ఆశా భోస్లేకు ఘన నివాళి.. ఇండియన్ నుస్కా పరిచయం చేసిన స్టార్ సింగర్

ఓ2 ఎరీనా వంటి అంతర్జాతీయ వేదికపై శ్రేయా ఘోషల్ ప్రదర్శన ఇవ్వడం ఆమె కెరీర్‌లో మరో మైలురాయి. ఈ సందర్భంగా ఆమె ధరించిన అవుట్‌ఫిట్, ఆమె హెయిర్ స్టైల్ సోషల్ మీడియాలో వైరల్ అయ్యాయి. కేవలం పాటలతోనే కాకుండా, తన లుక్ ఇంకా సింప్లిసిటీతో కూడా ఆమె అందరినీ ఆకట్టుకుంది. తాజాగా ఓ వీడియోలో శ్రేయ తన అందమైన జుట్టు వెనుక ఉన్న అసలు రహస్యాన్ని వెల్లడించి ప్రపంచవ్యాప్తంగా నెటిజన్ల దృష్టిని ఆకర్షించింది.

భారతీయ ‘నుస్కా’

బ్రిటీష్ వోగ్ ఇంటర్వ్యూలో శ్రేయా ఘోషల్ తన జుట్టు సంరక్షణ గురించి ఆసక్తికరమైన విషయాలు పంచుకున్నారు. నడుము వరకు ఉన్న ఒత్తైన, నిగనిగలాడే జుట్టును ఆమె ఎలా మెయింటైన్ చేస్తారని ఇంటర్వ్యూయర్ అడగగా.. శ్రేయ ఏమాత్రం తడుముకోకుండా “ఇండియన్ నుస్కా (భారతీయ చిట్కా).. కొబ్బరి నూనె” అని సమాధానం ఇచ్చారు. విదేశీ బ్రాండ్లు, రసాయన ఉత్పత్తుల కంటే మన ఇంట్లో దొరికే కొబ్బరి నూనెకే తాను ప్రాధాన్యత ఇస్తానని ఆమె చెప్పడం విశేషం. ఈ ఇంటర్వ్యూలో ఆమె హాఫ్-టైడ్ లుక్ ఇంకా సాఫ్ట్ వేవ్స్‌తో ఎంతో హుందాతనాన్ని ప్రదర్శించారు. ప్రపంచ వేదికపై భారతీయ సంప్రదాయ చిట్కాను ఆమె గర్వంగా చెప్పడం భారతీయ అభిమానులను ఎంతో ఆకట్టుకుంది.

లండన్ కన్సర్ట్‌లో శ్రేయ కేవలం తన హిట్ సాంగ్స్ మాత్రమే కాకుండా, లెజెండరీ సింగర్ ఆశా భోస్లేకు అద్భుతమైన నివాళి అర్పించారు. భారతీయ సంగీతానికి ఆశా భోస్లే చేసిన కృషిని కొనియాడుతూ.. ఆమె పాడిన ‘దమ్ మారో దమ్’, ‘అభి నా జావో చోడ్ కర్’ వంటి క్లాసిక్ సాంగ్స్‌ను శ్రేయ ఆలపించి ప్రేక్షకులను ఉర్రూతలూగించారు. ఆశా భోస్లే తన అద్భుతమైన పాటలతో ప్రపంచానికి ఎంతో ఇచ్చారని, సంగీత ప్రేమికులు ఆమెను ఎప్పటికీ గుర్తుంచుకుంటారని శ్రేయ భావోద్వేగంతో చెప్పారు.

శ్రేయ పాడిన తీరు, ఆశా భోస్లే పట్ల ఆమె చూపిన గౌరవం చూసి సంగీత ప్రియులు హర్షం వ్యక్తం చేస్తున్నారు. శ్రేయా ఘోషల్ వంటి గాయనులు తమ ప్రతిభతో అంతర్జాతీయ స్థాయికి వెళ్లడమే కాకుండా, మన సంప్రదాయాలను, పాత తరం గాయనీ గాయకుల గొప్పతనాన్ని నేటి తరానికి పరిచయం చేయడం నిజంగా ప్రశంసనీయం. సంగీతం, అందం రెండింటిలోనూ ఆమె చూపిన స్పష్టత ఎంతో మందికి స్ఫూర్తిదాయకం.