AP: నీళ్లలో ఏవో తేలుకుంటూ వచ్చాయ్ అనుకోకండి.. అసలు విషయం తెలిస్తే కళ్లు తేలేస్తారు..

ఎర్రచందనం, గంజాయి, డ్రగ్స్‌ వంటి వాటి స్మగ్లింగ్‌ అధికారులకు, పోలీసులకు సవాల్‌గా మారుతోంది.  స్పెషల్ చెక్ పోస్ట్ లు ఏర్పాటు చేసి.. తనిఖీలు చేస్తున్నా.. స్మగ్లర్లు బరితెగిస్తూనే ఉన్నారు. రోజుకో కొత్త మార్గంలో మత్తు పదార్థాలు స్మగ్లింగ్ చేస్తూ.. అధికారులకే షాక్ ఇస్తున్నారు కేటుగాళ్లు. పుష్ప(Pushpa) మూవీలో ఎర్ర చందనాన్ని అక్రమంగా తరలించేందుకు హీరో అల్లు అర్జున్(Allu Arjun) వేసే ప్లాన్స్ షాకింగ్‌గా ఉంటాయి.  అంతకు మించిన ఐడియాలతో అధికారుల మైండ్ బ్లాంక్ చేస్తున్నారు గంజాయి స్మగ్లరు. పుష్ప సినిమాకు ఏ మాత్రం తీసిపోని విధంగా.. సేమ్‌ టు సేమ్‌ లెవల్‌లో… పెద్ద ఎత్తున గంజాయి(Cannabis)ని తరించేందుకు యత్నించి కేటుగాళ్లు బొక్కబోర్లా పడ్డారు. గంజాయిని తరలిస్తున్నారని సమాచారంతో మారేడుమిల్లి వద్ద తనిఖీలు నిర్వహిస్తున్నారు పోలీసులు. ఈ క్రమంలో ఓ స్కార్పియో వాహనం అటుగా వచ్చింది. అయితే చెక్ పోస్ట్ దగ్గరువుతున్న కొద్దీ ఆ వాహనం స్పీడ్ పెరుగుతుంది. దీంతో పోలీసులు అలెర్టయ్యారు. ఆ వాహనాన్ని ఆపే ప్రయత్నం చేశారు. కానీ ఆ స్కార్పియో మరింత స్పీడ్‌తో దూసుకుపోయింది. దీంతో పోలీసులు తమ వెహికల్‌తో ఆ వాహనాన్ని వెంబడించారు. పోలీసులు ఫాలో అవుతుండటంతో..  గంజాయితో ఉన్న స్కార్పియో వాహనాన్ని అల్లూరి సీతారామరాజు జిల్లా రంపచోడవరం మండలం భూపతిపాలెం రిజర్వాయరులోనికి దింపారు స్మగ్లర్లు. రిజర్వాయర్‌లో నీటి అడుగు భాగంలో గంజాయిని దాచేందుకు ప్రయత్నించారు.  పోలీసులు రంగంలోకి దిగడంతో వారి ప్లాన్ బెడిసికొట్టింది. ఆపై ఆ వాహనంలోని ఒక వ్యక్తి పరారవ్వగా, మరో వ్యక్తిని పోలీసులు అదుపులోకి తీసుకున్నారు. స్కార్పియోలో 300 కేజీలకు పైగా గంజాయి బస్తాలు ఉన్నట్లు పోలీసులు గుర్తించారు.