Rambha: ఆ తెలుగు హీరో మస్త్ నాటకాలు చేస్తాడు: రంభ ఇంట్రస్టింగ్ కామెంట్స్..

ప్రముఖ నటి రంభ గతంలో ఇచ్చిన ఓ ఇంటర్వ్యూలో తన జీవితంలోని వివిధ కోణాలను ఆవిష్కరించారు. వ్యక్తిగత జీవితం, కెరీర్, స్నేహాలపై ఆమె చేసిన వ్యాఖ్యలు ప్రస్తుతం చర్చనీయాంశమయ్యాయి. తన భర్త షార్ప్ బిజినెస్ మ్యాన్ కావడంతో తాను కూడా వ్యాపారంలోకి అడుగుపెట్టబోతున్నారా అనే ప్రశ్నకు రంభ నవ్వుతూ సమాధానమిచ్చారు. తనకు నటన మాత్రమే వచ్చని, వ్యాపారం చేయడం తన వల్ల కాదని స్పష్టం చేశారు. అయితే తన భర్త బిజినెస్ మెలకువలను నేర్పిస్తున్నారని, ఆరు నెలలు ఆఫీసులో కూర్చుంటే చాలని సూచించారని తెలిపారు. మొదటి రెండు రోజులు కంప్యూటర్‌లో గేమ్స్ ఆడుతూ కాలక్షేపం చేశానని, ఎవర్నీ చెడగొట్టొద్దు అని చెప్పారని సరదాగా వ్యాఖ్యానించారు. స్నేహాల గురించి మాట్లాడుతూ, తనకు చిన్ననాటి స్నేహితులు లేరని, అసలు ఫ్రెండ్సే లేరని రంభ అన్నారు. అందరితో స్నేహపూర్వకంగా ఉన్నప్పటికీ, ప్రత్యేకమైన స్నేహితులు ఎవరూ లేరని తెలిపారు. పర్టిక్యులర్ గ్యాంగ్‌గా ఉంటే వాళ్ళు ఏమైనా ఫీల్ అవుతారేమో అని తను ఎక్కువగా ఆలోచిస్తుంటానని, బ్రహ్మానందం గారి ఫీల్ అయ్యారా క్యారెక్టర్‌తో పోల్చుకున్నారు. నటిమణి సౌందర్య తన బెస్ట్ ఫ్రెండ్‌లలో ఒకరని, మహేశ్వరి కూడా తనకు మంచి స్నేహితురాలని పేర్కొన్నారు. రమ్యకృష్ణతో సహా అందరితో ఫ్రెండ్లీగా ఉంటానని చెప్పారు.

నటుడు జేడీ చక్రవర్తితో తన స్నేహంపై రంభ ఆసక్తికర వ్యాఖ్యలు చేశారు. బొంబాయి ప్రియుడు సమయంలో జేడీ చక్రవర్తి తనకు బెస్ట్ ఫ్రెండ్ అని గుర్తు చేసుకున్నారు. అయితే తన పెళ్లికి ఆయన రాకపోవడంపై తాను చాలా అప్‌సెట్ అయ్యానని, ఆయనను తీవ్రంగా తిట్టేశానని తెలిపారు. కెమెరా ముందు ఫ్రాంక్‌గా చెబుతున్నానని, జేడీ చక్రవర్తి చాలా నాటక్ బాజీ అని, అబ్బాయిలు నాటకాలు చేయాలంటే ఆయనను చూడాలని సరదాగా విమర్శించారు. అయినప్పటికీ, ఆయన చాలా మంచి మనసున్న వ్యక్తి అని, తన వెల్‌విషర్ అని రంభ అన్నారు. కెరీర్‌లో గ్లామర్ పాత్రల గురించి మాట్లాడుతూ, చాలామంది తనను గ్లామర్ పాత్రలకే పరిమితం చేశారని రంభ అన్నారు. ఒకసారి గ్లామరస్‌గా కనిపించిన తర్వాత, ఎంత బాగా నటించినా అందరి దృష్టి గ్లామర్‌పైనే ఉంటుందని అభిప్రాయపడ్డారు. సరిగమలు సినిమా తెలుగులో ఆశించినంత విజయం సాధించకపోయినా, దాని మలయాళ వెర్షన్‌కు జాతీయ అవార్డు అందుకున్నానని గుర్తు చేసుకున్నారు. గ్లామర్ పాత్రలు అంటే తనకు చాలా ఇష్టమని, మంచి మంచి డ్రెస్సులు వేసుకోవడం నచ్చుతుందని చెప్పారు. మలయాళం, తమిళంలో సుందర పురుషన్ వంటి చిత్రాలలో తనకు క్యారెక్టర్ రోల్స్ వచ్చాయని, అందుకే గ్లామర్ పాత్రలకే పరిమితం అయినందుకు తనకు ఎలాంటి బాధ లేదని రంభ వెల్లడించారు.