Rohini Karte: రేపటి నుంచే ‘రోళ్లు పగిలే’ రోహిణి కార్తె.. ఈ సమయంలో ఏం చేయాలి? చేయకూడదో తెలుసా..?
Rohini Karte 2026 Dates: సూర్యుడు ప్రతి నెల ఒక రాశి నుంచి మరో రాశికి మారినట్లే, సుమారు ప్రతి 13½ రోజులకు ఒక నక్షత్రంలో ప్రవేశిస్తాడు. సూర్యుడు రోహిణి నక్షత్రంలో సంచరించే కాలాన్నే “రోహిణి కార్తె” అంటారు. ఇది వేసవి అత్యంత తీవ్రంగా ఉండే సమయం. అందుకే “రోహిణి కార్తెలో రోళ్లు కూడా పగిలిపోతాయి” అనే సామెత ఉంది.
సూర్యుడు ప్రతి నెల ఒక రాశి నుంచి మరో రాశికి సంచరించినట్టే, సుమారు ప్రతి 13½ రోజులకోసారి ఒక నక్షత్రంలో ప్రవేశిస్తాడు. సూర్య భగవానుడు రోహిణి నక్షత్రంలో సంచరించే ఈ ప్రత్యేక కాలాన్నే “రోహిణి కార్తె”గా పిలుస్తారు. రోహిణి కార్తె అంటే వేసవి తీవ్రత అత్యున్నత స్థాయికి చేరుకున్న సమయంగా భావిస్తారు. అందుకే “రోహిణి కార్తెలో రోళ్లు కూడా పగిలిపోతాయి” అనే సామెత ప్రాచుర్యంలో ఉంది. ఈ సమయంలో మండుటెండలు, వేడిగాలులు, ఉక్కపోత, అగ్నిప్రమాదాల ప్రమాదం ఎక్కువగా ఉండటంతో ప్రత్యేక జాగ్రత్తలు తీసుకోవాలని పెద్దలు చెబుతారు.
నౌతప కాలం..
ఈ కాలంలో తొలి తొమ్మిది రోజులను “నౌతప కాలం” అని పిలుస్తారు. ఈ ఏడాది నౌతప కాలం మే 25 నుంచి జూన్ 8 వరకు కొనసాగుతుంది. జ్యేష్ఠ మాస శుక్ల పక్షంలో సూర్యుడు రోహిణి నక్షత్రంలోకి ప్రవేశించిన తర్వాత వచ్చే ఈ వేడి తీవ్రతను ప్రకృతి మార్పుల సంకేతంగా భావిస్తారు. సంప్రదాయ విశ్వాసాల ప్రకారం, ఈ కాలంలో ఎండలు ఎక్కువగా ఉంటే తరువాత మంచి వర్షాలు కురుస్తాయని అంటారు.
సూర్య ఆరాధన..
నౌతప కాలంలో సూర్య భగవానుడి ఆరాధనకు విశేష ప్రాముఖ్యత ఉంది. జాతకంలో సూర్యుని బలం పెరగాలని, ఆరోగ్యం చక్కగా ఉండాలని కోరుకునేవారు ఈ సమయంలో ప్రత్యేక పూజలు చేస్తారు. ఉదయాన్నే స్నానం చేసి సూర్య నమస్కారాలు చేయడం, సూర్య శ్లోకాలు పఠించడం, అర్ఘ్యం సమర్పించడం శుభప్రదంగా భావిస్తారు.
దానాలు చేయడంతో ఎంతో పుణ్యం..
ఈ కాలంలో దానం చేయడం కూడా ఎంతో పుణ్యకార్యంగా చెబుతారు. ముఖ్యంగా త్రాగునీటి పంపిణీ, శర్బత్, సత్తు, మట్టి కుండలు, గొడుగులు, పత్తి దుస్తులు, చేతి విసనకర్రలు, కాలానుగుణ పండ్లు వంటి వాటిని అవసరమైన వారికి అందించడం మంచి ఫలితాలను ఇస్తుందని నమ్మకం. పక్షులు, జంతువులకు నీరు ఏర్పాటు చేయడం కూడా శుభప్రదంగా పరిగణిస్తారు.
ఆరోగ్య జాగ్రత్తలు
ఆరోగ్య పరంగా కూడా ఈ సమయంలో కొన్ని జాగ్రత్తలు అవసరం. తేలికగా జీర్ణమయ్యే ఆహారం తీసుకోవడం మంచిది. మసాలా ఎక్కువగా ఉండే పదార్థాలు, వేయించిన ఆహారం, మాంసాహారం తగ్గించడం శ్రేయస్కరం. అత్యవసరం అయితే తప్ప మధ్యాహ్నం 12 గంటల నుంచి సాయంత్రం 4 గంటల వరకు బయటకు వెళ్లకుండా ఉండటం మంచిది. అలాగే ఈ కాలంలో దీర్ఘ ప్రయాణాలు తగ్గించడం ఆరోగ్యానికి మేలు చేస్తుంది.
శుభకార్యాలకు దూరం
సంప్రదాయ విశ్వాసాల ప్రకారం రోహిణి కార్తె సమయంలో వివాహాలు, గృహప్రవేశాలు వంటి శుభకార్యాలు నిర్వహించకుండా ఉండటం ఉత్తమమని భావిస్తారు. కుటుంబ శాంతి, సామరస్యం కోసం ఈ నియమాన్ని పాటించేవారు చాలా మంది ఉంటారు.
రోహిణి కార్తె తర్వాత వచ్చే ముఖ్యమైన కార్తెల్లో మృగశిర కార్తె, ఆరుద్ర కార్తె ప్రత్యేకమైనవి.
మృగశిర కార్తె జూన్ 9 నుంచి జూన్ 22 వరకు ఉంటుంది. ఇది తొలకరి వానలు ప్రారంభమయ్యే సమయం. రైతులు వ్యవసాయ పనులకు సిద్ధమవుతూ కొత్త ఆశలతో ఎదురుచూసే కాలం ఇదే.
ఆరుద్ర కార్తె జూన్ 23 నుంచి జూలై 6 వరకు కొనసాగుతుంది. ఈ సమయంలో విస్తారంగా వర్షాలు కురుస్తాయని చెబుతారు. “ఆరుద్ర వాన అదను వాన” అనే సామెత కూడా దీనికే నిదర్శనం. రైతులకు ఆనందం, వ్యవసాయానికి ఊపిరి నింపే సమయంగా ఆరుద్ర కార్తెను భావిస్తారు.
(Disclaimer: ఇక్కడ అందించిన సమాచారం మతం, జ్యోతిషం, సాధారణ నమ్మకాల ఆధారంగా మాత్రమే అందించబడింది. ఈ సమాచారం ఖచ్చితంగా నిజం లేదా శాస్త్రీయంగా నిర్ధారితమైన సమాచారం అని భావించకండి. వ్యక్తిగత నిర్ణయాలు తీసుకునే ముందు సంబంధిత నిపుణులను సంప్రదించడం మంచిది.)