర్ ప్రమాదాన్ని పెంచుతుంది.
• ఆరోగ్యకరమైన ఆహారం తీసుకోండి: పండ్లు, కూరగాయలు, పోషకాలు అధికంగా ఉన్న ఆహారం తీసుకోవడం ఆరోగ్యానికి మంచిది.
• పరిశుభ్రత పాటించండి: వ్యక్తిగత పరిశుభ్రత పాటించడం, అవసరమైన టీకాలు తీసుకోవడం ద్వారా HPV వంటి సంక్రమణలను నివారించవచ్చు.