Money: మీ డబ్బులు ఎగ్గొట్టారా.? ఇలా చేస్తే ఇంటికి తెచ్చి మరీ ఇస్తారు..

సాధారణంగా మనం బంధువులకు, స్నేహితులకు లేదా ఇతర వ్యక్తులకు డబ్బులు అప్పుగా ఇస్తుంటాం. అయితే, వాటిని తిరిగి అడిగినప్పుడు కొంతమంది ఇవ్వకుండా తప్పించుకుంటూ ఉంటారు. ఇలాంటి పరిస్థితుల్లో మీ డబ్బును తిరిగి ఎలా పొందాలో తెలుసుకోవడం అవసరం. హైకోర్టు సీనియర్ న్యాయవాది ఈ విషయంపై విలువైన సలహాలు ఇచ్చారు. ముఖ్యంగా, అప్పు ఇచ్చేటప్పుడే కొన్ని జాగ్రత్తలు తీసుకోవడం చాలా ముఖ్యం. ఎంత సన్నిహితులు అయినా సరే, డిజిటల్ లావాదేవీలు(UPI, బ్యాంక్ ట్రాన్స్‌ఫర్) చేయడం ద్వారా డబ్బు ఇచ్చినట్లు రుజువు ఉంటుంది. ఇది ప్రామిసరీ నోటు రాసుకోలేని సందర్భాల్లో ప్రత్యామ్నాయంగా ఉపయోగపడుతుంది. ఒకవేళ నగదు రూపంలో అప్పు ఇస్తే, దానికి సాక్షులు ఉండాలి లేదా ఫోటోలు, వీడియోలు, వాట్సాప్ చాట్‌లు వంటి ఆధారాలు ఉండాలి.

డబ్బు తిరిగి ఇవ్వకపోతే, మొదటి అడుగు న్యాయవాది ద్వారా లీగల్ నోటీసు పంపించడం. దీనికి 15 రోజుల సమయం ఇస్తారు. ఈ గడువులోగా స్పందన లేకపోతే, సివిల్ ప్రొసీజర్ కోడ్(CPC)లోని ఆర్డర్ 7, రూల్ 1 ప్రకారం మనీ రికవరీ సూట్ వేయవచ్చు. ఈ సూట్ ద్వారా, కేసును బట్టి 6 శాతం నుంచి 23 శాతం వరకు వడ్డీతో సహా డబ్బు తిరిగి పొందే అవకాశాలు ఉంటాయి. చెక్ బౌన్స్ అయితే, NIA యాక్ట్ సెక్షన్ 138 కింద ప్రత్యేక చట్టపరమైన ప్రక్రియను అనుసరించవచ్చు. క్రిమినల్ కేసులు సాధారణంగా డబ్బు రికవరీకి అంతగా తోడ్పడవు, బెదిరింపులు లేదా దాడులు జరిగినప్పుడు మాత్రమే వాటికి ప్రాధాన్యత ఉంటుంది.

అప్పు తిరిగి పొందడానికి చట్టపరమైన ప్రక్రియలు..

1. లీగల్ నోటీసు: మొదట, న్యాయవాది ద్వారా అప్పు తీసుకున్న వ్యక్తికి లీగల్ నోటీసు పంపాలి. ఈ నోటీసులో, అప్పు వివరాలు, డిజిటల్ ట్రాన్సాక్షన్ నంబర్లు(ఉంటే), తిరిగి చెల్లించాల్సిన తేదీని స్పష్టంగా పేర్కొనాలి. సాధారణంగా, ఈ నోటీసుకు స్పందించడానికి 15 రోజుల సమయం ఇస్తారు.

