ఆ సినిమా నుంచి తప్పుకున్న తమన్నా.. అసలు కారణం అదేనా!

స్టార్ హీరోయిన్ తమన్నా ప్రధాన పాత్రలో దర్శకుడు ఓంకార్ తెరకెక్కించనున్న ‘రాజు గారి గది 3’ ఇటీవలే లాంఛనంగా ప్రారంభమైన సంగతి తెలిసిందే. ‘రాజు గారి గది’ సినిమా హిట్ కావడంతో.. ఆ సినిమాకు సీక్వెల్స్ పరంపరను కొనసాగిస్తున్నాడు ఓంకార్. నాగార్జున, సమంతా ప్రధాన పాత్రలో ‘రాజు గారి గది 2’ సినిమా వచ్చి.. ఓ మోస్తరు హిట్ సాధించింది. దీనితో తమన్నా ముఖ్యపాత్రలో తానే దర్శకుడు, నిర్మాతగా మారి తెరకెక్కిస్తున్నాడు ఓంకార్. ఇక ఈ సినిమాలో అశ్విన్ బాబు కీలక పాత్ర పోషిస్తున్నాడు. అనుకున్న ప్రకారం మొదటి షెడ్యూల్ స్టార్ట్ చేయాల్సి ఉండగా.. ఊహించని రీతిలో తమన్నా ఈ సినిమా నుంచి తప్పుకుంది.

తాజా సమాచారం ప్రకారం దర్శకుడు ఓంకార్.. తమన్నాకు ముందు చెప్పిన కథలో ఆమె పాత్రకు స్కోప్ ఉండగా.. సెట్స్ మీదకు అడుగుపెట్టిన తర్వాత ఓంకార్ తన పాత్ర పరిధిని తగ్గించడం గమనించిన తమన్నా.. వెంటనే ఈ సినిమాను తప్పుకుందని విశ్వసనీయ వర్గాల సమాచారం. అయితే తమన్నా ఈ సినిమా నుంచి తప్పుకోవడానికి చాలా కారణాలు ఉన్నాయని ఆమె సన్నిహితుల మాట. కాగా ఈ విషయంపై దర్శకుడి నుంచి ఎటువంటి అధికారిక ప్రకటన రాలేదు.

మరోవైపు తమన్నా.. ప్రస్తుతం నటిస్తున్న ‘సైరా’ నరసింహారెడ్డి అక్టోబర్ 2న విడుదలకు సిద్ధం అవుతుండగా.. ‘దటీజ్ మహాలక్ష్మి’ సినిమా పోస్ట్ ప్రొడక్షన్ వర్క్ శరవేగంగా జరుగుతోంది. ఈ సినిమా విడుదల తేదీని చిత్ర యూనిట్ త్వరలోనే వెల్లడించనుంది.