TTD 2026 Calendars: శ్రీవారి భక్తులకు గుడ్న్యూస్.. నేరుగా మీ ఇంటి వద్దకే టీటీడీ క్యాలెండర్లు, డైరీలు! ఎలా అంటే?
దేశ విదేశాలల్లోని శ్రీవారి భక్తుల నుండి టీటీడీ డైరీలు, క్యాలెండర్లకు విశేష స్పందన లభిస్తోంది. టీటీడీ ముద్రించిన 2026 సంవత్సర క్యాలెండర్లు, డైరీలను పొందేందుకు భక్తులు భారీగా ఆసక్తి కనబరుస్తున్నారు. ఈ నేపథ్యంలో భక్తులకు కాల్యెండర్లను అందించేదందుకు టీటీడీ మరిన్ని చర్యలు చేపట్టింది.
శ్రీవారి భక్తుల సౌకర్యార్థం టీటీడీ 2026 సంవత్సరం 12 పేజీల క్యాలెండర్లు 13 లక్షలు, 6 పేజీల క్యాలెండర్లు 75 వేలు, పెద్ద డైరీలు 8.50 లక్షలు, చిన్నడైరీలు3 లక్షలు, టేబుల్ టాప్ క్యాలెండర్లు 1.50 లక్షలు, శ్రీవారి పెద్ద క్యాలెండర్లు 2.50 లక్షలు, శ్రీ పద్మావతి అమ్మవారి పెద్ద క్యాలెండర్లు 10 వేలు, శ్రీవారు, శ్రీపద్మావతి అమ్మవారి క్యాలెండర్లు 3 లక్షలు, టీటీడీ స్థానిక ఆలయాల క్యాలెండర్లు 10 వేలు అత్యంత ఆకర్షణీయంగా ముద్రించి అందుబాటులో ఉంచింది.
క్యాలెండర్ల ధరలు ఇలా ఉన్నాయి.
12 పేజీల క్యాలెండర్ రూ.130, డీలక్స్ డైరీ రూ.150, చిన్న డైరీ రూ.120, టేబుల్ టాప్ క్యాలెండర్ రూ.75, 6 పేజీల 3డి డిజిటల్ క్యాలెండర్ రూ.450, శ్రీవారి పెద్ద క్యాలెండర్ రూ.20, శ్రీ పద్మావతి అమ్మవారి క్యాలెండర్ రూ.20, శ్రీవారు, శ్రీపద్మావతి అమ్మవారి క్యాలెండర్ రూ.15 ధర నిర్ణయించి విక్రయిస్తున్న టీటీడీ తెలుగు పంచాంగం క్యాలెండర్ రూ.30 లకు అందుబాటులో ఉంచింది. ఇక టీటీడీ స్థానిక ఆలయాల క్యాలెండర్లు రూ.130లకు విక్రయిస్తోంది.
తిరుమల, తిరుపతిలోనూ అమ్మకాలు.
స్థానిక భక్తులు వీటిని కొనుగోలు చేసేందుకు తిరుమల, తిరుపతిలోని టిటిడి పరిపాలన భవనం ఎదురుగా సేల్స్ సెంటర్, శ్రీ గోవిందరాజ స్వామి వారి ఆలయం సమీపంలోని ధ్యానమందిరం, శ్రీనివాసం, విష్ణునివాసం ప్రాంతాల్లోనూ, తిరుచానూరులో ఉన్న టిటిడి పబ్లికేషన్ స్టాల్స్లలోనూ డైరీ లు, క్యాలెండర్లు అందుబాటులో ఉంచింది టీటీడీ.
ఈ ప్రధాన నగరాల్లోనూ అమ్మకాలు
తిరుమల, తిరుపతిలో కాకుండా దేశంలోని పలు ప్రధాన నగరాల్లో కూడా వీటిని టీటీడీ విక్రయిస్తుంది. చెన్నైలోని శ్రీ వేంకటేశ్వర స్వామి, శ్రీ పద్మావతి అమ్మవారి ఆలయాలు, హైదరాబాద్, బెంగళూరు, విజయవాడ, వైజాగ్లోని శ్రీవారి ఆలయాలు, ముంబయి, న్యూఢిల్లీ, వేలూరు, కాంచీపురంలోని సమాచార కేంద్రాలు, నెల్లూరు, రాజమండ్రి, కాకినాడ, కర్నూలులోని టీటీడీ కల్యాణ మండపాల్లో క్యాలెండర్లు, డైరీలు విక్రయిస్తున్నారు. అదేవిధంగా ఒంటిమిట్టలోని శ్రీ కోదండరామ స్వామివారి ఆలయం, దేవుని కడపలోని శ్రీ లక్ష్మీ వేంకటేశ్వర స్వామివారి ఆలయాలతో పాటు టీటీడీ అనుబంధ ఆలయాల్లో భక్తుల కోసం డైరీలు, క్యాలెండర్లను టీటీడీ సిద్ధంగా ఉంచింది.
ఆన్లైన్లోనూ అమ్మకాలు
నేరుగా కొనుగోలు చేయలేని భక్తుల కోసం టీటీడీ ఆన్లైన్లో కూడా క్యాలెండర్స్, డైరీలను విక్రయిస్తోంది. ఆన్లైన్లో వీటిని కొనుగోలు చేయాలనుకునే వారు టిటిడి వెబ్ సైట్ ద్వారా బుక్చేసుకోవచ్చు. ఇందులో 12 పేజీల క్యాలెండర్, డీలక్స్ డైరీ, చిన్న డైరీ, టేబుల్ టాప్ క్యాలెండర్, 6 పేజీల 3డి క్యాలెండర్ లను టిటిడి వెబ్ సైట్ ద్వారా (www.tirumala.org, ttdevasthanams.ap.gov.in) ఆన్ లైన్ లో బుక్ చేసుకున్న భక్తులకు తపాలా శాఖ ద్వారా పంపబడుతుంది.
డిడి తీసి కూడా పంపొచ్చు.
ఇక భక్తులు డిడి తీసి పంపినా టిటిడి క్యాలెండర్, డైరీలను పొందవచ్చు. ఇందుకోసం కార్యనిర్వహణాధికారి, టిటిడి, తిరుపతి పేరిట ఏదైనా జాతీయ బ్యాంకులో డిడి తీసి కవరింగ్ లెటర్తో కలిపి డి ప్యూటీ ఈవో, పుస్తక ప్రచురణల విక్రయ విభాగం, ప్రెస్ కాంపౌండ్, KT రోడ్, తిరుపతి అనే చిరునామాకు పంపాల్సి ఉంటుంది. డీడీ అందిన తర్వాత తపాలా శాఖ ద్వారా భక్తులకు టిటిడి క్యాలెండర్, డైరీలను పంపడం జరుగుతుంది. రవాణా ఛార్జీలను అదనంగా తపాలా శాఖకు చెల్లించాల్సి ఉంటుంది. ఇక క్యాలెండర్, డైరీలకు సంబంధించిన ఇతర సమాచారం కోసం 0877-2264209 నంబర్లలో సంప్రదించవచ్చని టీటీడీ విజ్ఞప్తి చేస్తుంది.
మరిన్ని ఆంధ్రప్రదేశ్ వార్తల కోసం ఇక్కడ క్లిక్ చేయండి.