Warren Buffett: ఆ ఒక్క మాట.. వారెన్‌ బఫెట్‌ ఇంత వాడ్ని చేసిందని తెలుసా?

ప్రపంచ ప్రఖ్యాత పెట్టుబడిదారుడు వారెన్‌ బఫెట్‌ సక్సెస్‌ వెనుక ఓ ఆసక్తికరమైన కథ ఉంది. బిలియన్ల డాలర్ల సంపద కలిగినప్పటికీ అత్యంత నిరాడంబరమైన జీవితం గడిపే బఫెట్‌ను ప్రపంచంలోనే అత్యంత క్రమశిక్షణ గల పెట్టుబడిదారుడిగా తీర్చిదిద్దడంలో ఆయన తల్లి లీలా స్టాల్ బఫెట్ కీలక పాత్ర పోషించారని చాలా తక్కువ మందికి తెలుసు. ప్రఖ్యాత రచయిత్రి ఆలిస్ ష్రోడర్ తన జీవితచరిత్ర ది స్నోబాల్‌లో బఫెట్ బాల్యాన్ని వివరించారు. ఆమె ప్రకారం.. బఫెట్ చిన్ననాటి జీవితం సాధారణ ధనిక కుటుంబాల పిల్లల మాదిరిగా సుఖసౌకర్యాలతో నిండినది కాదు. ఆయన తల్లి చాలా కఠినమైన క్రమశిక్షణను పాటించేవారు. ఇంట్లో చిన్న విషయాలకే ఉద్రిక్తత నెలకొనేదని, తల్లి కోపంగా ఉంటే ఇల్లంతా నిశ్శబ్దంగా మారిపోయేదని బఫెట్ తరువాత గుర్తుచేసుకున్నారు.

అయితే అదే కఠిన వాతావరణం ఆయనలో ఆర్థిక క్రమశిక్షణకు పునాది వేసిందని విశ్లేషకులు చెబుతున్నారు. చిన్న వయసులోనే డబ్బు విలువ, పొదుపు, ఖర్చుల నియంత్రణ వంటి విషయాలను బఫెట్ ఇంట్లోనే నేర్చుకున్నారు. ఇతర పిల్లలు బొమ్మలపై ఆసక్తి చూపుతున్న సమయంలో, బఫెట్ మాత్రం చూయింగ్ గమ్ అమ్మడం, కోకాకోలా బాటిళ్లు సరఫరా చేయడం, వార్తాపత్రికలు పంపిణీ చేయడం ద్వారా డబ్బు సంపాదించేవారు. ఆ సంపాదనను ఖర్చు చేయకుండా పెట్టుబడిగా మార్చడం ఆయన అలవాటుగా చేసుకున్నారు.

ఈ అనుభవాలే తరువాత ఆయన పెట్టుబడి తత్వానికి మూలాధారమయ్యాయి. స్టాక్ మార్కెట్‌లో ఓర్పు, క్రమశిక్షణ, భావోద్వేగ నియంత్రణ వంటి లక్షణాలను బఫెట్ అత్యంత ముఖ్యంగా భావిస్తారు. అందుకే మార్కెట్లు కుప్పకూలినా ఆయన ప్రశాంతంగానే ఉంటారని విశ్లేషకులు చెబుతున్నారు. ప్రపంచంలోని అత్యంత ధనవంతుల జాబితాలో ఉన్నప్పటికీ, బఫెట్ ఇప్పటికీ దశాబ్దాల క్రితం కొనుగోలు చేసిన అదే సాధారణ ఇంట్లో నివసించడం ఆయన సరళతకు నిదర్శనంగా చెప్పబడుతోంది. ఈ మాతృదినోత్సవం సందర్భంగా, ఒక కఠినమైన తల్లే ప్రపంచంలోనే అత్యంత విజయవంతమైన పెట్టుబడిదారుడిని తీర్చిదిద్దిందనే కథ అనేక మందిని ఆలోచింపజేస్తోంది.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి