OTT: ఫస్ట్ నైట్ రోజే భర్త చనిపోయి తిరిగి వస్తే.. ఓటీటీని షేక్ చేస్తున్న క్రేజీ థ్రిల్లర్ మూవీ

ఓటీటీలో కొత్త సినిమాల కోసం ఎదురుచూసే సినీప్రియులకు ఈ వారం ఓ ఆసక్తికరమైన మలయాళం మూవీ అందుబాటులోకి వచ్చింది. అదే ‘ధూమకేతు’. టైమ్ లూప్ కాన్సెప్ట్‌కు కామెడీ, సస్పెన్స్, థ్రిల్లర్ అంశాలను జోడించి రూపొందించిన ఈ చిత్రం ప్రస్తుతం నెట్‌ఫ్లిక్స్‌లో స్ట్రీమింగ్ అవుతోంది. మలయాళంతో పాటు తెలుగు, తమిళం, హిందీ, కన్నడ భాషల్లోనూ ఈ సినిమాను వీక్షించవచ్చు. సరికొత్త కథలు, ఊహించని మలుపులతో కూడిన సినిమాలను ఇష్టపడేవారికి ఈ చిత్రం బెస్ట్ ఛాయిస్.  ఈ సినిమా కథ విషయానికొస్తే.. 36 ఏళ్ల కుట్టన్ జీవితంలోకి శర్మిల ప్రవేశించడంతో అతడి జీవితం కొత్త మలుపు తిరుగుతుంది. ఇద్దరి మధ్య పరిచయం ప్రేమగా మారి, చివరకు పెళ్లి చేసుకుంటారు. అయితే పెళ్లి తర్వాత వారి జీవితంలో అనుకోని సంఘటనలు చోటుచేసుకుంటాయి. అంతా సంతోషంగా సాగిపోతుందనుకున్న సమయంలో కుట్టన్‌కు ఎదురయ్యే అనుభవాలు అతడిని తీవ్ర గందరగోళానికి గురిచేస్తాయి. పెళ్లి రాత్రి ముసుగులు ధరించిన కొందరు వ్యక్తులు అతడిపై దాడి చేసి హత్య చేస్తారు. కానీ అసలు ట్విస్ట్ అక్కడే మొదలవుతుంది. చనిపోయిన కుట్టన్ మళ్లీ తిరిగొస్తాడు. అయితే అతడికి ఎదురయ్యే పరిస్థితులు మాత్రం మారవు. అదే రోజు, అదే సంఘటనలు, అదే ప్రమాదం.. ఇలా ప్రతిసారీ ఒకే చక్రంలో చిక్కుకుపోతాడు.

ఈ వింత పరిణామాల వెనుక ఉన్న రహస్యం ఏమిటి.? కుట్టన్ ప్రతిసారీ అదే పరిస్థితిని ఎందుకు ఎదుర్కొంటున్నాడు.? ఈ ఘటనలకు అతడి గతానికి ఏదైనా సంబంధం ఉందా.? తన భర్తకు ఎదురవుతున్న సమస్యను శర్మిల ఎలా అర్థం చేసుకుంది.? ఈ ప్రశ్నలకు సమాధానాలు తెలుసుకోవాలంటే సినిమా చూడాల్సిందే. సాధారణ కథలకు భిన్నంగా ఒకే రోజు పదేపదే రిపీట్ అవుతున్న పరిస్థితిని ప్రధానంగా తీసుకుని ఈ చిత్రాన్ని రూపొందించారు. హీరో ప్రతిసారీ అదే సంఘటనలను ఎదుర్కొంటున్నప్పటికీ, వాటి వెనుక ఉన్న కారణాన్ని తెలుసుకోవడానికి చేసే ప్రయత్నాలు కథలో ఆసక్తిని పెంచుతాయి. సస్పెన్స్‌తో పాటు హాస్యాన్ని కూడా జోడించడం ఈ సినిమాకు ప్రత్యేకత. టైమ్ లూప్ కథల్లో ఒకే తరహా సన్నివేశాలు పదేపదే కనిపించడం వల్ల కొంతమందికి కథనం నెమ్మదిగా సాగుతున్నట్లు అనిపించవచ్చు. అయితే, ఆ రిపీట్ అవుతున్న సంఘటనల ద్వారా అసలు రహస్యాన్ని బయటపెట్టే ప్రయత్నం ప్రేక్షకుల్లో ఉత్కంఠను కలిగిస్తుంది.

ఈ చిత్రంలో కుట్టన్ పాత్రలో సజిన్ గోపు నటించారు. కథలోని వింత పరిస్థితులను ఎదుర్కొనే వ్యక్తిగా తన నటనతో ఆకట్టుకునే ప్రయత్నం చేశారు. మరోవైపు శర్మిల పాత్రలో నిఖిలా విమల్ కనిపించారు. వీరితో పాటు షైన్ టామ్ చాకో, గణపతి తదితరులు కీలక పాత్రల్లో నటించారు. దర్శకుడు సుధి మాడిసన్ ఈ చిత్రాన్ని టైమ్ లూప్ నేపథ్యంలో కామెడీ, ఫాంటసీ అంశాలను మేళవిస్తూ తెరకెక్కించారు. కథలోని ప్రధాన కాన్సెప్ట్‌ను చివరి వరకు ఆసక్తికరంగా మలిచేందుకు ప్రయత్నించారు. విభిన్నమైన కథాంశాలు, మిస్టరీ, సస్పెన్స్‌తో కూడిన సినిమాలను ఇష్టపడేవారికి ‘ధూమకేతు’ ఒకసారి ట్రై చేయాల్సిన చిత్రం. ముఖ్యంగా టైమ్ లూప్ కాన్సెప్ట్‌తో వచ్చిన సినిమాలపై ఆసక్తి ఉన్నవారికి ఇది నచ్చే అవకాశం ఉంది. ఈ వారాంతంలో ఇంట్లోనే కూర్చుని కొత్త తరహా మలయాళ సినిమాను చూడాలనుకుంటే నెట్‌ఫ్లిక్స్‌లో అందుబాటులో ఉన్న ధూమకేతును మీ వాచ్‌లిస్ట్‌లో చేర్చుకోవచ్చు.

మరిన్ని సినిమా వార్తల కోసం ఇక్కడ క్లిక్ చేయండి