Diesel Price: దిమ్మదిరిగే షాకిచ్చిన చమురు కంపెనీలు.. భారీగా పెరిగిన డీజిల్ ధర

Diesel Price: మధ్యప్రాచ్యంలో కొనసాగుతున్న సంక్షోభం నేపథ్యంలో పెట్రోలియం కంపెనీలు ప్రీమియం పెట్రోల్ ధరను రూ.2 పెంచాయి. అయితే, రెగ్యులర్ పెట్రోల్, డీజిల్ ధరలలో ఎలాంటి మార్పు లేదు. దీని ధర కూడా పెరిగే అవకాశాలు ఉండవచ్చు. ఈ పెరిగిన ధరలు మార్చి 20వ తేదీ రాత్రి నుంచి అమల్లోకి వస్తాయి. అదనంగా ఇండస్ట్రియల్ డీజిల్ ధరను లీటరుకు రూ.22 పెంచారు. ధర పెరిగిన తర్వాత రూ.87.57 నుంచి రూ.109.59కి చేరింది. ఇరాన్‌తో యుద్ధం లాంటి పరిస్థితి ఇప్పటికే ఎల్‌పిజి సంక్షోభాన్ని సృష్టిస్తుండగా, చమురు కంపెనీలు ప్రీమియం పెట్రోల్ ధరను పెంచి మరో దెబ్బ తీశాయి. అయితే ఈ డీజిల్ ధర సాధారణ వాహణదారులకు అనుకుంటే పొరపాటే. ఇది పారిశ్రామిక డీజిల్ పై మాత్రమే పెరుగుదల ఉంది.

కొన్ని ఐఓసీఎల్ అవుట్‌లెట్లలో ఎక్స్‌పి95 పెట్రోల్ ప్రస్తుతం లీటరుకు రూ.101.80 చొప్పున అమ్ముడవుతోంది. గతంలో కొన్ని ప్రాంతాలలో లీటరుకు రూ.111.68గా ఉన్న ప్రీమియం పెట్రోల్ ధర ఇప్పుడు లీటరుకు రూ.113.77కు పెరిగింది. ఈ పెరుగుదల కారణంగా ఉత్తర ప్రదేశ్ రాజధాని లక్నోలో పెట్రోల్ ధర లీటరుకు రూ.103.92కు చేరగా, పుణెలో ప్రీమియం పెట్రోల్ లీటరుకు రూ.113.17కు అమ్ముడవుతోంది.

పారిశ్రామిక డీజిల్ ఏంటి?

పారిశ్రామిక డీజిల్‌ను సాధారణ పెట్రోల్ పంపులలో అమ్మరు. దీనిని ఫ్యాక్టరీలు, పెద్ద జనరేటర్లు, మైనింగ్ కంపెనీలు, నిర్మాణ స్థలాలు, పవర్ ప్లాంట్లు నేరుగా కొనుగోలు చేస్తాయి. గతంలో చమురు కంపెనీలు బ్రాండెడ్, హై-ఆక్టేన్ ప్రీమియం పెట్రోల్ ధరలను లీటరుకు సుమారు రూ.2 మేర పెంచాయి. అయితే, సాధారణ పెట్రోల్ ధరలో ఎలాంటి మార్పు లేకపోవడంతో వినియోగదారులకు తక్షణ ఉపశమనం లభించింది.

అంతర్జాతీయ మార్కెట్లో ముడి చమురు ధర బ్యారెల్‌కు 100 డాలర్లను దాటిన తరుణంలో భారతదేశంలో ప్రీమియం పెట్రోల్ ధరలు పెరిగాయి. అదే సమయంలో, ఎల్‌పిజి సంక్షోభం ఇప్పటికే నెలకొని ఉంది. పర్యవసానంగా, ముడి చమురు ధరలలో ఈ పెరుగుదల సామాన్య ప్రజల జేబులపై నేరుగా ప్రభావం చూపుతుంది. అలాగే ద్రవ్యోల్బణ ఒత్తిళ్లను మరింత పెంచే అవకాశం ఉంది.

ఇరాన్‌పై అమెరికా, ఇజ్రాయెల్ దాడులు జరుపుతున్న తరుణంలో ఇది మూడవ వారం. ఈ యుద్ధం త్వరలోనే ముగుస్తుందని అమెరికా అధ్యక్షుడు డొనాల్డ్ ట్రంప్ పదేపదే చెబుతున్నప్పటికీ, ప్రస్తుత పరిస్థితి అందుకు విరుద్ధంగా ఉంది. ఇరాన్ అగ్రశ్రేణి కమాండర్లను హతమార్చినప్పటికీ, టెహ్రాన్ ప్రతీకార దాడులు ఈ సంఘర్షణ త్వరలో ముగిసే అవకాశం లేదని స్పష్టం చేస్తున్నాయి.

రూపాయిలో భారీ పతనం

ముడి చమురు ధరలు వేగంగా పెరుగుతుండగా, భారత కరెన్సీ గణనీయంగా క్షీణిస్తోంది. శుక్రవారం, రూపాయి తొలిసారిగా అమెరికా డాలర్‌తో పోలిస్తే 93 కంటే దిగువకు పడిపోయింది. ఇది ద్రవ్యోల్బణాన్ని అరికట్టడానికి ప్రభుత్వంపై ఒత్తిడిని మరింత పెంచింది.