సిగ్గుపడకుండా ఆ పని చేస్తే.. మునగ పంట కాసులు కురిపిస్తుంది..

Drumstick Farming

గుంటూరు జిల్లా తాడేపల్లి మండలం ఉండవల్లి గ్రామానికి చెందిన సీనియర్ రైతు శివ రెడ్డి మునగ సాగులో మెరుగైన లాభాలను, సాఫ్ట్‌వేర్ ఉద్యోగాల కంటే ఇది ఎలా లాభదాయకమో వివరించారు. ఈ పంట సామాన్య, చిన్నకారు రైతులకు కూడా అనుకూలంగా ఉంటుందని, మనం అమ్మడం ఏంటి అని ఆలోచించకుండా, సిగ్గు పడకుండా..  నేరుగా అమ్ముకోవడం ద్వారా అధిక ఆదాయం పొందవచ్చని ఆయన స్పష్టం చేశారు. దళారులకు కాకుండా సొంతంగా పంటను విక్రయిస్తే 50% వరకు లాభం పెరిగే అవకాశం ఉందని ఆయన సూచించారు. ఇది వినియోగదారులకు కూడా మంచి, తాజా కాయలు అందజేయడానికి తోడ్పడుతుందని తెలిపారు. కొత్తగా వ్యవసాయంలోకి వచ్చే సాఫ్ట్‌వేర్ ఇంజనీర్లు, యువత లక్ష రూపాయల పెట్టుబడితో మునగ సాగు చేపట్టవచ్చని శివ రెడ్డి ప్రోత్సహించారు. ఉదాహరణకు, గిద్దలూరు నుంచి వచ్చిన ఒక యువకుడు నాలుగు ఎకరాల పొలంలో మునగ సాగు చేసి ఎనిమిది లక్షల రూపాయలు సంపాదించాడని ఆయన పేర్కొన్నారు. ఎకరానికి సుమారు 20 వేల రూపాయల పెట్టుబడితో నాలుగు ఎకరాలలో మునగ సాగు చేయవచ్చని, మోడీ ప్రభుత్వం చిన్న రైతులకు మునగ మొక్కల పెంపకంపై సబ్సిడీ అందిస్తోందని తెలిపారు. దీనిని వ్యవసాయ శాఖను సంప్రదించి సద్వినియోగం చేసుకోవాలని సూచించారు. మునగ పంటలో కాయలతో పాటు ఆకులను కూడా విక్రయించి లాభాలు పొందవచ్చు. లేత ఆకులను కోసి అమ్ముకోవడం వల్ల కూడా ఆదాయం వస్తుందని, ఆకు కోసినా కాయకు ఎలాంటి నష్టం ఉండదని, వెంటనే మళ్లీ ఆకు వస్తుందని ఆయన తెలిపారు.

మే నెల నుంచి జనవరి ఫస్ట్ వరకు మొక్కలు నాటుకుంటే జనవరిలో మంచి ధర వస్తుందని, కడప, కర్నూలు, హైదరాబాద్ ప్రాంతాలలో ఈ సమయం అనుకూలంగా ఉంటుందని వివరించారు. ఒక ఎకరానికి అర కిలో విత్తనం (సుమారు 800 మొక్కలు) సరిపోతుందని, రెండు విత్తనాలు కలిపి నాటితే దిగుబడి పెరుగుతుందని సలహా ఇచ్చారు. పెట్టుబడి విషయానికి వస్తే, మునగ పంటకు ఉల్లిపాయ పంటకు అవసరమైనంత బలమే సరిపోతుందని, అదనంగా ఒకటి రెండు కట్టల ఎరువు వేస్తే సరిపోతుందని శివ రెడ్డి చెప్పారు. భూమి ఆరోగ్యం కోసం ఎరువు, జింక్ లోపం రాకుండా జాగ్రత్తలు తీసుకోవాలని, దీని కోసం వ్యవసాయ డిపార్ట్‌మెంట్ అధికారులను సంప్రదించాలని సూచించారు. వారు నేరుగా పొలానికి వచ్చి సలహాలు ఇస్తారని తెలిపారు. మునగ పంటకు నీటి అవసరం తక్కువని, 20 రోజులకు ఒకసారి నీరు అందిస్తే సరిపోతుందని, కాయ కాసేటప్పుడు మాత్రం 10 రోజులకు ఒకసారి తడి ఇవ్వాలని చెప్పారు. పూత, పిందె రాలకుండా ఉండేందుకు, పురుగుల నివారణకు అధునాతన మందులు అందుబాటులో ఉన్నాయని, అర గంటలో గుంగడ పురుగును నివారించే మందులు వచ్చాయని తెలిపారు. కాయ నాణ్యత, రంగు మెరుగుపరచడానికి 19:19, 14:35 వంటి మందులు వాడవచ్చని సూచించారు. ఒకసారి నాటిన మునగ మొక్క నుంచి మూడు సంవత్సరాల వరకు దిగుబడి తీసుకోవచ్చని, ఒకసారి కాపు అయిపోయాక మొక్కను నరికివేస్తే మళ్లీ ఇగురులు వచ్చి నాలుగు నెలల్లో తిరిగి కాపు వస్తుందని ఆయన వివరించారు.

బోరాన్ వంటి తేలికపాటి మందులు పిందె పడటానికి సహాయపడతాయని, ఇవి పెద్దగా ఖర్చుతో కూడుకున్నవి కావని తెలిపారు. మునగ తోటలో అంతర పంటలుగా ఉల్లిపాయ, కొత్తిమీర వంటివి కూడా పండించి అదనపు ఆదాయం పొందవచ్చని, తద్వారా పెట్టుబడిని తిరిగి పొందవచ్చని శివ రెడ్డి  పేర్కొన్నారు. తిరుపతి, చిత్తూరు ప్రాంతాలలో ఆకును అమ్ముతుండగా, హైదరాబాద్‌లో ఆకును పొడి చేసి విక్రయిస్తున్నారని, అమెరికాకు కూడా ఎగుమతి చేస్తున్నారని ఆయన వివరించారు. ఎర్ర నేలలు మునగ సాగుకు అత్యంత అనుకూలమైనవని, ఆవు పేడ, గేదెల ఎరువు, లేదా కోళ్ల ఎరువు వాడటం వల్ల భూమికి బలం చేకూరుతుందని, ఐరన్, జింక్ లోపాలు రాకుండా ఉంటాయని ఆయన తెలియజేశారు. వ్యవసాయం నష్టపోకుండా ఉండాలంటే ఇంటి సభ్యులు శ్రద్ధ వహించి, వ్యవసాయ శాఖ సలహాలు తీసుకోవాలని ఆయన పిలుపునిచ్చారు.