Ghee Purity: మార్కెట్లో దొరికే నెయ్యి అసలైనదేనా? నకిలీ నెయ్యిని ఇంట్లోనే చిటికెలో కనిపెట్టే సీక్రెట్ ట్రిక్ ఇదే!

భారతీయ ఇళ్లలో శతాబ్దాలుగా వాడుతున్న నెయ్యి కేవలం రుచికే కాదు, ఆరోగ్యానికి కూడా ఎంతో మేలు చేస్తుంది. కానీ మార్కెట్లో ఉత్పత్తి ఖర్చులను తగ్గించుకుని ఎక్కువ లాభాలు సంపాదించడం కోసం వనస్పతి, చౌక వంట నూనెలు , పాలేతర కొవ్వులను నెయ్యిలో ఇష్టమొచ్చినట్లు కలుపుతున్నారు. ఈ కల్తీ నెయ్యి చూడటానికి అచ్చం అసలైన నెయ్యిలాగే కనిపించడం వల్ల చాలా మంది మోసపోతున్నారు. మీ ఇంట్లో ఉన్న నెయ్యి స్వచ్ఛతను పరీక్షించడానికి FSSAI వెల్లడించిన సులభమైన రసాయన ప్రక్రియ , జాగ్రత్తల పూర్తి వివరాలు ఇక్కడ చూద్దాం.

FSSAI సూచించిన నెయ్యి స్వచ్ఛత పరీక్ష

మొదట ఒక శుభ్రమైన టెస్ట్ ట్యూబ్‌లో ఒక మిల్లీలీటర్ కరిగించిన నెయ్యిని తీసుకోవాలి.

ఆ తర్వాత దానికి ఒక మిల్లీలీటర్ గాఢ హైడ్రోక్లోరిక్ ఆమ్లాన్ని (HCl) జాగ్రత్తగా కలపాలి.

ఇప్పుడు ఈ మిశ్రమానికి అర టీస్పూన్ చక్కెరను కూడా జోడించాల్సి ఉంటుంది.

ఈ పదార్థాలన్నింటినీ సుమారు రెండు నిమిషాల పాటు బాగా కుదిపి, కాసేపు ఆ మిశ్రమాన్ని కదల్చకుండా అలాగే పక్కన వదిలేయాలి.

రంగు మారడం వెనుక ఉన్న అసలు సైన్స్ ఈ పరీక్ష పూర్తయిన తర్వాత మిశ్రమంలో వచ్చే రంగు మార్పును బట్టి నెయ్యి నాణ్యతను తెలుసుకోవచ్చు. నెయ్యి గనుక పూర్తిగా స్వచ్ఛమైనదైతే దాని రంగులో ఎలాంటి మార్పు రాదు. ఒకవేళ నెయ్యిలో వనస్పతి లేదా నువ్వుల నూనె వంటి కల్తీ పదార్థాలు ఉంటే, ఆమ్ల పొర (Acid layer) వెంటనే గులాబీ లేదా ఎరుపు రంగులోకి మారిపోతుంది. నిపుణుల ప్రకారం, హైడ్రోక్లోరిక్ ఆమ్లం చక్కెర అణువులను విచ్ఛిన్నం చేసినప్పుడు ‘ఫర్ఫ్యూరల్’ అనే సమ్మేళనం ఏర్పడుతుంది. ఈ సమ్మేళనం వనస్పతిలోని మూలకాలతో చర్య జరపడం వల్లే ఆ ఎరుపు రంగు వస్తుంది.

కల్తీ నెయ్యితో పొంచి ఉన్న ఆరోగ్య నష్టాలు కల్తీ నెయ్యిని దీర్ఘకాలం పాటు ఆహారంలో భాగం చేసుకోవడం వల్ల శరీరానికి ఎలాంటి పోషకాలు లభించకపోగా తీవ్రమైన అనారోగ్య సమస్యలు తలెత్తుతాయి. ఇటీవల కాలంలో ఆహార భద్రతా అధికారులు ఒక పెద్ద కల్తీ నెయ్యి ముఠాను ఛేదించి, వేలాది లీటర్ల నకిలీ నెయ్యిని స్వాధీనం చేసుకున్నారు. అందువల్ల నెయ్యి కొనేటప్పుడు కేవలం సువాసన, రంగు మాత్రమే కాకుండా ఐఎస్ఐ లేదా ఎఫ్ఎస్ఎస్ఏఐ గుర్తింపు ఉన్న నమ్మకమైన బ్రాండ్లనే ఎంచుకోవాలని నిపుణులు హెచ్చరిస్తున్నారు.

గమనిక (Disclaimer): ఈ కథనంలో అందించబడిన సమాచారం కేవలం ఫుడ్ సేఫ్టీ అండ్ స్టాండర్డ్స్ అథారిటీ ఆఫ్ ఇండియా (FSSAI) అధికారిక మార్గదర్శకాలు , సాధారణ అవగాహన ఆధారంగా సేకరించబడినది మాత్రమే. రసాయనాలతో పరీక్షలు చేసేటప్పుడు తగిన జాగ్రత్తలు తీసుకోగలరు. ఆహార నాణ్యత , ఆరోగ్య సమస్యలపై సందేహాలు ఉంటే సంబంధిత నిపుణులను సంప్రదించాల్సిందిగా మనవి.