2. మనీ రికవరీ సూట్(సివిల్ కేసు): లీగల్ నోటీసుకు 15 రోజుల గడువులోగా అప్పు తీసుకున్న వ్యక్తి స్పందించకపోతే లేదా డబ్బు తిరిగి చెల్లించకపోతే, సివిల్ ప్రొసీజర్ కోడ్(CPC)లోని ఆర్డర్ 7, రూల్ 1 ప్రకారం మనీ రికవరీ సూట్ దాఖలు చేయవచ్చు. పెద్ద మొత్తంలో డబ్బు రికవరీ చేయడానికి ఇది బెస్ట్ ఆప్షన్. ఈ కేసుల్లో వడ్డీతో సహా డబ్బు తిరిగి పొందే అవకాశాలు అధికం. – వడ్డీ రేటు: కోర్టు కేసును బట్టి వడ్డీ రేటును నిర్ణయిస్తుంది. వ్యక్తిగత అవసరాల కోసం ఇచ్చిన అప్పులకు 6 శాతం నుంచి 12 శాతం వరకు వడ్డీని అనుమతించవచ్చు. వ్యాపార అవసరాల కోసం ఇచ్చిన అప్పులకు 18 శాతం నుంచి 23 శాతం వరకు వడ్డీని పొందే అవకాశం ఉంది. – కాలపరిమితి(లిమిటేషన్ పీరియడ్): మనీ రికవరీ సూట్ దాఖలు చేయడానికి అప్పు ఇచ్చిన తేదీ లేదా తిరిగి చెల్లించాల్సిన తేదీ నుంచి మూడేళ్ల గడువు ఉంటుంది.

3. చెక్ బౌన్స్ కేసులు (NIA యాక్ట్ సెక్షన్ 138): ఒకవేళ అప్పు తీసుకున్న వ్యక్తి చెక్ ఇచ్చి, అది బౌన్స్ అయినట్లయితే, నెగోషియబుల్ ఇన్‌స్ట్రుమెంట్స్ యాక్ట్(NIA)లోని సెక్షన్ 138 కింద కేసు పెట్టవచ్చు. ఇది పాక్షికంగా క్రిమినల్ కేసుగా పరిగణిస్తారు. – ప్రక్రియ: చెక్ బౌన్స్ అయినప్పుడు బ్యాంక్ నుంచి బౌన్స్ మెమో తీసుకోవాలి. మెమో అందుకున్న తర్వాత, అప్పు తీసుకున్న వ్యక్తికి లీగల్ నోటీసు పంపాలి(15 రోజుల సమయం). ఈ గడువులోగా డబ్బు తిరిగి చెల్లించకపోతే, నోటీసు గడువు ముగిసిన 30 రోజుల్లోగా కోర్టులో కేసు దాఖలు చేయాలి. మొత్తం ప్రక్రియకు 75 రోజుల సమయం ఉంటుంది.

4. క్రిమినల్ కేసులు(IPC సెక్షన్ 420 – మోసం): సాధారణంగా డబ్బు రికవరీ కోసం క్రిమినల్ కేసులు అంతగా సిఫార్సు చేయరు. ఎందుకంటే డబ్బు తిరిగి పొందడం కంటే శిక్ష విధించడంపైనే దృష్టి ఉంటుంది. అయితే, రుణగ్రస్తుడు డబ్బు తిరిగి అడిగినప్పుడు బెదిరించినా, హింసించినా, లేదా చంపేస్తానని బెదిరింపులకు పాల్పడినా, అప్పుడు ఐపీసీ సెక్షన్ 420 కింద మోసం కేసు పెట్టవచ్చు. ఇది మీకు కొంత భద్రతను అందించినప్పటికీ, డబ్బు రికవరీకి సివిల్ సూట్ మంచిది. చివరగా, డబ్బు అప్పు ఇచ్చేటప్పుడు జాగ్రత్త వహించడం, డిజిటల్ ఆధారాలు సేకరించడం మరియు సరైన చట్టపరమైన ప్రక్రియను అనుసరించడం ద్వారా మీ డబ్బును తిరిగి పొందడంలో విజయం సాధించవచ్చు అని న్యాయవాది స్పష్టం చేశారు.