భారీగా పెరిగి భారత్‌ బొగ్గు ఎగుమతులు! ఏ దేశానికి అమ్ముతుంది? ఎంత ఆదాయ వస్తుందంటే..?

భారతదేశ బొగ్గు ఎగుమతులు గణనీయంగా పెరిగాయి. ప్రభుత్వ డేటా ప్రకారం.. 2024-25 ఆర్థిక సంవత్సరంలో బొగ్గు ఎగుమతులు 23.4 శాతం పెరిగి 1.908 మిలియన్ టన్నులకు (MT) చేరుకుంటాయని అంచనా. ఇది 2023-24లో 1.546 MTగా ఉంది. ఈ గణాంకాలు తాత్కాలికమే కానీ భారత్‌ ఇప్పుడు ప్రపంచ బొగ్గు మార్కెట్‌లో తన పట్టును బలోపేతం చేసుకునే దిశగా పయనిస్తోందని ఈ లెక్కలు స్పష్టంగా చెబుతున్నాయి.

భారీ ఆదాయం

విలువ పరంగా 2024-25లో బొగ్గు ఎగుమతులు రూ.1,828.2 కోట్లు కాగా, గత సంవత్సరం రూ.1,643.4 కోట్లుగా ఉన్నాయి. భారత్‌ బొగ్గు ఎగుమతుల ద్వారా గణనీయమైన ఆదాయం పొందుతుందని లెక్కలే స్పష్టం చేస్తున్నాయి.

మన బొగ్గు ఏ దేశాలకు వెళుతుంది?

నేపాల్, బంగ్లాదేశ్, భూటాన్ వంటి పొరుగు దేశాలకు మన దేశం బొగ్గును ఎగుమతి చేస్తుంది. ఒక అధ్యయనం ప్రకారం భారతదేశం దాని పొరుగు దేశాలకు సుమారు 15 మిలియన్ టన్నుల బొగ్గును ఎగుమతి చేసే సామర్థ్యాన్ని కలిగి ఉంది. బొగ్గు ఎగుమతులను ప్రోత్సహించడం, దేశీయ ఉత్పత్తిని పెంచడం, దిగుమతులపై ఆధారపడటాన్ని తగ్గించడం ద్వారా దేశాన్ని ఇంధన స్వయం సమృద్ధిగా మార్చాలని ప్రభుత్వం లక్ష్యంగా పెట్టుకుంది. నివేదికల ప్రకారం.. భారతదేశం బంగ్లాదేశ్‌కు 8 మిలియన్ టన్నుల బొగ్గును, మయన్మార్‌కు 3 మిలియన్ టన్నులను, నేపాల్‌కు 2 మిలియన్ టన్నులను, ఇతర దేశాలకు 2 మిలియన్ టన్నుల బొగ్గును ఎగుమతి చేయగల సామర్థ్యాన్ని కలిగి ఉంది. భారతదేశం తన దేశీయ అవసరాలను తీర్చడానికి బొగ్గును కూడా తవ్వుతుంది.

ఎగుమతులు ఆర్థికాభివృద్ధికి సహాయపడతాయి

బొగ్గు ఉత్పత్తి, ఎగుమతులు పెరగడం వల్ల ప్రభుత్వ ఆదాయం పెరగడమే కాకుండా కొత్త ఉపాధి అవకాశాలు కూడా ఏర్పడతాయి. అంతేకాకుండా ఇది భారతదేశ ఆర్థిక వృద్ధికి గణనీయంగా దోహదపడుతుంది. బొగ్గు దిగుమతులను తగ్గించడం, ఎగుమతులను పెంచడం భారతదేశ ఇంధన భద్రతకు కీలకమైన అడుగు. దేశీయ బొగ్గుపై ఆధారపడటాన్ని పెంచడం ద్వారా, ప్రపంచ మార్కెట్‌లో ధరల హెచ్చుతగ్గుల ప్రభావం నుండి దేశం తనను తాను రక్షించుకోగలదు.

మరిన్ని బిజినెస్‌ వార్తల కోసం ఇ‍క్కడ క్లిక్‌ చేయండి