OTT Movies: డబుల్ ఫన్.. డబుల్ మస్తీ.. ఈ వారం ఓటీటీలో తప్పక చూడాల్సిన బ్లాక్‌బస్టర్ చిత్రాలివే..
ఈ ఏడాది చివరికి వచ్చేసింది. ప్రతీ వారం మాదిరిగానే ఈ వీక్ కూడా చాలానే చిత్రాలు ఓటీటీల్లో స్ట్రీమింగ్‌కు రెడీ అయ్యాయి..
ఈ ఏడాది చివరికి వచ్చేసింది. ప్రతీ వారం మాదిరిగానే ఈ వీక్ కూడా చాలానే చిత్రాలు ఓటీటీల్లో స్ట్రీమింగ్‌కు రెడీ అయ్యాయి. థియేటర్లలో వరుసపెట్టి సినిమాలు విడుదలవుతున్నప్పటికీ.. ఓ వర్గం ప్రేక్షకులు ఓటీటీల వైపే మొగ్గు చూపుతున్నారు. ఈ క్రమంలోనే ఎప్పటికప్పుడు కొత్త కంటెంట్, వినూత్న వెబ్‌సిరీస్‌లు, సరికొత్త సినిమాలను ఓటీటీలు ప్రేక్షకుల ముందుకు తీసుకొస్తున్నాయి. అయితే ఇప్పుడు మనం ఓటీటీల్లో ఈ వీకెండ్ తప్పక చూడాల్సిన చిత్రాలు ఏంటో ఇప్పుడు చూద్దాం..
జయ జయ జయ జయహే:
ఈ మధ్యకాలంలో కంటెంట్ ఉన్న చిత్రాలు అటు థియేటర్లు, ఇటు ఓటీటీల్లో ఎక్కడ రిలీజ్ అయినా కూడా ప్రేక్షకులు పట్టం కడుతున్నారు. ఆ కోవకు చెందినదే ‘జయ జయ జయ జయహే’. ఈ మలయాళీ సినిమా.. చిన్న చిత్రంగా థియేటర్లలో విడుదలై బాక్సాఫీస్ దగ్గర భారీ కలెక్షన్లు అందుకుంది. ఫ్యామిలీ ఎంటర్టైనర్‌గా రూపొందిన ఈ చిత్రం ప్రస్తుతం డిస్నీ+ హాట్‌స్టార్‌లో తెలుగు, తమిళ, మలయాళం, కన్నడ భాషల్లో అందుబాటులో ఉంది. గృహహింస నేపధ్యంలో.. భర్త వేధింపులకు ఎదురుతిరిగే ఓ అమ్మాయి కథను ఫ్యామిలీ ఆడియన్స్‌కు కనెక్ట్ అయ్యేలా.. కాస్త వినోదాన్ని జత చూసి దర్శకుడు విపిన్ దాస్ ఈ సినిమాను తెరకెక్కించాడు.
లవ్ టుడే:
‘కోమలి’ ఫేం ప్రదీప్ రంగనాధన్ స్వీయ దర్శకత్వంలో తెరకెక్కిన చిత్రం ‘లవ్ టుడే’. ఇందులో ప్రదీప్‌కు జోడిగా ఇవానా, రవీనా రవి హీరోయిన్లుగా నటించారు. ఈ చిత్రం అటు తమిళం, ఇటు తెలుగు భాషల్లో మంచి విజయాన్ని అందుకుంది. యూత్‌ను విపరీతంగా ఆకట్టుకునే సబ్జెక్ట్‌తో.. ఈతరం లవ్‌స్టోరీని దర్శకుడు అద్భుతంగా తెరకెక్కించాడు. ఈ చిత్రం తమిళనాట నవంబర్ 4వ తేదీన విడుదల కాగా.. తెలుగులో నిర్మాత దిల్ రాజు నవంబర్ 25వ తేదీన రిలీజ్ చేశారు. తొలి షో నుంచే పాజిటివ్ టాక్ తెచ్చుకుని అదిరిపోయే వసూళ్లతో దూసుకుపోయింది. ఇక ఈ చిత్రం డిసెంబర్ 23 నుంచి తెలుగు ఆడియోతో నెట్‌ఫ్లిక్స్‌లో అందుబాటులోకి వచ్చింది.
