Sandeep Reddy Vanga: సందీప్ రెడ్డి వంగా పేరు చెప్పగానే కన్నీరు పెడుతున్న ఆ నటుడు.. ఎందుకంటే
డైరెక్టర్ బాబీ ప్రకారం, సందీప్ రెడ్డి వంగా పేరు చెప్పగానే బాబీ డియోల్ భావోద్వేగానికి లోనవుతాడు. దాదాపు 15 ఏళ్ల నిరీక్షణ తర్వాత యానిమల్ సినిమా తన జీవితాన్ని మార్చిందని, వంగాకు కృతజ్ఞతలు తెలుపుతూ అతడు కంటతడి పెట్టుకున్నాడని డైరెక్టర్ బాబీ వెల్లడించారు. ఈ విజయం తర్వాత బాబీ డియోల్ పాత్రల ఎంపికలో ఎంతో జాగ్రత్తగా ఉంటున్నారు.
Updated on: Jan 18, 2026 | 7:43 AM
తెలుగు డైరెక్టర్ బాబీ ఇటీవల ఒక ఇంటర్వ్యూలో బాలీవుడ్ నటుడు బాబీ డియోల్ ప్రస్తుత కెరీర్ స్థితి, ఆయన గత పోరాటాల గురించి పలు విషయాలు పంచుకున్నారు. బాబీ డియోల్ సందీప్ రెడ్డి వంగా పేరు చెప్పగానే భావోద్వేగానికి లోనవుతారని ఆయన వెల్లడించారు. యానిమల్ సినిమా విడుదలైన తర్వాత బాబీ డియోల్ జీవితం అనూహ్యంగా మారిపోయిందని, తాను తన జీవితాన్ని ఇలా ఊహించలేదని చెబుతూ ఆయన కన్నీళ్లు పెట్టుకున్నారని డైరెక్టర్ బాబీ వివరించారు. సాధారణంగా తెలుగు సినిమాల్లో బలమైన హిందీ విలన్ పాత్రలు ఉండవని, కేవలం ప్యాడింగ్ కోసమే వారిని తెస్తుంటారని, అయితే సందీప్ రెడ్డి వంగా యానిమల్లో బాబీ డియోల్కు చాలా బలమైన పాత్రను ఇచ్చారని బాబీ ప్రశంసించారు. దాదాపు 15 ఏళ్ల పాటు సినీ పరిశ్రమలో అవకాశాలు లేక బాబీ డియోల్ ఇంట్లో కూర్చుండిపోయారని డైరెక్టర్ బాబీ గుర్తు చేసుకున్నారు. ఆ సమయంలో తన భార్య డబ్బుల మీద బతికానని ఆయన ఆవేదన వ్యక్తం చేశారన్నారు. తన కొడుకు ఒకరోజు పక్క రూమ్ లో తన తల్లితో “నాన్న ఇక పని చేయడమ్మా” అని అన్న మాటలు విని తనకు చనిపోవాలనిపించిందని బాబీ డియోల్ చెప్పారట. తన తండ్రి ఒకప్పుడు సూపర్ స్టార్ అని ఆ కొడుక్కి తెలియదని, ఎందుకంటే అతను పుట్టేసరికే తండ్రి కెరీర్ డౌన్ అయిందని బాబీ డియోల్ వాపోయినట్లు డైరెక్టర్ బాబీ తెలిపారు.
అందరు ప్రొడ్యూసర్లు, ఆఫీసులకు తన ఫోటోలు పంపించినా ఎవరూ పిలవలేదని, కృష్ణానగర్ లో లాగే అందరూ “సూపర్ బాబీ, లుక్స్ బహత్ అచ్ఛే హై, హమ్ కామ్ కరేంగే” అనేవారు కానీ ఎవరూ పిలవలేదని బాబీ డియోల్ చెప్పారన్నారు. అయితే, “మీ తెలుగోడు ఒక్కడు వచ్చి సందీప్ రెడ్డి వంగా నా జీవితాన్ని మార్చాడు బాబీ” అని సందీప్ రెడ్డి వంగా పట్ల బాబీ డియోల్ తన కృతజ్ఞతను వ్యక్తం చేశారట. ఈ సంఘటనలన్నీ యానిమల్ సినిమా తర్వాత బాబీ డియోల్ కెరీర్లో ఎంతటి మలుపు తీసుకువచ్చాయో స్పష్టం చేస్తాయి. ప్రస్తుతం బాబీ డియోల్ చాలా బిజీ అయిపోయారని, సూపర్ స్టార్ స్థాయిని అందుకున్నారని డైరెక్టర్ బాబీ పేర్కొన్నారు. ఇప్పుడు తను డిమాండ్ చేసినంత డబ్బులు ఇవ్వడానికి ప్రొడ్యూసర్లు, అన్ని భాషల డైరెక్టర్లు సిద్ధంగా ఉన్నప్పటికీ, ఏ మాత్రం కంఫర్ట్ జోన్ కనెక్ట్ అవ్వకపోయినా, తనకి కిక్ రాకపోయినా బాబీ డియోల్ ఏ పాత్రనూ చేయరని డైరెక్టర్ బాబీ స్పష్టం చేశారు.
Also Read: అభిమానులను మోసం చేశావ్ ఉదయ్ కిరణ్.. ఫీనిక్స్ ఫక్షిలా లేచి వస్తానని చెప్పి..
