పెట్రోల్లో ఇథనాల్ మిక్స్ పెంపు? 20 నుంచి 25 శాతానికి.. కారణం ఏంటంటే?
పశ్చిమ ఆసియా ఉద్రిక్తతల నేపథ్యంలో భారత్ ఇంధన భద్రతపై దృష్టి సారించింది. ముడి చమురు దిగుమతులను తగ్గించేందుకు పెట్రోల్లో ఇథనాల్ మిశ్రమాన్ని 20 శాతం నుండి 25 శాతానికి పెంచాలని యోచిస్తోంది. దీనివల్ల విదేశీ మారక ద్రవ్యం ఆదా అవడమే కాకుండా, వ్యూహాత్మక చమురు నిల్వలు, దేశీయ రిఫైనరీ సామర్థ్యం పెంపు, పునరుత్పాదక ఇంధనాల వాడకంతో ఇంధన స్వయం సమృద్ధిని సాధించాలని లక్ష్యంగా పెట్టుకుంది.
పశ్చిమ ఆసియాలో పెరుగుతున్న ఉద్రిక్తతలు, ప్రపంచ చమురు సరఫరా అనిశ్చితి నేపథ్యంలో భారతదేశం ఇంధన భద్రతపై మరింత దృష్టి సారిస్తోంది. దిగుమతి చేసుకునే ముడి చమురుపై ఆధారాన్ని తగ్గించేందుకు, పెట్రోల్లో ఇథనాల్ మిశ్రమాన్ని ప్రస్తుత 20 శాతం నుంచి 25 శాతానికి పెంచే అవకాశాన్ని కేంద్ర ప్రభుత్వం పరిశీలిస్తున్నట్లు సమాచారం. ఈ మార్పును దశలవారీగా అమలు చేసే అవకాశం ఉంది. పశ్చిమ ఆసియాలో కొనసాగుతున్న ఘర్షణల కారణంగా అంతర్జాతీయ మార్కెట్లో ముడి చమురు ధరలు భారీగా పెరిగాయి. ఈ పరిస్థితుల్లో దేశీయ ఇంధన భద్రతను బలోపేతం చేయడం అత్యవసరమైందని కేంద్ర ప్రభుత్వం భావిస్తోంది.
ప్రభుత్వ వర్గాల ప్రకారం, ప్రస్తుతం అమల్లో ఉన్న 20 శాతం ఇథనాల్ మిశ్రమ విధానం వల్ల భారత్కు ప్రతి సంవత్సరం సుమారు 45 మిలియన్ బ్యారెళ్ల ముడి చమురు దిగుమతులు తగ్గాయి. దీని ద్వారా దాదాపు రూ.1.5 లక్షల కోట్ల విలువైన విదేశీ మారక ద్రవ్యం ఆదా అయినట్లు అంచనా. అయితే ఇథనాల్ మిశ్రమాన్ని 25 శాతానికి పెంచే విషయంలో ప్రభుత్వం జాగ్రత్తగా ముందుకు సాగుతోంది. వాహనాల మైలేజీ, ఇంజిన్ పనితీరు, దీర్ఘకాలిక ప్రభావాలు వంటి అంశాలపై ఇంకా అధ్యయనాలు కొనసాగుతున్నాయి. ముఖ్యంగా పాత వాహనాలపై అధిక ఇథనాల్ మిశ్రమం ప్రభావం ఎలా ఉంటుందనే దానిపై పరిశీలన జరుగుతోంది.
ఇక మరోవైపు దేశీయ చమురు శుద్ధి సామర్థ్యాన్ని కూడా భారత్ వేగంగా పెంచుతోంది. బార్మర్ రిఫైనరీ కార్యకలాపాలు ప్రారంభించగా, నుమాలిగఢ్ రిఫైనరీ విస్తరణ పనులు కొనసాగుతున్నాయి. అదనంగా మహారాష్ట్ర, గుజరాత్ రాష్ట్రాల్లో కొత్త రిఫైనరీ ప్రాజెక్టులు నిర్మాణ దశలో ఉన్నాయి. ప్రపంచ సరఫరా అంతరాయాల సమయంలో దేశానికి సరిపడా చమురు నిల్వలు ఉండేలా వ్యూహాత్మక పెట్రోలియం నిల్వలను కూడా ప్రభుత్వం బలోపేతం చేస్తోంది.
ఇంధన నిపుణుల అభిప్రాయం ప్రకారం, పునరుత్పాదక ఇంధనం, జీవ ఇంధనాలు, హరిత హైడ్రోజన్ ఇప్పుడు కేవలం పర్యావరణ పరిరక్షణ అంశాలు మాత్రమే కాకుండా దేశ ఆర్థిక భద్రతకు సంబంధించిన వ్యూహాత్మక అవసరాలుగా మారుతున్నాయి. స్వచ్ఛమైన ఇంధన వినియోగాన్ని వేగంగా పెంచడం ద్వారా భవిష్యత్తులో అంతర్జాతీయ చమురు ధరల హెచ్చుతగ్గుల ప్రభావాన్ని తగ్గించడంతో పాటు, ఇంధన రంగంలో భారత్ మరింత స్వయం సమృద్ధిని సాధించే అవకాశముందని విశ్లేషకులు భావిస్తున్నారు.
మరిన్ని బిజినెస్ వార్తల కోసం ఇక్కడ క్లిక్ చేయండి