కోమాలోకి వెళ్లి గతాన్ని మర్చిపోయిన ఆ నటి మళ్లీ వస్తోంది

అను అగర్వాల్‌.. ఈ నటి అందరికీ గుర్తుండకపోవచ్చు. కానీ 90లలో సినిమాలను బాగా చూసే వారికి ఈ పేరు కచ్చితంగా గుర్తుంటుంది. తిరుడ తిరుడ(తెలుగులో దొంగ దొంగ), ఆషుఖీ వంటి హిట్‌ చిత్రాల్లో ఆమె నటించారు. చేసింది కొన్ని చిత్రాలే అయినా టాప్‌ దర్శకులు, గుర్తుండిపోయే పాత్రల్లో నటించారు అను అగర్వాల్‌. అయితే అనుకోకుండా జరిగిన ఓ ప్రమాదం ఆమె కెరీర్‌ను దెబ్బ తీసింది. అంతేకాదు తన గతాన్ని మర్చిపోయేలా చేసింది. వినడానికి కాస్త సినిమా స్టోరీలా ఉన్నా.. ఈ సంఘటనలు అను జీవితంలో నిజంగానే జరిగాయి.

1999లో అను ఓ యాక్సిడెంట్‌కు గురి కాగా.. 29 రోజుల పాటు కోమాలో ఉండిపోయారు. అప్పటివరకు జరిగిన గతాన్ని మర్చిపోయారు. ఆ తరువాత పలు చికిత్స ద్వారా కోలుకున్న ఆమె పవర్‌ లిఫ్టర్‌గా పేరు తెచ్చుకున్నారు. ఇదిలా ఉంటే దాదాపు 20 సంవత్సరాల తరువాత ఈ నటి రీ ఎంట్రీ ఇవ్వబోతున్నారు. అను అగర్వాల్‌ జీవిత కథ ఆధారంగా ఓ వెబ్‌ సిరీస్‌ను తెరకెక్కిస్తున్నారు. ఇందులో ఇప్పటి అనుగా ఆమె నటించబోతున్నారు. ఇక ఆమెకు చెందిన యంగ్ పాత్రలో మరో యువ నటి నటించబోతున్నట్లు తెలుస్తోంది.