Gold Investment: బంగారానికి మెరుగైన ప్రత్యామ్నాయం అదే.. పెట్టుబడిదారులకు ఇక పండగే..!
భారతదేశంలో చాలా ఏళ్లుగా ప్రజలు బంగారం కొనుగోలుకు మక్కువ చూపుతూ ఉంటారు. అయితే భారతదేశంలో ప్రతి ఏటా కొనుగోలు చేసే బంగారంలో ఎక్కువ శాతం దిగుమతి చేసుకోవాల్సి వస్తుంది. అందువల్ల బంగారాన్ని కేవలం పెట్టుబడిగా చూసే పెట్టుబడిదారుల కోసం ప్రభుత్వం డిజిటల్ గోల్డ్, గోల్డ్ ఈటీఎఫ్ వంటి ప్రత్యామ్నాయ కొనుగోలు ఎంపికలను అందుబాటులోకి తెచ్చింది. చోరీ భయాలు వంటి ఇబ్బంది లేని ప్రత్యామ్నాయ పథకాల గురించి ఓ సారి తెలుసుకుందాం.
ప్రస్తుతం భారతదేశంలో దీపావళి పండుగ సందడి నెలకొంది. దీపావళి అంటే కచ్చితంగా లక్ష్మీ పూజ చేస్తూ ఉంటారు. అందువల్ల బంగారం కొనుగోలు అనేది దీపావళికి తప్పనిసరి అంటారు. అయితే దీపావళికి ఆభరణం రూపంలో బంగారం కొనుగోలు చేయకుండా వివిధ ప్రత్యామ్నాయ ఎంపికల ద్వారా బంగారం కొనుగోలు చేస్తే అధిక లాభాలు ఉంటాయని నిపుణులు చెబుతున్నారు. ప్రపంచ ఆర్థిక మందగమనం కారణంగా బంగారం ప్రజాదరణ పొందింది. నేషనల్ సెంటర్ ఫర్ ఫైనాన్షియల్ ఎడ్యుకేషన్కు సంబంధించిన అధికారిక పోర్టల్లో ఆర్థిక అవగాహన కోసం అందుబాటులో ఉన్న సమాచారం ప్రకారం ఇతర మార్గాల గురించి ఓ సారి లుక్కేద్దాం.
బంగారు ఆభరణాలు
బంగారాన్ని ఆభరణాలు, కడ్డీలు, నాణేలు రూపంలో కొనుగోలు చేయడం భారతదేశంలో అనాదిగా వస్తుంది. బార్లు, నాణేలను కొనుగోలు చేసే వారికి, బ్యాంకులు ట్యాంపర్ ప్రూఫ్ ప్యాకేజింగ్లో ఎంపికలను అందిస్తాయి. ఇవి ప్రామాణికత, స్వచ్ఛతను నిర్ధారిస్తాయి. అయినప్పటికీ, ఆభరణాలు అధిక మేకింగ్ ఛార్జీలతో లభిస్తాయి, ఇది ఖరీదైన ఎంపిక అని నిపుణులు చెబుతున్నారు
గోల్డ్ ఈటీఎఫ్లు
రిటైల్ ఇన్వెస్టర్లలో గోల్డ్ ఈటీఎఫ్లు ప్రముఖ ఎంపికగా మారాయి. ప్రతి ఈటీఎఫ్ యూనిట్ ఒక గ్రాము బంగారాన్ని సూచిస్తుంది, ఎలక్ట్రానిక్ పద్ధతిలో డీమ్యాట్ ఖాతాలో జమ అవుతుంది. అలాగే ఇది స్టాక్ ఎక్స్ఛేంజీలలో వర్తకం అవుతుంది. ఈ ఫార్మాట్ మెరుగైన భద్రత, సులభమైన లిక్విడిటీ, నిల్వ ఆందోళనల నుండి స్వేచ్ఛను అందిస్తుంది. గోల్డ్ ఈటీఎఫ్లు 99.5 శాతం స్వచ్ఛత స్టాండర్డ్ గోల్డ్ బులియన్తో వస్తాయి. భౌతిక బంగారంలా కాకుండా గోల్డ్ ఈటీఎఫ్లు సంపద పన్ను, వ్యాట్ నుంచి మినహాయింపు పొందవచ్చు. ప్రస్తుతం 14 ఫండ్ హౌస్లలో 25కి పైగా గోల్డ్ ఈటీఎఫ్ పథకాలు అందుబాటులో ఉన్నాయి.
గోల్డ్ ఫండ్ ఆఫ్ ఫండ్స్
గోల్డ్ ఎఫ్ఓఎఫ్లు గోల్డ్ ఈటీఎఫ్లలో పెట్టుబడి పెట్టే ఫండ్లు, డిమ్యాట్ ఖాతా అవసరాన్ని తొలగిస్తాయి. అలాగే పెట్టుబడిదారులు బంగారంలో సిప్లను (సిస్టమాటిక్ ఇన్వెస్ట్మెంట్ ప్లాన్లు) ఎంచుకోవడానికి అనుమతిస్తాయి. ఈ ఎంపిక సౌకర్యవంతంగా ఉన్నప్పటికీ ఒక సంవత్సరంలోపు రీడీమ్ చేస్తే 1-2 శాతం ఎగ్జిట్ లోడ్, సుమారు 1.5 శాతం అదనపు వ్యయ నిష్పత్తి వంటి ఖర్చులు ఉంటాయి.
డిజిటల్ గోల్డ్
నేషనల్ స్పాట్ ఎక్స్ఛేంజ్ లిమిటెడ్ అందించే ఈ -గోల్డ్ బంగారం యాజమాన్యానికి మరో డిజిటల్ మార్గాన్ని అందిస్తుంది. ఒక గ్రాము బంగారానికి సమానమైన ఈ-గోల్డ్ యూనిట్లు డీమ్యాట్ ఖాతాలో ఉంచుతారు. పూర్తిగా భౌతిక బంగారంతో మద్దతు ఉంటుంది. ట్రేడింగ్ వారాంతపు రోజుల్లో ఉదయం 10 నుంచి రాత్రి 11:30 గంటల మధ్య జరుగుతుంది. దీర్ఘకాలిక మూలధన లాభాల పన్ను ప్రయోజనం మూడు సంవత్సరాల తర్వాత వర్తిస్తుంది. గోల్డ్ ఈటీఎఫ్లు లేదా ఎఫ్ఓఎఫ్ల్లా కాకుండా ఒక సంవత్సరం తర్వాత దానిని అందిస్తాయి.
గోల్డ్ ఫ్యూచర్స్
రిస్క్ ఎక్కువ ఉన్న వారికి ఎంసీఎక్స్, ఎన్సీడీఈఎక్స్ వంటి కమోడిటీ ఎక్స్ఛేంజీలలో ఫ్యూచర్స్ కాంట్రాక్ట్ ద్వారా బంగారం ధర మార్పుల నుంచి లాభం పొందేందుకు గోల్డ్ ఫ్యూచర్స్ ఒక మార్గాన్ని అందిస్తాయి. ఈ విధానం పెట్టుబడిదారులను భవిష్యత్తులో బంగారం ధరలో లాక్ చేయడానికి అనుమతిస్తుంది. అయితే ఈ విధానం ఫ్యూచర్స్ ట్రేడింగ్ అధిక నష్టాలను కలిగి ఉంటుంది. మార్కెట్ అంచనాలు తెలుసుకోకపోతే గణనీయంగా నష్టపోవాల్సి వస్తుంది.
మరిన్ని బిజినెస్ వార్తల కోసం ఇక్కడ క్లిక్ చేయండి
