ఆర్జీ కార్ బాధితురాలి తల్లికి బీజేపీ టికెట్.. రత్న దేబ్‌నాథ్ ఆడబిడ్డల గొంతుక అవుతారుః కేంద్ర మంత్రి

Union Minister Dharmendra Pradhan

పశ్చిమ బెంగాల్ అసెంబ్లీ ఎన్నికల కోసం భారతీయ జనతా పార్టీ (BJP) బుధవారం (మార్చి 25) తన మూడవ అభ్యర్థుల జాబితాను విడుదల చేసింది. ఆర్.జి. కార్ మెడికల్ కాలేజ్ అండ్ హాస్పిటల్‌లో లైంగికదాడి బాధితురాలు ట్రైనీ డాక్టర్ తల్లి రత్న దేబ్‌నాథ్‌తో సహా ఈ జాబితాలో 19 మంది అభ్యర్థులు ఉన్నారు. బీజేపీ ఆమెను ఉత్తర 24 పరగణాల జిల్లాలోని పానిహటి నుండి బరిలోకి దింపుతోంది. అలాగే, మాజీ ఎన్‌ఎస్‌జీ కమాండో అయిన దీపంజన్ చక్రవర్తిని హుగ్లీలోని ఉత్తరపారా నియోజకవర్గం నుంచి పోటీకి నిలబెట్టింది.

బీజేపీ జాబితాలో రత్న దేబ్‌నాథ్‌కు చోటు కల్పించడం పట్ల కేంద్ర మంత్రి ధర్మేంద్ర ప్రధాన్ సంతోషం వ్యక్తం చేశారు. పానిహటి నుండి బీజేపీ తరఫున రత్న దేబ్‌నాథ్ అభ్యర్థిత్వం కేవలం ఎన్నికకు సంబంధించినది కాదని, ఇది బెంగాల్ ఆడపిల్లల కోసం వినిపించే బలమైన గొంతుక అని ఆయన అన్నారు. మహిళలను ఇకపై అణచివేయలేరన్న సందేశాన్ని ఇది పంపుతోందన్నారు. ఒక తల్లి దుఃఖం ఇప్పుడు యావత్ రాష్ట్రానికి న్యాయం కోసం చేసే పోరాటానికి నాంది పలుకుతారన్నారు.

మహిళల భద్రత, గౌరవం కోసం నేడు తమ గళం ఒక ప్రధాన ఉద్యమంగా మారిందని ధర్మేంద్ర ప్రధాన్ అన్నారు. మహిళలకు భద్రత కల్పించడంలో మమతా బెనర్జీ, టీఎంసీ ప్రభుత్వం పూర్తిగా విఫలమయ్యారని ఆయన విమర్శించారు. వ్యవస్థాగత నిర్లక్ష్యం వల్ల లెక్కలేనన్ని మహిళల గొంతులు నొక్కారన్నారు. ఈ ఎన్నిక కేవలం రాజకీయాలకు సంబంధించినది కాదని, తప్పొప్పులకు సంబంధించినదన్నారు. బెంగాల్‌లోని ప్రతి ఆడబిడ్డకు భద్రత, జవాబుదారీతనం, మెరుగైన భవిష్యత్తు లభించేలా ఒక తల్లి ధైర్యం ఇప్పుడు ఈ విచ్ఛిన్నమైన వ్యవస్థను సవాలు చేస్తోందని ప్రధాన్ స్పష్టం చేశారు.

భారత ఎన్నికల సంఘం మార్చి 15న అసెంబ్లీ ఎన్నికల షెడ్యూల్‌ను విడుదల చేసింది. ఆ మరుసటి రోజే, బీజేపీ 144 మంది అభ్యర్థుల పేర్లతో కూడిన తన మొదటి అభ్యర్థుల జాబితాను విడుదల చేసింది. కొన్ని రోజుల తర్వాత, బీజేపీ 111 మంది అభ్యర్థులు మరియు బీజేపీ మద్దతు ఉన్న ఒక అభ్యర్థితో కూడిన తన రెండవ జాబితాను విడుదల చేసింది. బీజేపీ మొదటి, రెండవ జాబితాలను కలిపి మొత్తం 256 మంది అభ్యర్థులను ప్రకటించింది. అప్పటి నుండి, మిగిలిన 38 స్థానాలకు అభ్యర్థులను ఎప్పుడు ప్రకటిస్తారనే దానిపై ఊహాగానాలు జోరుగా సాగుతున్నాయి. చివరకు, బుధవారం సాయంత్రం బీజేపీ అభ్యర్థుల మూడవ జాబితాను విడుదల చేసింది. ఈ జాబితాలో ఇద్దరు మహిళలతో సహా 19 మంది అభ్యర్థుల పేర్లు ఉన్నాయి. వారిలో ఒకరు మధుమిత ఘోష్, ఈమె హుగ్లీలోని హరిపాల్ నియోజకవర్గం నుంచి పోటీ చేయనున్నారు. మరొకరు ఆర్.జి. కార్ బాధితురాలి తల్లి, ఈమెను పానిహటి నియోజకవర్గం నుంచి బరిలోకి దింపుతోంది.

2024 ఆగస్టులో, ఆర్.జి. కార్ మెడికల్ కాలేజీలో ఒక మహిళా వైద్యురాలిపై దారుణంగా లైంగిక దాడి చేసి, ఆ తర్వాత హత్య చేయడంతో దేశవ్యాప్త నిరసనలు వెల్లువెత్తాయి. భారతీయ జనతా పార్టీ బుధవారం బెంగాల్ ఎన్నికల కోసం 19 మంది అభ్యర్థులతో కూడిన తన మూడవ జాబితాను విడుదల చేసింది.

మరిన్ని జాతీయ వార్తల కోసం ఇక్కడ క్లిక్ చేయండి..