హార్ముజ్ మళ్లీ బంద్! వీటిపైన తీవ్ర ప్రభావం.. ఇప్పుడు పరిస్థితి ఏంటంటే?
హోర్ముజ్ జలసంధిలో ఇరాన్ ఉద్రిక్తతలను పెంచింది, ప్రపంచ ఇంధన సరఫరాలకు ముప్పు వాటిల్లుతుందని హెచ్చరించింది. వాణిజ్య నౌకలపై కాల్పులు, దిగ్బంధనం భయాలు అంతర్జాతీయ చమురు మార్కెట్లను కుదిపేస్తున్నాయి. ప్రపంచ చమురు, LNGలో 20 శాతం ఈ మార్గం ద్వారా రవాణా అవుతుంది.
ప్రపంచ ఇంధన సరఫరాలకు కీలకమైన హోర్ముజ్ జలసంధి మరోసారి ఉద్రిక్తతల కేంద్రంగా మారింది. ఇరాన్ ఈ సముద్ర మార్గాన్ని నిరవధికంగా దిగ్బంధించవచ్చని హెచ్చరించడంతో, అంతర్జాతీయ మార్కెట్లలో భయాందోళనలు పెరిగాయి. వాణిజ్య నౌకలపై కాల్పులు జరిపిన ఘటనలు ఈ పరిస్థితిని మరింత ఉద్రిక్తంగా మార్చాయి. ఇరాన్కు చెందిన ఇస్లామిక్ రివల్యూషనరీ గార్డ్ కార్ప్స్ (IRGC) నౌకాదళం సముద్రంలో కఠిన నియంత్రణలు అమలు చేస్తోంది. హోర్ముజ్ మార్గం వైపు వెళ్తున్న నౌకలను లక్ష్యంగా చేసుకునే అవకాశముందని హెచ్చరించడం షిప్పింగ్ రంగాన్ని తీవ్ర ఆందోళనకు గురిచేసింది. ఈ మార్గం గుండా ప్రపంచ చమురు, LNGలో సుమారు 20 శాతం సరఫరా జరుగుతుండటంతో, దీనిపై ఎలాంటి అంతరాయం వచ్చినా గ్లోబల్ ఎకానమీపై ప్రత్యక్ష ప్రభావం ఉంటుంది.
ఇప్పటికే చమురు ధరలు తగ్గుముఖం పట్టిన సమయంలో ఈ సంక్షోభం మళ్లీ ధరలను ఎగదోస్తుందని నిపుణులు హెచ్చరిస్తున్నారు. రవాణా ఖర్చులు పెరగడం, ద్రవ్యోల్బణం పెరగడం, స్టాక్ మార్కెట్లలో అనిశ్చితి పెరగడం వంటి ప్రభావాలు కనిపించే అవకాశం ఉంది. ఈ ఉద్రిక్తతల వెనుక అమెరికా-ఇరాన్ మధ్య కొనసాగుతున్న వివాదం ప్రధాన కారణంగా ఉంది. అమెరికా ఇరాన్ చమురు ఎగుమతులను అడ్డుకునేందుకు ప్రయత్నిస్తుండగా, ఇరాన్ కూడా మాకు అనుమతి లేకపోతే ఎవరికీ లేదు అన్న ధోరణిని అవలంబిస్తోంది. అమెరికా అధ్యక్షుడు డొనాల్డ్ ట్రంప్ చర్చలు కొనసాగుతున్నాయని చెప్పినా, పరిస్థితి ఎప్పుడైనా మళ్లీ ఘర్షణ దిశగా వెళ్లే ప్రమాదం ఉంది.
ఇదే సమయంలో మధ్యప్రాచ్యంలో ఉద్రిక్తతలు ఇతర ప్రాంతాలకు కూడా విస్తరించాయి. లెబనాన్లో ఇజ్రాయెల్ దాడులు పెరగడం, హిజ్బుల్లాతో ఘర్షణలు తీవ్రరూపం దాల్చడం ప్రాంతీయ అస్థిరతను మరింత పెంచుతోంది. మొత్తానికి హోర్ముజ్ జలసంధి సంక్షోభం కేవలం ఒక ప్రాంతీయ సమస్య కాదు, ఇది ప్రపంచ ఆర్థిక వ్యవస్థను కుదిపే సామర్థ్యం కలిగిన పరిణామం. చమురు ధరలు, స్టాక్ మార్కెట్లు, సాధారణ ప్రజల జీవన వ్యయం, ఈ సంఘటనలపై ఆధారపడి ఉండే పరిస్థితి ఏర్పడింది. పెట్టుబడిదారులు రాబోయే రోజుల్లో తీవ్ర హెచ్చుతగ్గులకు సిద్ధంగా ఉండాల్సిన అవసరం ఉంది.
మరిన్ని బిజినెస్ వార్తల కోసం ఇక్కడ క్లిక్ చేయండి