Dengue Vaccine: డెంగ్యూ నుంచి రక్షణకు గుడ్ న్యూస్.. డెంగ్యూ వ్యాక్సిన్ వచ్చేసిందోచ్..!

భారతదేశంలో డెంగ్యూ నియంత్రణలో కీలక మలుపు తిరిగింది. జపాన్‌కు చెందిన ప్రముఖ ఔషధ సంస్థ టకేడా అభివృద్ధి చేసిన QDENGA (TAK-003) డెంగ్యూ వ్యాక్సిన్‌కు భారత ఔషధ నియంత్రణ సంస్థ (CDSCO) ఆమోదం తెలిపింది. దీంతో దేశంలో నియంత్రణ అనుమతి పొందిన తొలి డెంగ్యూ వ్యాక్సిన్‌గా ఇది నిలిచింది. దశాబ్దాలుగా దోమల నియంత్రణ, ముందస్తు నిర్ధారణ, సహాయక చికిత్సలకే పరిమితమైన డెంగ్యూ నివారణకు ఇప్పుడు టీకా రూపంలో మరో ప్రభావవంతమైన ఆయుధం అందుబాటులోకి వచ్చినట్లు నిపుణులు అభిప్రాయపడుతున్నారు.

ప్రపంచవ్యాప్తంగా నమోదవుతున్న డెంగ్యూ కేసుల్లో దాదాపు మూడింట ఒక వంతు భారతదేశంలోనే ఉండడం, గత రెండు దశాబ్దాల్లో దేశంలో డెంగ్యూ కేసులు 11 రెట్లు పెరగడం ఈ ఆమోదానికి మరింత ప్రాధాన్యతను తీసుకొచ్చాయి. ముఖ్యంగా వర్షాకాలంలో అనేక రాష్ట్రాల్లో డెంగ్యూ వ్యాప్తి కారణంగా ఆసుపత్రులపై తీవ్ర ఒత్తిడి ఏర్పడుతోంది. ఈ నేపథ్యంలో టీకా అందుబాటులోకి రావడం ప్రజారోగ్య వ్యవస్థకు పెద్ద ఊరటగా భావిస్తున్నారు.

QDENGA ప్రత్యేకత ఏమిటంటే ఇది నాలుగు రకాల డెంగ్యూ వైరస్ సెరోటైప్‌లు (DENV-1, DENV-2, DENV-3, DENV-4) నుంచి రక్షణ కల్పించే టెట్రావాలెంట్ లైవ్-అటెన్యూయేటెడ్ వ్యాక్సిన్. గతంలో డెంగ్యూ సోకిందా లేదా అనే విషయంతో సంబంధం లేకుండా ఈ టీకాను ఇవ్వవచ్చు. అందువల్ల టీకా ముందు ప్రత్యేకంగా డెంగ్యూ పరీక్ష చేయించాల్సిన అవసరం ఉండదు. మూడు నెలల వ్యవధిలో రెండు డోసులుగా ఈ వ్యాక్సిన్‌ను అందిస్తారు. డెంగ్యూ ప్రబలంగా ఉన్న ప్రాంతాల్లో 6 నుంచి 16 ఏళ్ల పిల్లలకు దీని వినియోగాన్ని ప్రపంచ ఆరోగ్య సంస్థ ఇప్పటికే సిఫార్సు చేసింది.

టకేడా తెలిపిన వివరాల ప్రకారం, భారత జనాభాపై నిర్వహించిన ఫేజ్-3 క్లినికల్ అధ్యయనాలు, అంతర్జాతీయ స్థాయి పరీక్షలు, సబ్జెక్ట్ ఎక్స్‌పర్ట్ కమిటీ సిఫార్సుల ఆధారంగా ఈ ఆమోదం లభించింది. 2022లో అంతర్జాతీయంగా విడుదలైన తర్వాత ఇప్పటివరకు 43 దేశాలు ఈ వ్యాక్సిన్‌కు అనుమతి ఇవ్వగా, ప్రపంచవ్యాప్తంగా 32 మిలియన్లకు పైగా డోసులు పంపిణీ అయ్యాయి. దీర్ఘకాలిక క్లినికల్ డేటా ప్రకారం లక్షణాలతో కూడిన డెంగ్యూ, ఆసుపత్రి చేరికల ప్రమాదాన్ని తగ్గించడంలో ఈ వ్యాక్సిన్ ప్రభావవంతంగా పనిచేస్తున్నట్లు సంస్థ వెల్లడించింది.

భారతదేశంలో వ్యాక్సిన్ ఉత్పత్తిని వేగవంతం చేసేందుకు టకేడా ఇప్పటికే హైదరాబాద్‌కు చెందిన బయోలాజికల్-ఈ సంస్థతో భాగస్వామ్యం కుదుర్చుకుంది. ఈ ఒప్పందం ప్రకారం సంవత్సరానికి 50 మిలియన్ డోసుల ఉత్పత్తి సామర్థ్యాన్ని ఏర్పాటు చేయనుంది. దీంతో దేశీయ అవసరాలతో పాటు ప్రపంచ సరఫరాకు కూడా భారత్ కీలక కేంద్రంగా మారే అవకాశం ఉంది.

అయితే వ్యాక్సిన్‌కు నియంత్రణ అనుమతి లభించినప్పటికీ, ధర, ప్రజారోగ్య టీకా కార్యక్రమంలో చేర్చే సమయం, ఏ వయస్సు వారికి ప్రాధాన్యత ఇవ్వాలి, ప్రభుత్వ ఆసుపత్రుల్లో ఉచితంగా అందుబాటులో ఉంటుందా వంటి అంశాలపై ప్రభుత్వం, ప్రజారోగ్య నిపుణులు త్వరలో నిర్ణయాలు తీసుకోనున్నారు. అయినప్పటికీ, QDENGA ఆమోదం డెంగ్యూపై భారతదేశ పోరాటంలో చారిత్రాత్మక ముందడుగుగా వైద్య నిపుణులు అభివర్ణిస్తున్నారు.

మరిన్ని హెల్త్ వార్తల కోసం ఇక్కడ క్లిక్ చేయండి..