‘ఆర్ఆర్ఆర్’ రిలీజ్‌ కోసం ఎదురుచూస్తోన్న బడా నిర్మాత.. ఎందుకంటే..!

ఎన్టీఆర్, రామ్ చరణ్‌లతో రాజమౌళి తెరకెక్కిస్తోన్న క్రేజీ మల్టీస్టారర్‌ ‘ఆర్ఆర్‌ఆర్’ కోసం యావత్ దేశ సినీ ప్రియులు ఎదురుచూస్తున్నారు. మొదటిసారిగా ఇద్దరు స్టార్ హీరోలతో జక్కన్న తీస్తున్న ఈ సినిమా ‘బాహుబలి’ రికార్డులను తిరగరాస్తుందని అందరూ భావిస్తున్నారు. కాగా ఈ మూవీ కోసం సినీ ప్రేక్షకుల్లాగానే టాలీవుడ్‌కు చెందిన ఓ బడా నిర్మాత ఎదురుచూస్తున్నారట. ఆ మూవీ విడుదల తరువాతే తన డ్రీమ్ ప్రాజెక్ట్‌ను తెరకెక్కించాలని ఆయన అనుకుంటున్నారట. ఇంతకు ఆయనెవరంటే.. అల్లు అరవింద్.

కొన్ని నెలల క్రితం అల్లు అరవింద్ రూ.1500కోట్లతో రామాయణం ప్రాజెక్ట్‌ను ప్రకటించిన విషయం తెలిసిందే. మధు మంతెన, నమిత్‌ మల్హోత్రాతో కలిసి ఈ ప్రాజెక్ట్‌ను పలు భారతీయ భాషల్లో తెరకెక్కించబోతున్నట్లు ఆయన వెల్లడించారు. అయితే అధికారిక ప్రకటన వచ్చి చాలా నెలలే గడవడం.. ఆ తరువాత ఆ మూవీకి సంబంధించిన ఎలాంటి అప్‌డేట్ లేకపోవడంతో.. ఈ ప్రాజెక్ట్‌ ఆగిపోయిందన్న పుకార్లు మొదలయ్యాయి. కానీ తాజా సమాచారం ప్రకారం ఈ సినిమా ఆగిపోలేదట. ఆర్ఆర్ఆర్ మూవీ విడుదల తరువాత ఈ ప్రాజెక్ట్‌ను తెరకెక్కించాలని అల్లు అరవింద్ అనుకుంటున్నారట. పీరియడ్ డ్రామాగా ఆర్ఆర్ఆర్‌ తెరకెక్కుతుండగా.. దేశవ్యాప్తంగా ఆ సినిమాకు వచ్చే స్పందనను చూసి.. రామాయణంను తెరకెక్కించాలని అల్లు అరవింద్ భావిస్తున్నట్లు సమాచారం. మరి ఈ సినిమా ఎప్పుడు తెరకెక్కనుంది..? ఇందులో ఎవరెవరు నటించబోతున్నారు..? ఏ దర్శకుడు ఆ సినిమాకు దర్శకత్వం వహించబోతున్నారు..? అనే ప్రశ్నలకు సమాధానం తెలియాలంటే కొద్ది రోజులు ఆగాల్సిందే.

Read This Story Also: చిరు సినిమాలో కీలక పాత్రలో బన్నీ..!