ఎవరైనా మీకు చెక్‌ రాసి ఇస్తే.. ఇవన్నీ సరిగ్గా ఉన్నాయో లేదో చూసుకోండి!

డిజిటల్ చెల్లింపులు విస్తృతంగా పెరిగినా, పెద్ద మొత్తాల లావాదేవీల్లో చెక్కుల వినియోగం ఇప్పటికీ కొనసాగుతోంది. అయితే సరైన జాగ్రత్తలు తీసుకోకుండా చెక్ స్వీకరిస్తే మోసాలు, చెల్లింపు తిరస్కరణలు లేదా చట్టపరమైన ఇబ్బందులు ఎదురయ్యే అవకాశం ఉందని బ్యాంకింగ్ నిపుణులు హెచ్చరిస్తున్నారు. అందుకే ఎవరి నుంచి అయినా చెక్ తీసుకునే ముందు కొన్ని కీలక అంశాలను తప్పనిసరిగా పరిశీలించాలని సూచిస్తున్నారు.

మొదటగా చెక్‌పై ఉన్న తేదీని జాగ్రత్తగా చూడాలి. సాధారణంగా చెక్ జారీ చేసిన తేదీ నుంచి మూడు నెలల వరకు మాత్రమే చెల్లుబాటులో ఉంటుంది. గడువు ముగిసిన చెక్కులను బ్యాంకులు తిరస్కరిస్తాయి. అలాగే భవిష్యత్ తేదీతో ఉన్న పోస్ట్ డేటెడ్ చెక్ అయితే, ఆ తేదీ వచ్చే వరకు డిపాజిట్ చేయడం సాధ్యం కాదు.

చెక్‌పై రాసిన పేరు, మొత్తం, సంతకం స్పష్టంగా ఉన్నాయా లేదా అనేది పరిశీలించాలి. అంకెల్లో రాసిన మొత్తం, పదాల్లో రాసిన మొత్తం ఒకేలా ఉండాలి. ఎక్కడైనా కటింగ్లు, ఓవర్‌రైటింగ్, ఇంక్ మార్పులు ఉంటే జాగ్రత్తగా ఉండాలి. ముఖ్యంగా సంతకం బ్యాంక్ రికార్డులో ఉన్నదానితో సరిపోకపోతే చెక్ బౌన్స్ అయ్యే ప్రమాదం ఉంటుంది.

అలాగే చెక్‌పై అకౌంట్ పేయీ (A/C Payee) గుర్తు ఉందా లేదా బేరర్ చెక్కా అనే విషయాన్ని కూడా గమనించాలి. అకౌంట్ పేయీ చెక్కులు ఎక్కువ భద్రత కలిగినవిగా పరిగణిస్తారు. పెద్ద మొత్తాల లావాదేవీల్లో ఇలాంటి చెక్కులను మాత్రమే స్వీకరించడం మంచిదని నిపుణులు సూచిస్తున్నారు. చెక్ ఇచ్చిన వ్యక్తి ఖాతాలో సరిపడా బ్యాలెన్స్ ఉందా అనే అంశాన్ని నేరుగా తెలుసుకోవడం సాధ్యం కాకపోయినా, విశ్వసనీయ వ్యక్తుల నుంచే చెక్కులు తీసుకోవడం సురక్షితమని బ్యాంకింగ్ వర్గాలు చెబుతున్నాయి. ముఖ్యంగా వ్యాపార లావాదేవీల్లో చెక్ తీసుకునే ముందు సరైన ధృవీకరణ, రాతపూర్వక ఆధారాలు ఉండటం భవిష్యత్తులో చట్టపరమైన సమస్యలను తగ్గించడంలో సహాయపడుతుంది.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి