Credit Card: క్యాష్‌బ్యాక్ vs. రివార్డ్ పాయింట్స్.. మీ క్రెడిట్ కార్డు ఖర్చులకు ఏది బెస్ట్?

క్రెడిట్ కార్డ్ ఇప్పుడు చాలామందికి ఒక ముఖ్యమైన ఆర్థిక సాధనంగా మారింది. వినియోగదారులను ఆకర్షించడానికి బ్యాంకులు వివిధ రకాల ఆఫర్లు ఇస్తుంటాయి. వాటిలో క్యాష్‌బ్యాక్, రివార్డ్ పాయింట్స్ అనేవి ప్రధానమైనవి. ఈ రెండింటి మధ్య ఉన్న తేడాలు, వాటిని ఎప్పుడు ఎంచుకోవాలో ఈ కథనంలో వివరంగా తెలుసుకుందాం.

క్యాష్‌బ్యాక్

క్యాష్‌బ్యాక్ అనేది ఒక ప్రత్యక్ష నగదు ప్రయోజనం. మీరు క్రెడిట్ కార్డ్ ఉపయోగించి ఒక వస్తువు కొనుగోలు చేసినప్పుడు, ఆ మొత్తం నుంచి ఒక నిర్దిష్ట శాతం నగదు మీ కార్డ్ అకౌంట్‌కు తిరిగి జమ అవుతుంది. ఇది చాలా సులభం, ఉపయోగించడానికి కూడా తేలిక. అయితే, కొన్ని క్యాష్‌బ్యాక్ కార్డ్‌లకు ఖర్చు పరిమితులు లేదా కొన్ని ప్రత్యేక విభాగాలకు మాత్రమే క్యాష్‌బ్యాక్ వర్తించడం వంటి షరతులు ఉండవచ్చు. రోజువారీ ఖర్చులకు కార్డ్ వాడేవారు, సరళమైన ప్రయోజనాలు కోరుకునే వారికి క్యాష్‌బ్యాక్ కార్డ్‌లు ఉత్తమమైనవి.

రివార్డ్ పాయింట్స్

రివార్డ్ పాయింట్స్ పద్ధతిలో, మీరు ఖర్చు చేసే ప్రతి రూపాయికి లేదా ఒక నిర్దిష్ట మొత్తానికి పాయింట్లు లభిస్తాయి. ఈ పాయింట్లను ఉపయోగించి విమాన టిక్కెట్లు, హోటల్ బుకింగ్‌లు, గిఫ్ట్ వోచర్లు లేదా వస్తువులు కొనుగోలు చేయవచ్చు. రివార్డ్ పాయింట్లను ఉపయోగించే విధానం కొంచెం సంక్లిష్టంగా ఉంటుంది. కొన్నిసార్లు నిర్దిష్ట గడువులోగా ఉపయోగించకపోతే అవి కాలం చెల్లిపోవచ్చు. ప్రయాణాలు ఎక్కువగా చేసేవారు, ఎక్కువ ఖర్చు చేసే వారికి రివార్డ్ పాయింట్స్ ఎక్కువ ప్రయోజనం ఇస్తాయి. వాటిని సరిగ్గా ఉపయోగించుకుంటే, క్యాష్‌బ్యాక్ కంటే ఎక్కువ విలువ పొందవచ్చు.

ఏది ఎంచుకోవాలి?

మీ ఖర్చు అలవాట్లు, మీ ప్రాధాన్యతలను బట్టి క్యాష్‌బ్యాక్ లేదా రివార్డ్ పాయింట్‌లలో ఏది ఎంచుకోవాలో నిర్ణయించుకోవచ్చు.

క్యాష్‌బ్యాక్: రోజువారీ ఖర్చులకు, సులభమైన ప్రయోజనాలు కోరుకునే వారికి ఇది మంచిది.

రివార్డ్ పాయింట్స్: తరచుగా ప్రయాణాలు చేసేవారు, బ్రాండెడ్ వస్తువులు లేదా విమాన టిక్కెట్లు పాయింట్ల ద్వారా కొనాలనుకునే వారికి ఇది ఉపయోగకరంగా ఉంటుంది.