కూల్ న్యూస్.. తెలుగు రాష్ట్రాల్లోని ఈ ప్రాంతాల్లో వర్షాలు.. ఆదివారం వెదర్ రిపోర్ట్ ఇదిగో..

ఆంధ్రప్రదేశ్, తెలంగాణలో విభిన్న వాతావరణ పరిస్థితులు నెలకొన్నాయి.. ఒకవైపు ప్రచండ ఎండలు.. మరోవైపు వర్షాలు కురుస్తు్న్నాయి.. దీంతో జనం ఉక్కిరిబిక్కిరవుతున్నారు. ఈ క్రమంలో తెలుగు రాష్ట్రాల్లో వాతావరణ పరిస్థితులపై .. వాతావరణ శాఖ కీలక అప్డేట్ ఇచ్చింది.. ఓ వైపు ఎండలు వడగాలులతో పాటు.. మరోవైపు ఈదురుగాలులు, పిడుగులతో కూడిన వర్షాలు కురుస్తాయని జాగ్రత్తగా ఉండాలని అలర్ట్ జారీ చేసింది. ఏపీలో రాష్ట్రంలో విభిన్న వాతావరణ పరిస్థితులు నెలకొని ఉన్నాయని.. APSDMA మేనేజింగ్ డైరెక్టర్ ప్రఖర్ జైన్ వెల్లడించారు. ఆదివారం (31-05-2026) అనంతపురం, శ్రీ సత్యసాయి, వైఎస్ఆర్ కడప, అన్నమయ్య, చిత్తూరు జిల్లాల్లో ఉరుములతో కూడిన మోస్తరు వర్షాలు కురిసే అవకాశం ఉందని తెలిపారు. మిగిలిన జిల్లాల్లో అక్కడక్కడా ఆకస్మికంగా తేలికపాటి నుంచి మోస్తరు వర్షాలు కురిసే అవకాశం ఉందన్నారు. మరోవైపు పలు 17 మండలాల్లో తీవ్ర వడగాలులు వీస్తాయని తెలిపారు. అదేసమయంలో రాష్ట్రంలో ఎండలు స్వల్పంగా తగ్గి కొన్నిచోట్ల 42°-44°C ఉష్ణోగ్రతలు నమోదయ్యే అవకాశం ఉంది.. అయితే.. ఉరుములు, మెరుపులు వచ్చే సమయంలో ప్రజలు, రైతులు, పశుకాపరులు చెట్ల కింద, విద్యుత్ స్తంభాల వద్ద నిలబడకుండా సురక్షిత ప్రాంతాలకు వెళ్లాలని సూచించారు.

ఇదిలాఉంటే.. తెలంగా రాష్ట్రంలో జూన్ 3 వరకు తీవ్రమైన ఎండలు, వడగాల్పులు కొనసాగుతాయని హైదరాబాద్ వాతావరణ కేంద్రం పేర్కొంది. గరిష్ఠ ఉష్ణోగ్రతలు 41 నుంచి 45 డిగ్రీల వరకు నమోదయ్యే అవకాశం ఉందని పేర్కొంది. రాష్ట్రంలో రానున్న రెండు రోజులలో గరిష్ట ఉష్ణోగ్రతలు ఇంచుమించు ఇదే స్థాయిలో కొనసాగే అవకాశం ఉందని.. తెలిపింది. అంతేకాకుండా.. రాష్ట్రంలోని కొన్ని జిల్లాల్లో తేలికపాటి నుండి మోస్తారు వర్షాలు అక్కడక్కడ కురిసే అవకాశం ఉందని తెలిపింది. ఈదురు గాలులు పిడుగులతో కూడిన వానలు కురుస్తాయని తెలిపింది.

మరిన్ని ఆంధ్రప్రదేశ్ వార్తల కోసం ఇక్కడ క్లిక్ చేయండి..