ఇట్లు మారేడుమిల్లి ప్రజానీకం:
అల్లరి నరేష్ ప్రధాన పాత్రలో తెరకెక్కిన చిత్రం ‘ఇట్లు మారేడుమిల్లి ప్రజానీకం‘. ఏఆర్‌ మోహన్‌ దర్శకత్వం వహించిన ఈ సినిమా నవంబర్ 25వ తేదీన ప్రేక్షకుల ముందుకు వచ్చింది. ఇందులో రాజకీయ వ్యవస్థను ప్రశ్నించే ఓ ఎన్నికల అధికారి రోల్‌ను నరేష్ పోషించాడు. ఈ మూవీ విమర్శకుల నుంచి ప్రశంసలు అందుకుంది గానీ.. కమర్షియల్‌గా మాత్రం సక్సెస్ సాధించలేకపోయింది. ఇక ఈ చిత్రం ప్రముఖ ఓటీటీ సంస్థ జీ5 వేదికగా డిసెంబర్ 23వ తేదీ నుంచి స్ట్రీమింగ్ అవుతోంది.
మట్టి కుస్తీ:
విష్ణు విశాల్, ఐశ్వర్య లక్ష్మీ ప్రధాన పాత్రల్లో నటించిన తాజాగా చిత్రం ‘గట్ట కుస్తీ’. తెలుగులో ‘మట్టి కుస్తీ’ పేరుతో డబ్ అయింది. స్పోర్ట్స్ డ్రామాగా తెరకెక్కిన ఈ మూవీకి చెళ్ల అయ్యవు దర్శకుడు. డిసెంబర్ 2న ప్రేక్షకుల ముందు వచ్చిన ఈ సినిమా ఫ్యామిలీ ఆడియన్స్‌ను మెప్పించింది గానీ.. బాక్సాఫీస్ దగ్గర కమర్షియల్‌గా సక్సెస్ సాధించలేకపోయింది. ఇక జనవరి 1వ తేదీ నుంచి నెట్‌ఫ్లిక్స్ వేదికగా తమిళ, తెలుగు భాషల్లో స్ట్రీమింగ్ అవుతుంది.
DSP:
విజయ్ సేతుపతి హీరోగా తెరకెక్కిన చిత్రం ‘DSP’. ఈ యాక్షన్ కామెడీ డ్రామాకు పొన్ రామ్ దర్శకుడు. ఇందులో అనుక్రీతి వాస్ హీరోయిన్ కాగా.. డి.ఇమ్మాన్ సంగీతం అందించాడు. డిసెంబర్ 2న విడుదలైన ఈ చిత్రం ఆశించిన స్థాయిలో ప్రేక్షకులను ఆకట్టుకోలేకపోయింది. ఇక ఇప్పుడు ఓటీటీ ఫ్యాన్స్‌ను అలరించేందుకు వచ్చేస్తోంది. డిసెంబర్ 30వ తేదీ నుంచి ప్రముఖ ఓటీటీ సంస్థ నెట్‌ఫ్లిక్స్ వేదికగా స్ట్రీమింగ్ అవుతుంది.
ది టీచర్:
అమలాపాల్ ప్రధాన పాత్రలో తెరకెక్కిన మలయాళ చిత్రం ‘ది టీచర్’. దీనికి వివేక్ దర్శకుడు. తన జీవితాన్ని నాశనం చేసిన నలుగురు స్టూడెంట్స్‌కి ఓ టీచర్ ఎలాంటి గుణపాఠం చెప్పిందన్నది ఈ చిత్ర కథాంశం. ఎలాంటి కమర్షియల్ హంగులు లేకుండా ఒక సెన్సిటివ్ సమస్య చుట్టూ కథను సీరియస్‌గా తీసుకెళ్లాడు దర్శకుడు. ఇందులో అమలాపాల్ నటన ఆకట్టుకుంటుంది.
బటర్ ఫ్లై:
అనుపమ పరమేశ్వరన్ ప్రధాన పాత్రలో తెరకెక్కిన చిత్రం ‘బటర్ ఫ్లై’. ఈ సినిమా ప్రముఖ ఓటీటీ సంస్థ డిస్నీ+హాట్‌స్టార్‌లో డిసెంబర్ 29వ తేదీ నుంచి స్ట్రీమింగ్ అవుతుంది. మిస్టరీ థ్రిల్లర్ జోనర్‌లో తెరకెక్కిన ఈ మూవీ కథ పిల్లల కిడ్నాప్ చుట్టూ తిరుగుతుంది. ఇందులో భూమికా చావ్లా, రావు రమేష్ కీలక పాత్రల్లో కనిపిస్తారు. ఘంటా సతీశ్‌ బాబు దర్శకత్వం వహించిన ఈ సినిమాను రవి ప్రకాష్‌ బోడపాటి, ప్రసాద్‌ తిరువళ్లూరి, ప్రదీప్ నల్లిమెల్లి నిర్మించారు.
