Post Office: RDలో నెలకు రూ.5,000 పెట్టితే.. 5 ఏళ్ల తర్వాత ఎంత వస్తుంది?

భద్రతతో కూడిన పెట్టుబడులను కోరుకునే మధ్యతరగతి ప్రజలకు ఇండియా పోస్ట్‌ అందించే చిన్న పొదుపు పథకాలు ఎంతో ప్రాచుర్యం పొందాయి. ముఖ్యంగా ఎలాంటి మార్కెట్ రిస్క్ లేకుండా స్థిరమైన రాబడిని ఆశించే వారికి పోస్ట్ ఆఫీస్ రికరింగ్ డిపాజిట్ (RD) పథకం మంచి ఎంపికగా భావిస్తారు. చిన్న మొత్తాలతో ప్రారంభించి, క్రమం తప్పకుండా పొదుపు చేసే అలవాటు పెంపొందించడానికి కూడా ఈ పథకం ఉపయోగపడుతుంది. పోస్ట్ ఆఫీస్ RD పథకం బ్యాంకుల రికరింగ్ డిపాజిట్‌ల మాదిరిగానే పనిచేస్తుంది. ఇందులో ప్రతి నెలా ఒక నిర్ణీత మొత్తాన్ని జమ చేయాలి. ప్రస్తుతం ఈ పథకంపై వార్షిక వడ్డీ రేటు 6.7 శాతంగా ఉంది. ఈ పథకం కాలపరిమితి 5 సంవత్సరాలు లేదా 60 నెలలు.

ఈ పథకంలో కనీసంగా నెలకు రూ.100తో పెట్టుబడి ప్రారంభించవచ్చు. గరిష్ట పరిమితి లేకపోవడం ప్రత్యేకత. అంటే, మీ ఆర్థిక సామర్థ్యానికి అనుగుణంగా ఎంత మొత్తమైనా ప్రతి నెలా జమ చేయవచ్చు. ఉదాహరణకు మీరు ప్రతి నెలా రూ.5,000 చొప్పున 5 సంవత్సరాల పాటు క్రమం తప్పకుండా పెట్టుబడి పెడితే, మొత్తం జమ చేసిన డబ్బు రూ.3 లక్షలు అవుతుంది. ప్రస్తుతం అమల్లో ఉన్న 6.7 శాతం వడ్డీ రేటు ప్రకారం, మెచ్యూరిటీ సమయంలో మీకు సుమారు రూ.3,56,830 లభిస్తుంది.

అంటే మీ పెట్టుబడిపై దాదాపు రూ.56,830 వరకు వడ్డీ రూపంలో అదనపు ఆదాయం పొందవచ్చు. రిస్క్ లేకుండా క్రమబద్ధమైన పొదుపు చేయాలనుకునే వారికి ఇది స్థిరమైన ఎంపికగా చెప్పవచ్చు. అదనంగా పోస్ట్ ఆఫీస్ RDలో పెట్టుబడి పెట్టడం ద్వారా భవిష్యత్ అవసరాల కోసం చిన్న మొత్తాలతో పెద్ద నిధిని సృష్టించుకోవచ్చు. పిల్లల విద్య, అత్యవసర ఖర్చులు లేదా కుటుంబ భద్రత కోసం దీర్ఘకాలిక పొదుపు చేయాలనుకునే వారికి ఈ పథకం అనుకూలంగా ఉంటుంది.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి